CHIIYO 8

Zikozyano Ziyiisya

Matayo 13:34, 35

CHIFWIINSYO: Yiisya munzila iilikabotu kwiinda mukubelesya zikozyano zibasika aamoyo baswiilizi azipandulula twaambo tuyandikana.

Belesya zikozyano zyuuba. Mbuuli Jesu, belesya zintu ziniini kupandulula zintu zipati azintu zyuuba kupandulula zintu ziyumu. Utayungizyi makani aapa kuti chikozyano chitamvwisisiki. Baachoonzyo chakuti chikozyano nchwaamba chipandulula kaambo kayandikana nkulikwaamba kubaswiilizi akuti tachibasowi pe.

Bamuntu uulangisisya. Ziba zintu zichitika munyika, bala mabbuku aambunga alubo swiilizya mbubaambuula bayiisi bali aluzibo. Nuchita oobo, bona zikozyano nzukonzya kubelesya kuti uyiisye munzila iibasika aamoyo. Zibambe kabotu zikozyano eezyo kuti uzoozibelesye chimwi chiindi.
Yeeya zintu zikonzya kugwasya baswiilizi. Sala zikozyano zili atala azintu zyeendelana azintu zichitwa abaswiilizi anzibayandisya. Chenjelela kuti zikozyano nzubelesya zitapi kuti baswiilizi babe abweeme naakuti zitapi bulemu.
Yiisya kaambo kayandikana. Pandulula twaambo tupati kutali twaambo tutayandikani loko. Baachoonzyo chakuti baswiilizi batayeeyi chikozyano luzutu pesi bajane chiiyo muchikozyano eecho.