Lugwalo Luzwa kuKabunga Keendelezya

Bazyalwama Bayandwa:

Mbutuli bakombi baJehova, tulaliyanda Jwi lyakwe Bbayibbele. Tulaachoonzyo chakuti litubuzya makani achoonzyo, lilatusololela mubuumi akututondeezya bumboni bukkazika moyo butondeezya kuti Jehova ulatuyanda. (Intembauzyo 119:105; Luka 1:3; 1 Johane 4:19) Tuli achiyandisyo chakugwasya bamwi kuti bayiye kasimpe kayandikana kazwa muJwi lyaLeza. Nkinkaako, tulabotelwa kupupulula bbuku liti, “Zyiiyo Zizwa muBbayibbele.” Atulange-lange zili mukati.

Bbuku eeli lyakabambilwa bana. Nikuba boobo, lilakonzya kubelesegwa abantu bapati kuti bayiye zyiingi zizwa muBbayibbele. Alubo, toonse tuyoogwasikana mukwiiya zyiiyo zizwa muBbayibbele zitugwasya kuti tukkale katubotelwa mbukunga Bbayibbele ndibbuku lyabantu boonse.

Bbuku eeli lisanguna kwaambuula atala akulengwa kwabantu bakusaanguna kaziya kunembo, kalipandulula zyakachitika muBbayibbele. Makani aamuBbayibbele aali mubbuku eeli, alembedwe munzila nguba, iimvwisisika alimwi atobelana mbuli mbuzyakachitika zintu muBbayibbele.

Nikuba boobo, bbuku eeli talyaambi makani aali muBbayibbele luzutu. Makani azifanikisyo zili mubbuku eeli zyakabambwa munzila iipa kuti makani aali muBbayibbele amvwisisike akuti uzibe mbubakalimvwa aabo baambidwe.

Bbuku eeli litugwasya kubona kuti Bbayibbele lyaambuula atala abantu bakaswiilila Jehova abatakamuswiilila. Alubo litugwasya kuti twiiye kuzwa kuzintu nzibakachita. (BaRoma 15:4; 1 BaKorinto 10:6) Bbuku eeli lilaazipaanzi zili 14. Kumatalikilo achipaanzi chimwi achimwi, kuli chifwiinsyo chili azyiiyo nzitukonzya kwiiya.

Ikuti kuli muzyali, ulakonzya kubala chiiyo amwanaako mpawo mwaambuuzyanie atala azifanikisyo zili muchiiyo. Mpawo, mulakonzya kubala magwalo aayendelana azintu zyakachitika muchiiyo eecho. Gwasya mwanaako abone kuti nzyabala muBbayibbele zyeendelana biyeni achiiyo nchimulikwiiya. Ulakonzya kubelesya nzila eeyi chiindi nwiiya amuntu mupati kuchitila kuti umugwasye kumvwisisisya makani amuBbayibbele.

Tusyoma kuti bbuku eeli liyoogwasya bapati abaniini bali amyoyo ibombede kuti babelesye nzibayiya muBbayibbele mubuumi bwabo. Eezi ziyoopa kuti bakombe Jehova kabali mumpuli yakwe njayandisya.