Miduli Yamuunzi waJerusalemu

Muchiindi chaEzra, kwakali muIsrayeli wakali kutegwa Nehemiya wakali kubelekela Mwaami Aritasasta. Wakali kukkala kuPersiya mumuunzi waShushani. Umwi mweenzinyina wakazwa kuJerusalemu, wakamubuzya mulumbe utabotezyi wakuti: ‘Bantu bakabweeda kuJerusalemu bali mumapenzi. Miduli amagedi amuunzi zyakanyonyoonwa abantu bakuBbabbiloni tazinayakululwa.’ Nehemiya wakawusa. Wakayeeya kuti ayinke kuJerusalemu kuti akagwasilizye, nkinkaako wakakombela kuti mwaami amuzumizye kwiinka.

Nikwakaba chiindi, mwaami wakabona Nehemiya kawuside. Wakati: ‘Nkamboonzi nuuside? Niinzi chilikukukataazya?’ Nehemiya wakati: ‘Tandeelede kuusa na mbukunga muunzi waJerusalemu wakanyonyoonwa uchimwayikide?’ Mwaami wakabuzya kuti: ‘Niinzi nchuyanda kuti ndikuchitile?’ Mpawo, Nehemiya wakakomba chuumunizi. Mpawo wakati: ‘Ndikumbila kuti undizumizye kwiinka kuJerusalemu kuti nkayakulule miduli yamuunzi.’ Mpawo, Mwaami Aritasasta wakazumizya Nehemiya kuti ayinke alimwi wakachita mabambe akuti akwabilile Nehemiya mulweendo oolo lulamfu. Alubo, wakapa kuti Nehemiya abe mweendelezi waJuda alimwi wakamupa masamu akupanga milyango yamuunzi.

Nehemiya naakasika kuJerusalemu, wakalanga-langa miduli yamuunzi. Wakabungania bapayizi abaami mpawo wakati: ‘Amubone mapenzi ngitujisi. Tweelede kutalika kuyaka.’ Bantu bakazumina alimwi bakatalika kuyaka miduli.

Pesi basinkondonyina bakasanguna kubaseka akwaamba kuti: ‘Naba mwaaba ulakonzya kuumwaya muduli ngumulikuyaka.’ Bakali kubeleka, teebakaswiilizya zyakali kwaamba basinkondonyina pesi bakiinkilila kunembo kabayaka. Miduli yakalampa alimwi yakalisimide.

Basinkondonyina bakabelesya nzila zisiyene-siyene alimwi bakali kuyanda kunjila mumuunzi waJerusalemu bantu kabaliibide. MaJuda bakayoowa nibakamvwa atala azyakali kuyanda kuchitwa abasinkondonyina. Pesi Nehemiya wakabuzya bantu kuti: ‘Mutayoowi pe. Jehova uyootugwasya.’ Wakabikka balindi kuti bakwabilile basikuyaka alimwi eezi zyakapa kuti basinkondonyina bakachilwe kubalwana.

Miduli amagedi zyakamana kuyakwa mumazuba aali 52. Nehemiya wakayita maLevi boonse kuJerusalemu kuti bazoosekelele pobwe lyakuti kuyaka kwakamana. Wakababikka mutubunga tubili twabasikwiimba. Bakatanta muduli kababelesya matantilo akali Kumulyango Wakasensa alimwi bakazyunguluka muunzi kabazwa kumabazu asiyene. Alubo bakalizya myeembo, nyeele atuntimbwa alimwi bakiimbila Jehova. Ezra wakiinka akamwi kabunga mpawo Nehemiya wakiinka akamwi kabunga alimwi boonse bakaswaanana kutempele. Bantu boonse baalumi, banakazi abana bakatuula zipayizyo kuli Jehova alimwi bakasekelela pobwe. Kwiimba nkubakachita kwakali kumvwika kumasena akali kule.