Bakakaka Kukotamina Chikozyano

Nikwakiinda chiindi Nebbukkadinezari kalotede chibumbwa chiyoosya, wakazoopanga chikozyano chipati changolida. Wakachiimikizya mubbuwa lyaDura mpawo wakiita bantu balemekwa bamuchisi bakali kuswaanizya Shadirekki, Mishekki aAbbedinego kuti bazoochikombe. Mwaami wakalayilila kuti: ‘Kufumbwa chiindi nimumvwa kulila kwamweembo, kantimbwa akankobela, mweelede kukotamina chikozyano! Kufumbwa muntu uukaka kuvundama akukotamina chikozyano uyoowaalwa mumulilo.’ Balombe bachiHebrayo batatu bakali kuyookomba chikozyano eechi na, naa kuti bakali kuyookomba Jehova alikke?

Kuzwa waawo, mwaami wakalayilila kuti kwiimbwe nyimbo. Bantu boonse bakavundama ansi akukomba chikozyano kunze kwaShadirekki, Mishekki aAbbedinego. Bamwi baalumi bakazibona eezi alimwi bakabuzya mwaami kuti: ‘Balombe bachiHebrayo batatu bakaka kukotamina chikozyano.’ Nebbukkadinezari wakabayita alimwi wakababuzya kuti: ‘Ndilamupa umwi mweenya wakuti mukotamine chikozyano. Pesi, kuti muleke, ndilamuwaala mumulilo. Taakwe leza ukonzya kumuvuna kumaanza aangu.’ Mpawo bakasandula kabati: ‘Utatupi umwi mweenya. Leza wesu ulakonzya kutuvuna. Nikuba kuti waleka kutuvuna pesi tatukakombi chikozyano chako, O mwaami.’

Nebbukkadinezari wakanyema loko. Wakabuzya baalumi bakwe kuti: ‘Amusosele mulilo ziindi zili musanu azibili kwiinda kuumpa kwawo!’ Mpawo wakabuzya basilumamba bakwe kuti: ‘Amwaange balombe aaba mubawaale mumulilo!’ Mulilo ooyo wakali kupya loko zyakuti chiindi basilumamba nibakaswena afwiifwi bakafwa. Balombe bachiHebrayo batatu bakawida mumulilo. Pesi Nebbukkadinezari naakalanga mumulilo, wakabona bantu bane kabalikweendeenda mumulilo. Wakayoowa mpawo wakabuzya babelesi bakwe kuti: ‘Teetwawaala bantu batatu na mumulilo? Ndibwene bantu bane alimwi umwi ubonekaanga mungelo!’

Mpawo Nebbukkadinezari wakaswena afwiifwi amulilo mpawo wakabayita kati: ‘Amuzwe nobababelesi baLeza Mupatikampatila!’ Bantu boonse bakagamba kubona Shadirekki, Mishekki aAbbedinego kabatapyide pe. Lukanda lwabo, masusu aabo azigogo zyabo taakwe nizyakapya pe alubo taakwe nibakali kununka mulilo.

Nebbukkadinezari wakati: ‘Alumbwe Leza waShadirekki, Mishekki aAbbedinego watuma mungelo wakwe kuti azoovune babelesi bakwe. NguLeza wabaleza.’

Ulilibambilide na kukkala kusyomeka kuli Jehova chiindi choonse mbuli kwakachita balombe bachiHebrayo batatu?