Kkala Kuli Muluyando Lwaleza

1, 2. Tweelede kuchitaanzi kuti tukkale katuli muluyando lwaLeza?

TOONSE tulakuyanda kuba amibili iisimide iitakwe malwazi. Nkinkaako, tuleezya kulya chakulya chiyaka mubili, ku-ekisesayiza akulangania mibili yesu. Nikuba kuti kuchita oobo teekuuba pesi tatuleki pe. Pesi kuli imwi mbazu njitweelede kubikkila maanu kuti tusime mulinjiyo.

² Nikuba kuti twakamuziba kale Jehova pesi tweelede kukkala katuli abweenzuma busimide anguwe. Sikwiiya Juda naakasungwaazya maKristu kuti ‘bakkale kabali muluyando lwaLeza,’ wakababuzya ambubakonzya kuchita oobo. Wakati: “Amuliyake mulusyomo lwanu lusalala cakwiinda.” (Juda 20, 21) Kujana twachita biyeni kuti tube alusyomo lusimide?

KKALA KULI ALUSYOMO LUSIMIDE

3-5. (a) Saatani uyanda kuti twiibone biyeni milawu yaJehova? (b) Uyibona biyeni milawu yaJehova?

³ Weelede kuba achoonzyo kuti kutobelezya milawu yaJehova kugwasya ndiswe. Saatani uyanda kuti tuyeeye kuti milawu yaLeza miyumu akuti tulakonzya kubotelwa kuti twalisalila nzituyanda. Kuzwa chiindi, Saatani ulikupa kuti bantu basyome maboneno aaya. (Matalikilo 3:1-6) Nikuba mazubaano uchibeleka changuzu kuti bantu babe amaboneno aali boobo.

⁴ Maboneno aazwa kuli Saatani ngachoonzyo na? Milawu yaJehova miyumu na? Peepe. Muchikozyano, atutii uyabweendeenda mupaakki. Mpawo wabona feensi iijala kuti utanjili muli bumwi busena. Ulakonzya kulibuzya kuti, ‘Nkamboonzi nibakayakilila feensi mubusena oobu?’ Muchiindi eecho, wamvwa kuvuluma kwamulavu mukati kafeensi. Kujana wamvwa biyeni? Ulakonzya kumvwisisisya kuti feensi eeyo njakukwabilila. Milawu yaJehova iilakwabilila mbuuli feensi alubo Dyabbulosi uli mbuuli mulavu uuli mufeensi. Bbayibbele lyaamba kuti: “Amulibatamike akucenjela, nkaambo sinkondonyoko Saatani uleendeenda mbuli syuumbwa wabutambo akuya buyandaula ngwati lume.”—1 Petro 5:8.

⁵ Jehova uyanda kuti tukkale katubotelwa mubuumi. Tayandi kuti Saatani atweene. Nkinkaako, utupede milawu amalayilile kuti zitukwabilile akuti tubotelwe mubuumi. (BaEfeso 6:11) Jakkobo wakalemba kuti: ‘Uusondela mumulawu mulondosi uukakatila mulinguwo . . . ngonguwe uuti longezegwe mukuchita kwakwe.’—Jakobo 1:25.

6. Niinzi chitondeezya kuti milawu yaJehova ilagwasya?

⁶ Kuti twaswiilila milawu yaJehova, tuyoobotelwa mubuumi alubo tuyookkala katuli abweenzuma bulikabotu anguwe. Muchikozyano, kukomba kulinguwe kulatugwasya. (Matayo 6:5-8; 1 BaTesalonika 5:17) Alubo kunjila miswaangano, kusungwaazyania akukambawuka zipa kuti tubotelwe. (Matayo 28:19, 20; BaGalatiya 6:2; BaHebrayo 10:24, 25) Milimu eeyi yabukombi itugwasya kuti tube alusyomo lusimide alubo ipa kuti tube achoonzyo chakuti milawu yaJehova ilagwasya.

7, 8. Niinzi chiyootugwasya kuti tutayoowi twaakuswaana masunko?

⁷ Chimwi chiindi tulakonzya kukataazikana kuti tuyooswaana masunko mayumu. Kuti kulimvwa oobo, utalubi chisyomezyo chaJehova chakuti: ‘Ndime Jehova Leza wako. Ndime uukuyiisya kuti ugwasigwe. Ndime uukweenzya munzila njoyelede kutola. Nichakabota nwakaswiilila milawu yangu! Lino luumuno lwako nilwakaba mbuuli mulonga, abululami bwako nibwakaba mbuuli mayuwe aamulwizi.’—Isaya 48:17, 18.

⁸ Kuti twaswiilila milawu yaJehova tulaba mbuuli mulonga uutayuminini alubo milimu yesu iiluleme iiyooba mbuuli mayuwe aamulwizi aawuminina kunkomwe yalwizi. Kufumbwa masunko ngitukonzya kuswaana, tulakonzya kukkala katusyomekede. Bbayibbele liti: “Bika makani aako oonse mumaanza aa-Jehova, lino ulakutabilila; lyoonse takooyoozuminina baluleme kuwida mumapenzi.”—Intembauzyo 55:22.

‘ATUYE KUMBELE KUMAKANI AAKUSIMA’

9, 10. Kusima mubukombi chambaanzi?

⁹ Kuba abweenzuma busimide aJehova kuyoopa kuti ‘tuye kumbele kumakani aakusima.’ (BaHebrayo 6:1) Kusima mubukombi chambaanzi?

¹⁰ Kukomena takwaambi kuti twaba maKristu basimide. Kuti tusime mubukombi, tweelede kuba abweenzuma bulikabotu aJehova akuba amaboneno aali mbuuli aakwe. (Johane 4:23) Pawulu wakalemba kuti: “Ikuti miyeeyo yanyama ndufu, anukuti miyeeyo yamuuya mbuumi, alimwi nduumuno.” (BaRoma 8:5) Muntu uusimide mubukombi tabikkili maanu muzintu zyakulikondelezya azyakumubili. Pesi ubikka ziyandwa aJehova mubusena bwakusaanguna alubo usala munzila yabusongo. (Tusimpi 27:11; bala Jakobo 1:2, 3.) Tazumini kweenwa kuti achite zintu zitali kabotu. Alubo muntu uusimide mubukombi ubikkila maanu mukuchita zintu zilikabotu.

11, 12. (a) Pawulu wakatyeni atala “amiyeeyo iyakaiisigwa”? (b) Kuba muKristu uusimide kukozyenie biyeni amuntu uuchita chisobano?

¹¹ Tweelede kubeleka changuzu kuti tusime mubukombi. Mwaapostolo Pawulu wakalemba kuti: “Anu zilyo ziyumu nzyabantu bakakomena, nkokuti nzyabaabo abali amiyeeyo iyakaiisigwa kusala cibotu ecibi.” (BaHebrayo 5:14) Bbala lyakuti “iyakaiisigwa” lilakonzya kupa kuti tuyeeye atala abantu bayiisigwa kuchita imwi misobano.

¹² Kuti twabona umwi muntu kalikuchita chimwi chisobano munzila iigambya, tulakonzya kuziba kuti wakabeleka changuzu kuti akonzye kuchita oobo. Taakazyalwa kachita chisobano eecho. Zili mbuuli chiindi mwana nazyalwa, ngatanaziba mbayelede kubelesya mawulu amaboko. Nayabukomena ulayiya kujata zintu akweenda. Kuti mwana ooyo waliyiisya, ulakonzya kuchita chimwi chisobano. Mbukubede akumaKristu, kuti basime mubukombi beelede kubeleka changuzu kuliyiisya.

13. Niinzi chiyootugwasya kuti tubone zintu mbuuli mbazibona Jehova?

¹³ Mubbuku eeli twakayiya atala ambutukonzya kubona zintu mbuuli mbazibona Jehova. Alubo twakayiya kuti kuswiilila milawu yaJehova kugwasya ndiswe. Chiindi nitusala kuchita chimwi chintu, tweelede kulibuzya kuti: ‘Njiili milawu anjiisyo zibeleka munkani eeyi? Kujana ndazibelesya biyeni? Jehova uyanda kuti ndisale biyeni?’—Bala Tusimpi 3:5, 6; Jakobo 1:5.

14. Tweelede kuchitaanzi kuti tukkale katuli alusyomo lusimide?

¹⁴ Tuyanda kukkala katuli alusyomo lusimide. Mbukunga chakulya chiyaka mubili chipa kuti tube amibili iisimide, nkinkaako kwiiya atala aJehova kupa kuti tube aalusyomo lusimide. Nitwakatalika kwiiya Bbayibbele, twakayiya njiisyo zyakasimpe zili atala aJehova azintu nzyayanda kuti tuchite. Pesi mukuya kwachiindi tweelede kwiiya zintu zinikide. Nzizyo nzyaakali kupandulula Pawulu naakati: “Anu zilyo ziyumu nzyabantu bakakomena.” Kutobelezya zintu nzitwiiya kupa kuti tube abusongo. Bbayibbele lyaamba kuti: “Busongo ncintu cipati.”—Tusimpi 4:5-7; 1 Petro 2:2.

15. Nkamboonzi nitweelede kuyanda Jehova abakombima?

¹⁵ Kuti muntu akkale kali amubili uusimide akuti atajatwi malwazi, weelede kuchita zyiingi. Mbukubede amuKristu uusimide mubukombi, weelede kubeleka changuzu kuti akkale kali abweenzinyina busimide aJehova. Pawulu wakati: “Amulisukusye nubeni na muliimvwi mulusyomo, amulilingule nubeni.” (2 BaKorinto 13:5) Pesi tweelede kuchita zyiingi kutali kuba alusyomo lusimide luzutu. Tweelede kuyanda Jehova abakombima chamoyo woonse. Pawulu wakati: ‘Kuti nindalijisi . . . luzibo loonse, nindalijisi lusyomo lunji lwakuzyula malundu, nekubaboobo nsijisi luyandisyo nsili muntu pe.’—1 BaKorinto 13:1-3.

ATUBIKKILE MAANU KUBULANGILIZI MBUTULAABO

16. Saatani uyanda kuti tube amizeezo iili biyeni?

¹⁶ Saatani uyanda kuti tuyeeye kuti tatukonzyi kuchita zintu zibotezya Jehova. Uyanda kuti tumane manguzu akuti tuyeeye kuti mapenzi ngitulaawo taakamani. Tayandi kuti tukkale katubotelwa nikuba kusyoma bakombima. (BaEfeso 2:2) Alubo Saatani ulizi kuti kuba amaboneno atali kabotu kupa kuti tukataazikane akuti tutabi abweenzuma bulikabotu aJehova. Pesi Jehova ulatugwasya kuti tube abulangilizi akuti tuzunde maboneno aatali kabotu.

17. Kuba abulangilizi kutugwasya biyeni?

¹⁷ Lugwalo lwa1 BaTesalonika 5:8, lwaamba kuti bulangilizi ‘ndufutuko ndotulangila.’ Alubo lutondeezya kuti buli mbuuli ngowani iizwaatwa abasilumamba nibali munkondo. Kusyoma zisyomezyo zyaJehova kulatukwabilila kuti tutabi amizeezo iitali kabotu.

18, 19. Kuba abulangilizi kwakamugwasya biyeni Jesu?

¹⁸ Kuba abulangilizi kwakamugwasya Jesu. Mubusiku katanafwa, wakaswaana buyumu-yumu busiyene-siyene. Mweenzinyina wakamuuzya. Umwi wakati tamuzi pe. Bamwi bakamusiya akumuchija. MaJudanyina bakamubukila kabati ajayigwe achisamu chakupenzezya. Niinzi chakamugwasya kuti alisimye muzintu zyakamuchitikila? “Akaambo kalukkomano ndwaakabikkilidwe kumbele wakaliyumya acisamu cakupenzyezya, wakaubaula kuusyigwa nsoni, alimwi lino ulikkede kujanza lyalulyo lyacuuno cabwami ca Leza.”—BaHebrayo 12:2, NW.

¹⁹ Jesu wakalizi kuti kukkala kasyomekede kwakali kuyoopa kuti Jehova alemekwe akuti Saatani aboneke kuti mubeji. Bulangilizi oobu bwakapa kuti abotelwe loko. Alubo, wakalizi kuti muchiindi chifwiifwi wakali kuyoobweeda kuli Wisi. Alubo bulangilizi oobu bwakamugwasya kuti alisimye. Andiswe tweelede kubikkila maanu kubulangilizi mbuuli Jesu mbaakachita. Kuchita oobo kuyootugwasya twaakuswaana masunko.

20. Niinzi chiyookugwasya kuti ube amaboneno aalikabotu?

²⁰ Jehova ulabona chiindi nitutondeezya kusyomeka akulisimya. (Isaya 30:18; bala Malaki 3:10.) Usyomezya “kupa moyo wako nzyuuyanda.” (Intembauzyo 37:4) Nkinkaako, weelede kubikkila maanu kubulangilizi mbulaabo. Saatani uyanda kuti utabi abulangilizi akuti ubonaanga zisyomezyo zyaJehova tazikazuzikizigwi pe. Pesi eezi tazyeelede kupa kuti ube amaboneno aatali kabotu! Weelede kukomba kuli Jehova kuti wabona kuti tuchikwe bulangilizi. Lugwalo lwaBaFilipi 4:6, 7 luti: “Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza, elyo luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu muli-Kristo Jesu.”

21, 22. (a) Ngaali makanze Jehova ngalaawo atala anyika? (b) Ulibambilide kuchitaanzi?

²¹ Weelede kuba achiindi chakuyeeyesesya atala abuumi bubotu buli kunembo. Lino-lino bantu boonse bayookomba Jehova. (Ciyubunuzyo 7:9, 14) Buumi bunooli biyeni munyika mpya? Bunooli bubotu loko kwiinda mbuyeeyela! Saatani amadimoni aakwe tabanooliwo pe alubo bubi boonse buyoomana. Kuchiswa alufu tazichinooliwo pe. Mazuba oonse unoobuka kuli amubili uusimide, kutachiswi pe kubotelwa abuumi bubotu. Bantu boonse banoobelekelaamwi mukuchincha nyika kuti ikabe paradayizi. Nzala iyoomana alubo bantu bayooba abusena bwakukkala bulikabotu. Takukajaniki bantu bayandisya zyakulwana pesi kunooli bantu bali aluyando. Mukuya kwachiindi, bantu boonse banooli aanyika bayootambula ‘bulemu alwaangunuko mbuuli bana baLeza.’—BaRoma 8:21.

²² Jehova uyanda kuti ube Mweenzinyina. Nkinkaako, beleka changuzu kuti uswiilile milawu yakwe akuti uswene afwiifwi anguwe. Atuzumanane kukkala katuli muluyando lwaLeza kukabe kutamani!—Juda 21.