Gabriyeli Wakaswaya Mariya

Elizabbeti wakali abbululu wakali kutegwa Mariya, wakali kukkala kuNazareta mumuunzi wakuGalilaya. Mariya wakatangidwe kuli Josefa mubezi. Elizabbeti naakali amyeezi iili musanu awumwi kamitide, mungelo Gabriyeli wakaswaya Mariya. Wakati: ‘Wapona Mariya, Jehova uli anduwe.’ Mariya taakamvwisisisya kuti Gabriyeli wakali kwaambaanzi. Gabriyeli wakati: ‘Uzoominta alimwi uzootumbuka mwana mulombe, weelede kumuuzika kuti nguJesu. Uyooba Mwaami. Bwaami bwakwe tabukamani.’

Mariya wakati: ‘Ziyoochitika biyeni kuti ndibe amwana nkaambo tandimuzi pe mwaalumi?’ Pesi Gabriyeli wakati: ‘Zintu zyoonse zilakonzeka kuli Jehova. Muuya uusalala uzooza kuli nduwe alimwi uzooba amwana. Bbululu wako Elizabbeti muchembele alakwe ulimitide.’ Mariya wakati: ‘Ndili mubelesi waJehova akube kulindime mbuli kwaamba kwako.’

Mariya wakaswaya Elizabbeti wakali kukkala kumuunzi uuli mutulundu. Mariya naakamujuzya, Elizabbeti wakamvwa mwana wakali mwida lyakwe kali kuputuuka. Wakazula muuya uusalala mpawo wakati: ‘Mariya, Jehova wakulongezya. Nchilongezyo kuba abanyina baMwaami mung’anda yangu.’ Mariya wakati: ‘Ndilemeka Jehova amoyo wangu woonse.’ Mariya wakakkala aElizabbeti kwamyeezi itatu mpawo wakazoobweda kuNazareta.

Josefa naakaziba kuti Mariya ulaada, wakayeeya kumuleka. Pesi wakabona mungelo muchiloto wakamubuzya kuti: ‘Utayoowi kumukwata. Nkaambo taakwe chibi nchaakachita.’ Kuzwa waawo, Josefa wakakwata Mariya akumweeta kung’anda yakwe.