Kubisya kwaMwaami Davida

Davida wakaba mwaami Sawulu naakafwa. Wakali aminyaka iili 30. Nikwakayinda minyaka kali mwaami, bumwi busiku kali mung’anda yakwe yamujulu, wakabona mukayintu wakali mubotu loko. Wakamvwa kuti mukayintu ooyo nguBbatishebba akuti wakali mukayintu wasilumamba utegwa Uriya. Davida wakalayilila kuti Bbatishebba aze kung’anda yakwe. Wakoona anguwe, mpawo wakaminta. Davida wakeezya kusisa nzyaakachita. Wakabuzya mupati wabasilumamba kuti abikke Uriya kunembo munkondo akuti bamuchije. Uriya naakafwa, Davida wakakwata Bbatishebba.

Jehova wakazibona zyoonse nzyaakachita Davida. Pesi wakachita biyeni? Wakatuma musinsimi Natani kuti akaswaye Davida. Natani wakati: ‘Umwi muntu wakanotede wakali ambelele zyiingi, pesi muntu uufwaba wakali akabelele kamwi alimwi wakali kukayanda loko. Mpawo muntu unotede wakabweza kabelele kamuntu uufwaba.’ Davida wakanyema loko akwaamba kuti: ‘Nchobeni muntu ooyo weelede kujayigwa!’ Natani wakabuzya Davida kuti: ‘Webo uli mbuli muntu uulya unotede!’ Davida wakakataazikana mumoyo alimwi wakazumina mulandu wakwe akubuzya Natani kuti: ‘Ndabisya kuli Jehova.’ Chibi eechi chakapa kuti Davida ampuli yakwe babe mumapenzi. Jehova wakasubula Davida pesi taakamujaya pe nkaambo wakali kusyomeka akulibombya.

Davida wakali kuyanda kuyakila Jehova tempele, pesi Jehova wakasala kuti lizooyakwe aSolomoni mwana waDavida. Davida wakabungania zintu zyakali kuyoobelesegwa aSolomoni alimwi wakati: ‘Tempele lyaJehova lyeelede kuba pati alimwi libe abulemu. Mwanaangu Solomoni uchili muniini alimwi ndeelede kumuyandwiida zibelesyo.’ Davida wakasanga mali nyingi yakali kuyoobelesegwa kukuyaka. Wakayanduula bantu bakakuzi kabotu kuyaka. Wakayanduula ngolida, nsiliva azisamu zyamikkedari zyakuTire akuSidoni. Katanafwa, Davida wakatondeezya Solomoni mbaakeelede kuyaka tempele. Wakamubuzya kuti: ‘Jehova nguwe wakandibuzya kuti ndikulembele zintu eezi. Jehova uyookugwasya. Utayoowi. Sima, uchite mulimu ooyu.’