Mukayintu waMwaami Wakali Kuchita Zintu Zibi Wakasubulwa

Mwaami Ahabbu wakali kukkala kuJezriyeli alimwi Ahabbu wakali kukonzya kubona muunda wamisaansa wamwaalumi utegwa Nabboti kayimvwi awindo lyang’anda yakwe. Ahabbu wakali kuyanda muunda ooyu, nkinkaako wakakumbila Nabboti kuti amuuzizye. Pesi Nabboti wakakaka kumuuzizya, nkaambo Mulawu waJehova teewakali kuzumina pe kuti muntu awuzye muunda wakukona. Ahabbu wakabotelwa na kuti Nabboti wakasala kabotu? Peepe. Ahabbu wakanyema loko. Wakanyema zyakuti taakali kuzwa pe mung’anda yakwe alimwi wakali kukaka kulya.

Mukayintu waMwaami wakali kuchita zintu zibi, Jezebbeli, wakabuzya mwaami kuti: ‘Nduwe mwaami waIsrayeli. Ulakonzya kulijanina kufumbwa nzuyanda. Ndiyoopa kuti ujane muunda ooyo.’ Wakalembela baalumi bapati bamumuunzi magwalo, kalikubabuzya kuti bape Nabboti mulandu wakuti wasampawula Leza akuti weelede kujayigwa kwiinda mukumutulula amabwe. Baalumi bapati bakachita nzibakabuzigwa aJezebbeli. Kuzwa waawo, Jezebbeli wakabuzya Ahabbu kuti: ‘Nabboti wafwa. Muunda waba wako.’

Nabboti teenguwe pe alikke muntu wakali kusyomeka, wakajayigwa aJezebbeli. Wakajaya bantu biingi loko bakali kukomba Jehova. Wakali kukomba baleza bakubeja akuchita zimwi zintu zibi. Jehova wakazibona zintu zyoonse zibi zyakali kuchitwa aJezebbeli. Jehova wakali kuyoomuchitaanzi Jezebbeli?

Ahabbu wakafwa mpawo mukuya kwachiindi Jehoramu wakaba mwaami. Jehova wakatuma Jehu kuti akasubule Jezebbeli abamumpuli yakwe.

Jehu wakatanta ngolo yakwe kaya kuJezriyeli nkwaakali kukkala Jezebbeli. Mpawo Jehoramu wakaza angolo kuti azooswaanane aJehu alimwi wakamubuzya kuti: ‘Mwaza aluumuno na?’ Mpawo Jehu wakati: ‘Taakwe luumuno pe nkaambo bamaako Jezebbeli bali kuchita zintu zibi.’ Jehoramu wakeezya kuchengulusya ngolo yakwe kuti achije. Pesi Jehu wakamuyasa asumu lyakwe mpawo Jehoramu wakafwa.

Kuzwa waawo, Jehu wakiinka kung’anda yaJezebbeli. Jezebbeli naakamvwa kuti Jehu uzabuza, wakalinonola kumeso akubamba masusu aakwe alimwi wakamulindila kali awindo lili mung’anda yakwe yamujulu. Jehu naakasika, Jezebbeli wakamujuzya munzila itali kabotu. Jehu wakabuzya babelesi bakali kumbali lyaJezebbeli kuti: “Amumuwaale aansi.” Aboobo, bakamuwaalila aansi Jezebbeli mpawo wakafwa.

Kuzwa waawo, Jehu wakajaya bana baAhabbu bali 70 akupa kuti bantu batachikombi Bbaala. Eezi tazitondeezyi na kuti Jehova ulizizi zyoonse zichitika akuti ulabasubula bantu bachita zintu zibi, kuchiindi chakwe cheelede?