Amumukazye Saatani

1, 2. Niinzi nzitweelede kuziba atala aSaatani amadimoni aakwe?

BUUMI munyika mpya bunoobotezya. Bantu bayoopona kweendelana amakanze aLeza akumatalikilo. Pesi lino tulikupona munyika yeendelezegwa aSaatani amadimoni aakwe. (2 BaKorinto 4:4) Nikuba kuti tatukonzyi kubabona pesi mpubali alubo bali amanguzu kwiinda ndiswe.

² Muchaandaano eechi, tuyooyiya mbutukonzya kuswena kuli Jehova ambutukonzya kulikwabilila kuli Saatani. Jehova usyomezya kuti unootugwasya pesi tweelede kuziba nzila Saatani amadimoni aakwe nzibabelesya kuti batweene.

“MBULI SYUUMBWA WABUTAMBO”

3. Niinzi Saatani nzyayanda kubakombi baJehova?

³ Saatani waamba kuti bantu bakomba Jehova nkaambo Jehova ubapa zimwi zintu pesi kuti baba mumapenzi balaleka kumukomba. (Bala Jobu 2:4, 5.) Chiindi muntu natalika kwiiya atala aJehova, Saatani amadimoni aakwe balazibona alubo baleezya kumukasya. Tababotelwi pe chiindi muntu nalipeda kuli Jehova akubbabbatizigwa. Bbayibbele litondeezya kuti Saatani uli mbuuli ‘syuumbwa wabutambo uuyanduula ngwatalume.’ (1 Petro 5:8) Saatani uyanda kumana bweenzuma mbutuli aabo aJehova.—Intembauzyo 7:1, 2; 2 Timoteo 3:12.

4, 5. (a) Niinzi Saatani nchatakonzyi kuchita? (b) Chambaanzi ‘kukazya Saatani’?

⁴ Tatweelede kumuyoowa pe Saatani amadimoni aakwe nkaambo Jehova ulaamanguzu kwiinda mbabo. Jehova usyomezya maKristu bakasimpe bapanga “inkamu impati” kuti bayoofutuka “kumapenzi ayo mapati” aali kunembo. (Ciyubunuzyo 7:9, 14) Saatani takonzyi kupa kuti eezi zitakachitiki nkaambo Jehova uyoobakwabilila bakombi bakwe.

⁵ Saatani takabumani pe bweenzuma mbutuli aabo aJehova kuti twaswena afwiifwi aLeza. Bbayibbele lyaamba kuti: “Jehova uli anywe na muli awe.” (2 Makani 15:2; bala 1 BaKorinto 10:13.) Bakombi baJehova bachiindi baswaanizya Abbelo, Enokki, Nowa, Sara aMusa bakamukazya Saatani kwiinda mukuswena afwiifwi aJehova. (BaHebrayo 11:4-40) Andiswe tulakonzya kuzwidilila mbuuli mbabo, nkaambo Jwi lyaLeza lyaamba kuti: “Amumukazye Saatani, uyoomucija.”—Jakobo 4:7.

“TULALWANA AMYUUYA”

6. Saatani utulwana biyeni?

⁶ Nikuba kuti Saatani ulizi kuti takonzyi kutunyonyoona chakumaninina pesi uleezya kunyongania bweenzuma mbutuli aabo aJehova. Mazubaano Saatani ubelesya nzila zisiyene-siyene alubo ubelesya nzila nzyaakali kubelesya kuzwa chiindi. Nziizili nzila eezi?

7. Nkamboonzi Saatani neena bakombi baJehova?

⁷ Mwaapostolo Johane wakalemba kuti: ‘Nyika yoonse iikkede mumaanza aamubi.’ (1 Johane 5:19) Saatani nguwe uulikweendelezya nyika eeyi alubo uyanda kweendelezya bakombi baJehova. (Mika 4:1; Johane 15:19; Ciyubunuzyo 12:12, 17) Saatani ulikubeleka changuzu kuti atweene kuti tutasyomeki kuli Leza nkaambo ulizi kuti wasyaalilwa achiindi chifwiifwi. Chimwi chiindi Saatani ubelesya nzila zili antanganana kuti atulwane pesi chimwi chiindi ubelesya nzila zitaboneki.

8. MuKristu umwi awumwi weelede kuzibaanzi?

⁸ Lugwalo lwaBaEfeso 6:12, lwaamba kuti: “Tulalwana amyuuya yabubi iili mumyeenya yakujulu.” MuKristu umwi awumwi ulwana aSaatani amadimoni aakwe. Tweelede kuziba kuti boonse bakalipeda kuli Jehova bakanjila munkondo eeyi. Alubo mulugwalo ndwaakalembela maKristu bakuEfeso, mwaapostolo Pawulu wakabasungwaazya tutatu kuti ‘bayime nji.’—BaEfeso 6:11, 13, 14.

9. Saatani amadimoni aakwe bachita biyeni kuti batweene?

⁹ Saatani amadimoni aakwe babelesya nzila zisiyene-siyene zyakutweena. Kuzunda sunko limwi lizwa kuli Saatani tazyaambi kuti tunoowazunda woonse. Saatani ulangisisya zintu nzitutachiti kabotu kuti atujate. Pesi tatweelede kuzumizya kuti Saatani atujate nkaambo Bbayibbele lilatubuzya tukole ntwabelesya. (2 BaKorinto 2:11; langa Makani Aakumamanino 31.) Kamwi kakole nkabelesya nchidimoni.

TANTAMUKA ZINTU ZYACHIDIMONI

10. (a) Chidimoni chiswaanizyaanzi? (b) Jehova ukubona biyeni kuchita zyachidimoni?

¹⁰ Chidimoni chiswaanizya kusonda, bulozi, kuwaala ziposo akubuzya makani kubantu bakafwa. Bbayibbele litubuzya kuti zintu zyachidimoni “ncisesemyo” akuti bukombi bwesu tabukonzyi kutambulika kuli Jehova kuti katuzichita. (Deuteronomo 18:10-12; Ciyubunuzyo 21:8) Nkinkaako, maKristu beelede kutantamuka zintu zyoonse zilaachakuchita achidimoni.—BaRoma 12:9.

11. Niinzi chikonzya kuchitika kuti twayandisya zintu zyamasalamusi?

¹¹ Saatani ulizi kuti ulakonzya kutujata chakufwambaana kuti twayandisya zintu zyamasalamusi. Kuyandisya michito yachidimoni kunyongania bweenzuma mbutulaabo aJehova.

SAATANI ULEEZYA KUTWEENA

12. Saatani wiinyongania biyeni nzila bantu njibayeeyaayo?

¹² Saatani ulikunyongania nzila bantu njibayeeyaayo. Upa kuti bantu batabi aachoonzyo akuti bayeeye kuti “bubotu mbubi, bubi mbubotu.” (Isaya 5:20) Saatani uyanda kuti tusyome kuti malayilile aamuBbayibbele taagwasyi pe alubo uyanda kuti tuyeeye kuti tulakonzya kubotelwa kuti katutaatobelezyi.

13. Saatani wakeezya biyeni kuti bantu batabi aachoonzyo?

¹³ Saatani ulikuzwidilila kwiinda mukubelesya kakole kakupa kuti bantu batabi aachoonzyo. Wali kukabelesya kuzwa chiindi. Chiindi naakali kwaambuula aEva mumuunda waEdeni, Saatani wakapa kuti mukayintu atabi aachoonzyo kwiinda mukubuzya kuti: “Sa ncobeni Leza wakaamba kuti, Tamweelede kulya misamu yoonse yamumuunda?” (Matalikilo 3:1) Muchiindi chaJobu, Saatani wakabuzya Jehova bangelo kabamvwide kuti: “Taakwe kaambo sena Jobu nkalemekela Leza?” (Jobu 1:9) Jesu naakazwa akubbabbatizigwa, Saatani wakamusunka kati: “Kuti koli Mwana a-Leza, ambila mabwe aya, abe insima.”—Matayo 4:3.

14. Saatani uchita biyeni kuti bantu bayeeye kuti zintu zyachidimoni zilikabotu?

¹⁴ Nikuba mazubaano Saatani tanaleka pe kweena bantu kwiinda mukubapa kuti batabi aachoonzyo. Upa kuti bantu batabi aachoonzyo kuti zintu zyachidimoni nzibi kwiinda mukuchita kuti zibonekaanga zilikabotu. Nikuba maKristu bamwi balakonzya kutazibona kuti nzibi. (2 BaKorinto 11:3) Kujana twachita biyeni kuti tutaziboni oobo andiswe? Kujana twachita biyeni kuti tutajatwi mutukole twaSaatani? Atulange-lange mbazu zibili Saatani mwakonzya kutweena: zyakulikondelezya azyabusilisi.

SAATANI UBELESYA ZINTU NZITUYANDISYA

15. Zyakulikondelezya zitunjizya biyeni muzintu zyachidimoni?

¹⁵ Zyakulikondelezya zyiingi mazubaano, zizwide zintu zyachidimoni. Bantu balalikondelezya azintu eezi nkaambo babonaanga zilikabotu. Muntu ulakonzya kuliswaanizya muzintu zyachidimoni kwiinda mukulanga tweengo twamumaboko, ziloto atunkuli. Dyabbulosi uchita kuti bantu babone zintu eezi kazili zintu zinoneezya naakuti balikondelezye aazyo. Alubo bantu babonaanga kweebela zintu zyachidimoni kulikabotu pesi kuzichita nkuko kutali kabotu. Nkamboonzi kuba amaboneno aali boobu nikutali kabotu?—1 BaKorinto 10:12.

16. Nkamboonzi nituteelede kulikondelezya azintu zyachidimoni?

¹⁶ Saatani amadimoni aakwe tabakonzyi kuziba nzituyeeya. Pesi balakonzya kubona nzituyeeya kwiinda muzintu nzituyanda anzitusala muli zyakulikondelezya katuli atulikke naakuti katuli mpuli. Kuti katulikondelezya amamuvi, nyimbo, amabbuku zili atala azyachidimoni, Saatani amadimoni aakwe balabona kuti tulaziyanda nzibachita. Balakonzya kweezya kupa kuti tuyande kuchita zintu zyachidimoni.—Bala BaGalatiya 6:7.

17. Kujana Saatani watujata biyeni chiindi nitwachiswa?

¹⁷ Saatani uyanda kutujata chiindi nitwachiswa. Mazubaano bantu biingi balachiswa. Muntu ulakonzya kubelesya zimwi nzila zyabusilisi pesi kataponi. (Marko 5:25, 26) Ulakonzya kumaninwa maanu zyakuti ulatambula kufumbwa nzila yabusilisi. Pesi mbutuli maKristu bakasimpe tatweelede kusala nzila zyabusilisi ziswaanizya ‘masalamusi.’—Isaya 1:13.

18. Mbusilisi buli biyeni maKristu mbubateelede kutambula?

¹⁸ Muchiindi chamaIsrayeli, bamwi bakali kuchita zintu ‘zyamasalamusi.’ Jehova wakati: “Na mwatandabika maanza aanu, njoofwinya meso aangu cakutamubona. Nekuba kuti mwakomba zikombyo zinji, nsikooyooswiilila.” (Isaya 1:15) Jehova takaaziswiilila nkombyo zyabo. Tatuyandi kuchita kufumbwa chintu chitakanyonganie bweenzuma mbutuli aabo aJehova chitakape kuti aleke kutugwasya chiindi nituli kuchiswa. (Intembauzyo 41:3) Nkinkaako, katutanatambula busilisi tweelede kulanga-langa kuti tabuswaanizyi zyachidimoni na. (Matayo 6:13) Tatweelede kutambula busilisi buswaanizya zyachidimoni.—Langa Makani Aakumamanino 32.

TWAANO TULI ATALA AZYACHIDIMONI

19. Saatani ubelesyaanzi kuti bantu bamuyoowe?

¹⁹ Bamwi bantu bayeeya kuti Saatani amadimoni aakwe tabawo pe, pesi bamwi balizi kuti mpubali akaambo kazintu zyakabachitikila. Bamwi bantu balaayoowa madimoni alubo batobelezya ziyanza zyakwaalemeka. Bamwi baamba zintu ziyoosya zichitwa amadimoni. Chiindi chiingi bantu balatuyanda twaano tuli atala amadimoni alubo bayandisya kutuzuwila bamwi. Twaano ootu tupa kuti bantu bamuyoowe Saatani.

20. Njiili imwi nzila yakugwasilizya Saatani?

²⁰ Saatani uuyanda kuti bantu bamuyoowe. (2 BaTesalonika 2:9, 10) Mubeji alubo ulizi mbakonzya kweena bantu bayandisya zintu zyachidimoni kuti basyome zintu zitali zyachoonzyo. Bantu aabo balakonzya kwaamba makani aali atala azintu nzibabonaanga bakazibona akumvwa. Bamwi bantu balayungizya azitawo chiindi nibabuzya bamwi atala amakani aaya. Tatweelede kubuzya bantu twaano twachidimoni tupa kuti bantu bamuyoowe Saatani.—Johane 8:44; 2 Timoteo 2:16.

21. Ngaali makani ngitweelede kwaamba kutali kuzuwa atala azyachidimoni?

²¹ MuKristu wakali kusyoma zyachidimoni, tayelede kwaambuula twaambo ootu kubakombinyina. Bakombi baJehova tabeelede kuyoowa zintu Saatani amadimoni aakwe nzibayoosezya bantu. Pesi tweelede kusyoma kuti Jehova wakapa Jesu manguzu. (BaHebrayo 12:2) Jesu taakwe naakali kubuzya basikwiiya bakwe amakani aali atala azyachidimoni. Pesi wakali kukambawuka atala aaBwaami ‘amilimu mipati yaLeza.’—Incito 2:11; Luka 8:1; BaRoma 1:11, 12.

22. Ulibambilide kuchitaanzi?

²² Tatweelede kuluba kuti makanze aSaatani ngakunyongania bweenzuma mbutuli aabo aJehova. Takaleki pe. Tulizizi nzila Saatani nzyabelesya alubo tulaachoonzyo chakuti tulakonzya kumukazya Saatani amadimoni aakwe. Tatweelede ‘kupa Saatani busena,’ kuchitila kuti atatunyonganyi. (Bala BaEfeso 4:27) Kuti twamukazya Dyabbulosi, tuyootuzunda tukole twakwe alubo Jehova takatulekelezyi.—BaEfeso 6:11.