CHAANDAANO 15
Botelwa Amulimu Ngubeleka
‘Muntu . . . akondwe mumilimu yakwe yoonse.’—MUKAMBAUSI 3:13.
1-3. (a) Bantu biingi balimvwa biyeni atala amilimu njibabeleka? (b) Njiili mibuzyo iyoosandulwa muchaandaano eechi?
BANTU munyika yoonse babeleka changuzu kuti basanine mpuli zyabo. Bantu biingi tabiiyandi pe milimu njibabeleka alubo bamwi balimvwa kabatayandi kuya kumulimu buzuba abuzuba. Kuti kulimvwa oobo, kujana wachita biyeni kuti uyande mulimu ngubeleka? Kujana wachita biyeni kuti ubotelwe amulimu ngubeleka?
2 Bbayibbele litubuzya kuti: “Cipo ca-Leza nceeci: kuti muntu alye akunywa akukondwa mumilimo yakwe yoonse.” (Mukambausi 3:13) Jehova wakatulenga katuli achiyandisyo chakubeleka. Uyanda kuti katubotelwa amulimu ngutubeleka.—Bala Mukambausi 2:24; 5:18.
3 Niinzi chiyootugwasya kuti tubotelwe amilimu njitubeleka? Njiili milimu maKristu njibeelede kutantamuka? Kujana twachita biyeni kuti mulimu ngutubeleka utanyonganyi bukombi bwesu? Alubo nguuli mulimu uuyandikana ngutweelede kuchita?
BASIMILIMU BABILI BAPATI
4, 5. Jehova ulimvwa biyeni atala amulimu ngwachita?
4 Jehova ulakuyanda kubeleka. Lugwalo lwaMatalikilo 1:1 lwaamba kuti: “Kumatalikilo Leza wakalenga ijulu anyika.” Leza naakamana kulenga nyika azyoonse zili mulinjiyo, Bbayibbele lyaamba kuti Leza wakati “zyabota loko.” (Matalikilo 1:31) Mulengi wesu wakabotelwa azintu nzyaakalenga.—1 Timoteo 1:11, NW.
5 Jehova uchibeleka nikuba mazubaano. Jesu wakati: ‘Taata uchibeleka ambuli sunu.’ (Johane 5:17) Nikuba kuti kuli zimwi zintu zibotu Jehova nzyalikuchita nzitutazi pesi kuli zimwi nzituzi. Wali kusala bantu batakeendelezye antoomwe aMwanaakwe, Jesu, muBwaami bwakwe. (2 BaKorinto 5:17) Alubo Jehova ulikuzulwida bantu akubalangania mubukombi. Muchikozyano, mulimu wakukambawuka ulikugwasya bantu biingi kuti babe abulangilizi bwakuyoopona kukabe kutamani munyika yaparadayizi.—Johane 6:44; BaRoma 6:23.
6, 7. Jesu ulimvwa biyeni atala amulimu ngwachita?
6 Jesu alakwe ulakuyanda kubeleka mbuuli Wisi. Katanaza anyika, wakali ‘mubelesi ulaaluzibo’ alubo wakabelekaamwi aWisi mukulenga zintu zyoonse zilikujulu aanyika. (Tusimpi 8:22-31; BaKolose 1:15-17) Naakali aanyika, Jesu wakiinkilila kunembo kali kubeleka changuzu. Kuzwa kachili mulombe wakiiya kubeza, eezi zyakali kuswaanizya kuyaka maanda akubeza zintu zisiyene-siyene. Jesu wakazwidilila loko mukuchita mulimu ooyu zyakuti bantu bakamwaamba kuti “mubezi.”—Marko 6:3.
7 Nikuba boobo, mulimu mupati Jesu ngwaakali kuchita wakali wakukambawuka makani mabotu akuyiisya bantu atala aJehova. Mulimu ooyu wakeelede kuuchita muminyaka iitatu achisela, alubo wakali kubeleka kuzwa kuseeni kusikila mansiku. (Luka 21:37, 38; Johane 3:2) Jesu wakali kweenda misinzo milamfu mumigwagwa yakali aalusuko kutegwa akonzye kukambawukila bantu biingi.—Luka 8:1.
8, 9. Niinzi chakapa kuti Jesu kabotelwa amulimu ngwaakali kuchita?
8 Kuchita mulimu waLeza kuli Jesu kwakali mbuuli chakulya. Mulimu ooyu wakali kumupa manguzu. Chimwi chiindi, Jesu wakali kubeleka changuzu zyakuti wakali kubula chiindi chakuti alye. (Johane 4:31-38) Kufumbwa mpaakali kujana chiindi, wakali kuyiisya bamwi atala aJehova. Eezi zyakamupa kwaamba kuti: “Ndakakulemya ansi, ndazyulizya mulimo oyo ngookandipa kuti nkuucite.”—Johane 17:4.
9 Eezi zitondeezya kuti Jehova aJesu babeleka changuzu alubo balabotelwa amilimu njibachita. Tuyanda kuba “basikwiiya ba-Leza” alubo tuyanda ‘kwiitobelesesya mikondo’ yaJesu. (BaEfeso 5:1; 1 Petro 2:21) Zikozyano zyabo zitusungwaazya kuti tubeleke changuzu mumilimu njituchita.
ULI AMABONENO AALIBIYENI ATALA AMULIMU?
10, 11. Niinzi chikonzya kutugwasya kuti tube amaboneno aalikabotu atala amulimu ngutubeleka?
10 Mbutuli bakombi baJehova, tubeleka changuzu kuti tusanine mpuli zyesu. Tuyanda kuti katubotelwa amilimu njitubeleka pesi chimwi chiindi teekuuba pe. Kuti kutabotelwi amulimu ngubeleka, weelede kuchita biyeni?
Kuba amaboneno aalikabotu kupa kuti tubotelwe amulimu ngutubeleka
11 Ba amaboneno aalikabotu. Nikuba kuti tatukonzyi kuchincha mulimu ngutubeleka achiindi nchitumanina kumulimu pesi tulakonzya kuchincha maboneno eesu. Kuziba mukuli ngwatupede Jehova kuyootugwasya. Muchikozyano, Jehova ulangilila kuti silutwe wampuli abeleke changuzu kuti asanine mpuli yakwe. Bbayibbele lyaamba kuti muntu utayandi kusanina mpuli yakwe ‘mubi kwiinda uutasyomi.’ (1 Timoteo 5:8) Kuti kuli silutwe wampuli, weelede kubeleka changuzu kuti usanine mpuli yako. Kufumbwa kuti ulawuyanda naakuti tuuyandi mulimu ngubeleka pesi ulizi kuti kusanina mpuli yako kupa kuti Jehova abotelwe.
12. Kubeleka changuzu akusyomeka kutugwasya biyeni?
12 Beleka changuzu usyomeke. Kuchita oobu kulakonzya kukugwasya kuti ubotelwe amulimu ngubeleka. (Tusimpi 12:24; 22:29) Kulakonzya kupa kuti muntu ngubelekela akusyome. Basikubelekelwa balabayanda bantu basyomeka nkaambo balizi kuti tababbi mali, tabachiji kumulimu akubweza zimwi zintu zyakumulimu. (BaEfeso 4:28) Jehova ulabona chiindi nitubeleka changuzu anitutondeezya kusyomeka. Kuziba kuti ulikuchita zintu zibotu mumeso aJehova, kuyoopa kuti ube ‘amanjezeezya aalikabotu.’—BaHebrayo 13:18; BaKolose 3:22-24.
13. Niinzi chikonzya kuchitika kuti twasyomeka kumulimu?
13 Maponeno aako kumulimu alakonzya kupa kuti Jehova alemekwe. Aaka nkaamwi kaambo kapa kuti tubotelwe amulimu ngutubeleka. (Tito 2:9, 10) Alubo kuchita oobo kulakonzya kupa kuti bantu mbubelekaabo bayande kwiiya Bbayibbele.—Bala Tusimpi 27:11; 1 Petro 2:12.
NDEELEDE KUSALA MULIMU UULI BIYENI?
14-16. Niinzi nzitweelede kubikkila maanu nitusala mulimu?
14 Bbayibbele talibikkilide maKristu mulongo wamilimu njibeelede anjibateelede kubeleka. Pesi lili amalayilile aakonzya kutugwasya kuti tusale milimu yeendelana anzitusyoma. (Tusimpi 2:6) Kubelesya njiisyo zyamuBbayibbele kuyoopa kuti tulibuzye mibuzyo iitobela.
Yanduula mulimu weendelana azyeelelo zyaJehova
15 Kubeleka mulimu ooyu kuyoopa kuti ndichite zintu zitayandwi aJehova na? Twakayiya atala amichito Jehova njatayandi iili mbuuli kubba akubeja. (Kulonga 20:4; Incito 15:29; BaEfeso 4:28; Ciyubunuzyo 21:8) Eezi zyaamba kuti tatweelede kusala milimu iiteendelani azyeelelo zyaJehova.—Bala 1 Johane 5:3.
16 Mulimu ooyu usumpula michito iitayandwi aJehova na? Muchikozyano, kujana wachita biyeni kuti wajana mulimu wakutambula bantu basika aakkilinika igwisya bantu mala? Teechibi pe kutambula bantu basika. Pesi ulizi kuti Jehova ukubona biyeni kugwisya da. Nikuba kuti teenduwe uugwisya bantu mala, ubonaanga Jehova talookupa mulandu na akaambo kakubeleka mulimu uusumpula michito njatayandi?—Kulonga 21:22-24.
17. Niinzi chikonzya kutugwasya kuti tusale milimu iitambulika kuli Leza?
17 Lugwalo lwaBaHebrayo 5:14, lutondeezya kuti kubelesya malayilile aazwa kuli Leza kuyoopa kuti tube bantu bali “amiyeeyo iyakaiisigwa kusala cibotu ecibi.” Libuzye kuti: ‘Bamwi bayoomvwa biyeni kuti ndabeleka mulimu ooyu? Kubeleka mulimu ooyu kuyoopa kuti nditajani chiindi chakukkala ampuli yangu na naakuti ndikabelekele kuli chimwi chisi? Ziyoopa kuti balimvwe biyeni?’
‘AMUSALE ZINTU ZIINDA KUBOTA’
18. Nkamboonzi nikukonzya kutuyumina kubikka kukomba Jehova mubusena bwakusaanguna?
18 Kulakonzya kutuyumina kubikka kukomba Jehova mubusena bwakusaanguna nkaambo tupona ‘kuziindi zikataazya.’ (2 Timoteo 3:1) Mazubaano, teekuuba pe kujana mulimu. Nikuba kuti tweelede kulangania mpuli zyesu pesi tweelede kubikka bukombi mubusena bwakusaanguna. Tatweelede kuzumizya zintu zyakumubili kuti zibe nzizyo ziyandikana loko mubuumi bwesu. (1 Timoteo 6:9, 10) Kujana twachita biyeni kuti kusanina mpuli kutanyonganyi ‘mbutusala zintu ziinda kubota’?—BaFilipi 1:10.
19. Kusyoma Jehova kuyoopa kuti tulimvwe biyeni atala amilimu njitubeleka?
19 Syoma Jehova amoyo woonse. (Bala Tusimpi 3:5, 6.) Tulizi kuti Leza ulizizi nzituyandikana akuti ulaandaba andiswe. (Intembauzyo 37:25; 1 Petro 5:7) Bbayibbele lyaamba kuti: “Buumi bwanu butabi bwakuyanda mali, pe, mutabi basyaacivulemwangu, nkaambo Leza wakati, Nsikwe nenti kamulekelezye nokuba kuyoomuleka buyo pe, pe.” (BaHebrayo 13:5) Jehova tayandi kuti tukkale katukataazikana atala akulangania mpuli zyesu. Chiindi choonse, bakombi bakwe ulabapa zintu nzibayandikana mubuumi. (Matayo 6:25-32) Tatweelede kuzumizya milimu njitubeleka kuti itukachizye kubala Jwi lyaLeza, kukambawuka makani mabotu akunjila miswaangano yachiKristu.—Matayo 24:14; BaHebrayo 10:24, 25.
20. Kajana twabuubya biyeni buumi bwesu?
20 Pona buumi buuba. (Bala Matayo 6:22,23.) Kupona buumi buuba kuyookugwasya kuti ubikke kukomba Jehova mubusena bwakusaanguna. Tulizi kuti mbufuba-fuba kuyandisya mali akubikkila maanu kukubelesya minchina yamazubaano kwiinda kukomba Jehova. Niinzi chikonzya kutugwasya kuti tupone buumi buuba? Tatweelede kuba azikwelete. Kuti kulaazikwelete, beleka changuzu kuti uzibbadale naakuti uzichesye. Kuti twabikkila maanu kuzintu zyakumubili, tulakozya kubula chiindi chakukomba, kubala Bbayibbele achakukambawuka. Tatweelede kuzumizya kuyanda zintu zyakumubili kuti kutukachizye kukomba Leza pesi tweelede kukkutisikana azintu ziyandikana zili mbuuli “cakulya acakulivumba.” (1 Timoteo 6:8) Toonse tweelede kulilanga-langa kuti tubone mbutukonzya kubelekela Jehova chakumaninina.
21. Nkamboonzi nitweelede kuziba zintu ziyandikana mubuumi bwesu?
21 Ziba zintu ziyandikana. Tuyanda kubelesya chiindi chesu, manguzu azintu zyakumubili munzila iilikabotu. Kuti teetwachenjela, zintu zili mbuuli lwiiyo akuyandisya mali zilakonzya kutumanina chiindi. Jesu wakati: “Amusaangune kuyandaula Bwami bwa-Leza.” (Matayo 6:33) Nzitusala, nzituyandisya, anzitupeekezya zitondeezya zintu nzitubikka mubusena bwakusaanguna mubuumi.
MULIMU UUYANDIKANA NGUTWEELEDE KUCHITA
22, 23. (a) Nguuli mulimu uuyandikana ngutweelede kuchita? (b) Niinzi chiyootugwasya kuti tubotelwe amulimu ngutubeleka?
22 Mulimu uuyandikana ngutweelede kuchita ngwakubelekela Jehova akukambawuka makani mabotu. (Matayo 24:14; 28:19, 20) Mbuuli Jesu, tuyanda kubeleka changuzu mumulimu ooyu. Bamwi bakasala kuyookambawukila kubusena kuyanda basikugwasilizya. Bamwi bayiya mulaka utali wabo kuti bakonzye kukambawukila bantu baambuula mulaka ooyo. Ulakonzya kwaambuula abamwi bakazwidilila kuzichita kuti umvwe zyakabagwasya kuti bazwidilile. Bayookubuzya mbubalikubotelwa mubuumi akuti balikupona buumi bulaampindu.—Bala Tusimpi 10:22.
Kubelekela Jehova ngumulimu uuyandikana ngutweelede kuchita
23 Mazubaano, bantu biingi bamana chiindi chiingi kumilimu alubo bamwi babeleka milimu miingi kuti bakonzye kusanina mpuli zyabo. Jehova ulazibona alubo kulamubotezya kubona mbutubeleka changuzu kuti tusanine mpuli zyesu. Kufumbwa mulimu ngutubeleka, toonse atuzumanane kutobelezya Jehova aJesu kwiinda mukubeleka changuzu. Alubo tutalubi kuti, mulimu uuyandikana ngutweelede kuchita ngwakubelekela Jehova akukambawuka makani mabotu aali atala aBwaami bwaLeza. Kuti twachita oobo, tuyoobotelwa mubuumi.