Daniyele Uli Mudindi Lyabalavu

Kwakali umwi mwaami wakuBbabbiloni wakali kutegwa Dariyo alimwi wakali muMede. Dariyo wakabona kuti Daniyele wakali muntu uuli kabotu. Wakabikka Daniyele kuti abe mupati wabaalumi bakali azyuuno mubwaami bwakwe. Pesi baalumi aaba bakali kumuchitila munyono Daniyele alimwi bakali kuyanda kuti afwe. Bakalizi kuti Daniyele wakali kukomba kuli Jehova tutatu abuzuba, nkinkaako bakabuzya Dariyo kuti: ‘O mwaami, kweelede kubikkwa mulawu wakuti muntu woonse kakomba kulinduwe luzutu. Kufumbwa muntu utatobelezyi mulawu ooyu, weelede kuwaalwa mudindi lyabalavu.’ Dariyo wakawubotelelwa muzeezo ooyo alimwi wakasayina mulawu.

Daniyele naakamvwa atala amulawu ooyu mupya, wakayinka kung’anda yakwe. Wakafugama kalangide kuwindo lyang’anda yakwe lyakajulidwe mpawo wakakomba kuli Jehova. Chakufwambaana, baalumi aabo bakali kumuchitila munyono bakanjila mung’anda yakwe, mpawo bakajana ulikukomba. Bakachijaana akuyoobuzya Dariyo kuti: ‘Daniyele takulemeki pe. Uchikomba kuli Leza wakwe tutatu abuzuba.’ Dariyo wakali kumuyanda Daniyele alimwi taakali kuyanda pe kuti afwe. Buzuba boonse wakali kuyeeya mbaakali kukonzya kuvuna Daniyele. Nikuba Mwaami taakali kukonzya pe kuchincha mulawu ngwaakasayina. Wakeelede kulayilila baalumi bakwe kuti bawaale Daniyele mudindi lyabalavu bayoosya.

Busiku oobo, Dariyo wakakataazikana loko atala aDaniyele, zyakuti wakakachilwa koona. Nibwakacha kuseeni, wakafwambaana kuya kudindi lyabalavu mpawo wakiita Daniyele kati: ‘Leza wako wakuvuna na?’

Dariyo wakamvwa jwi lyamuntu. Wakali Daniyele! Wakabuzya Dariyo kuti: ‘Mungelo waJehova wajala milomo yabalavu. Taakwe nibandiluma nikuba kundikwamba.’ Dariyo wakabotelwa loko! Wakalayilila kuti Daniyele agwisigwe mudindi lyabalavu. Balavu taakwe nibakamuchisa pe Daniyele. Mpawo mwaami wakalayilila kuti: ‘Amubawaalile mudindi lyabalavu baalumi aabo bali kuyanda kuti Daniyele afwe.’ Baalumi aabo nibakawaalwa mudindi, balavu bakabaluma chakufwambaana.

Dariyo wakalayilila bantu kuti: ‘Bantu boonse beelede kulemeka Leza waDaniyele. Nkaambo nguwe wakavuna Daniyele kuti atalumwi balavu.’

Ulakomba na kuli Jehova mazuba oonse mbuli kwakachita Daniyele?