Basikwiiya Bakatambula Muuya Uusalala

Nikwakiinda mazuba aali 10, Jesu naakabweeda kujulu, basikwiiya bakwe bakatambula muuya uusalala. Kwakali muPentekkoste lya33 C.E., alimwi bantu bazwa kumasena aasiyene-siyene bakaza kuJerusalemu kuzoosekelela pobwe. Kwakali basikwiiya baJesu bali 120 bakabungene mung’anda yamujulu. Mpawo kwakachitika chintu chigambya. Basikwiiya boonse bakakkalwa atumwi tuntu tuli mbuli mulilo amitwe alimwi bakasaanguna kwaambuula mumilaka isiyene-siyene. Kwakamvwigwa kuunga kwaguwo pati mung’anda.

Beenzu bakazide kuJerusalemu nibakamvwa guwo eeli, bakachijaana kabanjila mung’anda kuti babone zyakali kuchitika. Bakagamba nibakamvwa basikwiiya kabaambuula milaka yabo. Mpawo bakati: ‘Bantu aaba bazwa kuGalilaya. Zichitika biyeni kuti bakonzye kwaambuula milaka yesu?’

Mpawo Petro abamwi baapostolo bakayima kunembo lyabantu. Petro wakapandulwida bantu Jesu mbaakajayigwa akuti Jehova wakamubusya kuzwa kubafu. Petro wakati: ‘Lino Jesu ulikujulu kujanza lyaLeza lyalulyo alubo watupa muuya uusalala ngwakasyomezya. Nzizyo zyapa kuti mukonzye kubona akumvwa malele aaya.’

Bantu bakaamvwisisisya majwi aPetro mpawo bakabuzya kuti: “Ino tucite buti?” Petro wakababuzya kuti: ‘Amusanduke kuzibi zyanu mubbabbatizigwe muzina lyaJesu. Alubo, muyootambula chipego chamuuya uusalala.’ Mubuzuba oobo, kwakabbabbatizigwa bantu bali 3 000. Kuzwa waawo, basikwiiya bakatalika kuvula muJerusalemu. Baapostolo bakabumba mbungano zyiingi kwiinda mukugwasigwa amuuya uusalala alimwi bakayiisya basikwiiya zintu zyoonse Jesu nzyakababuzizye.