CHIIYO 09
Kukomba Kupa Kuti Tuswene Aafwiifwi aLeza
Kuli muntu weelede kukuzulwida na mubuumi bwako? Kuli mibuzyo njulaayo na njuyanda kuti isandulwe? Uyanda kuumbulizigwa na? Ulayanda na kuba mweenzinyina waJehova? Kukomba kulakonzya kukugwasya. Pesi njiili nzila iilikabotu yakukomba? Leza ulaziswiilila na nkombyo zyoonse? Niinzi nzweelede kuchita kuti Leza aswiilile nkombyo zyako? Atubone.
1. Ngwani ngutweelede kukomba alubo tweelede kukombelaanzi?
Jesu wakaamba kuti tweelede kukomba kuli Taateesu ulikujulu luzutu. Anguwe Jesu wakali kukomba kuli Jehova. Wakati: “Aboobo mboobu mbomweelede kupaila: ‘Taateesu ooli kujulu.’” (Matayo 6:9) Kukomba kuli Jehova kupa kuti tumvwanane loko anguwe.
Tulakonzya kukombela kufumbwa chintu. Pesi kuti Leza asandule nkombyo zyesu, zyeelede kweendelana akuyanda kwakwe. “Kufwumbwa cintu ncotumulomba ceendelana akuyanda kwakwe [Leza] ulatumvwa.” (1 Johane 5:14) Jesu wakatubuzya zintu nzitweelede kukombela. (Bala Matayo 6:9-13.) Alubo tweelede kukomba katumulumba akaambo kazintu nzyaakatuchitila akumukumbila kuti agwasye bamwi.
2. Tweelede kukomba biyeni?
Bbayibbele lyaamba kuti: “Amumwaambile [Leza] zyoonse zili mumyoyo yanu.” (Intembauzyo 62:8) Nkombyo zyesu zyeelede kuzwa aansi aamoyo. Tulakonzya kukombela mumoyo naakuti katuli kugwisya majwi pesi katuchita oobo munzila iitondeezya kuti tulamulemeka Leza kazitakwe ndaba kuti tulikkede, tuliimvwi naakuti tulifugeme. Tulakonzya kukomba kufumbwa chiindi kazitakwe ndaba kuti tulikuli.
3. Leza uzisandula biyeni nkombyo zyesu?
Ulazisandula munzila zisiyene-siyene. Jehova ubelesya Bbayibbele kuti asandule mibuzyo njitulaayo. Kubala Bbayibbele ‘kulabasongwaazya batakwe luzyibo.’ (Intembauzyo 19:7; bala Jakobo 1:5.) Jehova upa kuti tube aaluumuno mumizeezo chiindi nituli mumapenzi. Alubo ulakonzya kubelesya bakombi bakwe kuti batugwasye chiindi nituyanda lugwasyo.
YIYA ZYIINGI
Bona mbukonzya kukomba nkombyo zitambulika kuli Leza mpawo ubone kuti kukomba kukugwasya biyeni.
4. Kuli nzila njitweelede kumukombaayo Leza
Niinzi chikonzya kutugwasya kubona kuti nkombyo zyesu zilatambulika na kuli Leza naakuti pe? Mweebele KAVIDIYO.
Jehova uyanda kuti tukombe nguwe. Bala Intembauzyo 65:2, mpawo musandule mibuzyo iitobela:
Ubonaanga Leza ulayanda na kuti ukombe kulinguwe? Nkamboonzi?
Tweelede kupona kweendelana amilawu yaLeza kuti katuyanda kuti aswiilile nkombyo zyesu. Bala Mika 3:4 a 1 Petro 3:12, mpawo musandule mubuzyo uutobela:
Niinzi chipa kuti tube aachoonzyo chakuti Leza ulaziswiilila nkombyo zyesu?
Masoja balakonzya kukombela kuti bakazunde kunkondo. Zilachita na kuti Leza asandule nkombyo zili boobo?
5. Tweelede kukomba kazizwa aansi aamoyo
Bamwi bakayiisigwa kuti kabayindulula nkombyo iimwi chiindi choonse nibakomba. Pesi Leza mbayanda na kuti tumukombe? Bala Matayo 6:7, mpawo musandule mubuzyo uutobela:
Niinzi chikonzya kukugwasya kuti utanoowambi “majwi ngoonya cakwiinduluka-induluka” nukomba?
Buzuba abuzuba, weelede kuyeeya atala achintu chibotu Jehova nchaakakuchitila mpawo umulumbe atala achintu eecho. Kuti wachita oobo kwamviki, uzoobona kuti unooli wakombela zintu zili 7 kutayindulwide pe.
Muzyali uyanda kuti mwanaakwe amubuzye zili aansi amoyo wakwe. Munzila iikozyenie, Jehova uyanda kuti tukombe kulinguwe kazizwa aansi amoyo
6. Nkombyo nchipo chizwa kuli Leza
Kukomba kutugwasya biyeni kuti tube aamanguzu chiindi zintu nizili kutweendela kabotu anituli mumapenzi? Mweebele KAVIDIYO.
Bbayibbele lyaamba kuti kukomba kupa kuti tube aaluumuno mumizeezo. Bala Bafilipi 4:6, 7, mpawo musandule mibuzyo iitobela:
Kukomba kutugwasya biyeni nikuba kuti takupi kuti mapenzi eesu amane?
Nziizili zintu nzuyanda kukombela?
Walizi na?
Bbala lyakuti “ameni” lyaamba kuti “akube boobo.” Kuzwa chiindi, bbala lyakuti “ameni” lyakali kwaambwa kumamanino aankombyo.—1 Makani 16:36.
7. Jana chiindi chakukomba
Chimwi chiindi tulakonzya kujatikana zyakuti nga twaluba kukomba. Jesu wakali kukubona biyeni kukomba? Bala Matayo 14:23 a Marko 1:35, mpawo musandule mibuzyo iitobela:
Jesu wakachita biyeni kuti ajane chiindi chakukomba?
Ndiilili nukonzya kujana chiindi chakukomba?
BAMWI BAAMBA KUTI: “Kukomba nkwiinzya mulawu.”
Ani iwe utyeni?
CHIFWIINSYO
Nkombyo zizwa aansi amoyo zipa kuti tube beenzinyina baLeza, zitupa luumuno mumizeezo alubo zitupa manguzu aakuti tuchite zintu zibotezya Jehova.
Mibuzyo Yakwiindulula
Ngwani ngutweelede kukomba?
Tweelede kukomba biyeni?
Kukomba kutugwasya biyeni?
YANDUULISISYA
Jana nsandulo zyamibuzyo bantu njibabuzya atala ankombyo.
“Zintu Zili 7 Nzweelede Kuziba Zili Atala Ankombyo” (Ngaziyakulinda, October 1, 2010)
Bona twaambo tupa kuti katukomba ambukonzya kukomba nkombyo zitambulika kuli Leza.
“Nkamboonzi Nindeelede Kukomba?” (Chiiyo chijanika aaIntaneti)
Bona kuti Bbayibbele lyaamba kuti ngwani ngutweelede kukomba.
“Tweelede Kukomba Basaante Na?” (Chiiyo chijanika aaIntaneti)
Mukavidiyo katobela, bona kuti zilaandaba na kuti tulikukomba lili akuti tukomba katuli kuli.