Jesu Wakalibonia Kubazubi Banswi

Nikwakiinda chiindi Jesu kabonekede kubaapostolo, Petro wakayeeya kuyoozuba baswi kuLwizi lwakuGalilaya. Petro wakiinka aTomasi, Jakkobo, Johane abamwi basikwiiya. Bakazuba busiku boonse pesi taakwe nchibakacha.

Kuseni loko, bakabona muntu wakiimvwi kunkomwe yalwizi. Wakabiita kali kunkomwe yalwizi mpawo wakati: ‘Kuli baswi mbimwacha na?’ Bakati: ‘Peepe!’ Mpawo muntu ooyo wakati: “Amuwaale lusabwe kululyo lwabwaato.” Nibakachita oobo, lunsabwe lwakazula baswi zyakuti bakakachilwa kulukwela. Johane wakaziba kuti muntu ooyo wakali Jesu, nkinkaako wakati: ‘NguMwaami!’ Chakufwambaana, Petro wakaliwaalila mumaanzi wayamba kaya kunkomwe. Pesi bamwi basikwiiya bakatobela abwaato.

Nibakazwa mumaanzi, bakajana chinkwa abaswi bakali kuyokwa. Jesu wakababuzya kuti beete bamwi baswi bakuyungizya. Mpawo Jesu wakati: ‘Amuze muzoolye.’

Nibakamaninsya kulya, Jesu wakabuzya Petro kuti: ‘Ulandiyanda na kwiinda kuzuba baswi?’ Petro wakati: ‘Iiyi Mwaami, ulizizi eezyo.’ Jesu wakati: ‘Sanina tubelele twangu.’ Jesu wakamubuzya lubo kuti: ‘Petro, ulandiyanda na?’ Petro wakati: ‘Mwaami, ulizi kuti ndilakuyanda.’ Jesu wakati: “Embela mbelele zyangu.” Mpawo Jesu wakabuzya Petro kachitatu. Petro wakawusa. Petro wakati: ‘Mwaami ulizi zyoonse. Ulizi kuti ndilakuyanda.’ Jesu wakati: “Sanina mbelele zyangu.” Mpawo wakabuzya Petro kuti: ‘Nditobele.’