Kuti Ngukwetenaawe Taasyomeka Mulukwatano
KUTASYOMEKA mulukwatano kweeta machise ataambiki. Bamwi balakonzya kumulekelela ngubakwetenaawe akusala kuti biinkilile kunembo kabakkalaamwi.a Kufumbwa kuti balekana naakuti biinkilila kunembo kabakkalaamwi, kutasyomeka mulukwatano kulakonzya kuba mbuuli chilonda chitaponi kuli yooyo uutakwe mulandu. Niinzi chikonzya kugwasya bantu bali muchiimo chili boobu?
MAVESI AAMUBBAYIBBELE AAKONZYA KUKUGWASYA
Bakwetene biingi bakachitilwa kutasyomeka amuntu ngubakwetenaawe bakawumbulizigwa aBbayibbele. Bakayiya kuti Leza ulakubona kulila kwabo akuti ulabeetelela.—Malaki 2:13-16.
“Miyeeyo minji iikataazya na yaata mumoyo wangu, kuumbulizya kwako nkokundikondezya.”—Intembauzyo 94:19.
Bill wakaamba kuti: “Chiindi nindakali kubala vesi eeyi, moyo wangu wakali kukkala nkaambo ndakali kumvwa mbuuli kuti Jehova wakali kundaanga zilonda.”
‘Kumuntu uusyomeka ulasyomeka.’—Intembauzyo 18:25.
Carmen ulaamulumi wakatali kusyomeka, wakaamba kuti: “Nikuba kuti mulumaangu taakali kusyomeka pe pesi ime ndakali kusyoma kuti Jehova uyookkala kasyomeka kulindime akuti takandilekelezyi.”
“Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza, elyo luumuno lwa-Leza lwiinda miyeeyo yoonse yabantu luyooyaminina myoyo yanu.”—BaFilipi 4:6, 7.
Sasha wakati: “Ndakalubala kwaziindi zyiingi lugwalo oolu alubo kukomba kuli Leza kwakapa kuti nditalikataazyi azintu zyiingi.”
Bantu boonse baambidwe aajulu bakali kubonaanga buumi bwabo tabuchigwasyi pe. Nikuba boobo, kusyoma Jehova Leza akubala Bbayibbele kwakabagwasya kuti balisimye. Bill wakati: “Kuba aalusyomo kwakandigwasya kuti ndibone kuti ndilakonzya kwiinkilila kunembo abuumi nikuba kuti zintu teezyandeendela kabotu. Ziindi zyiingi kwakali mbuuli kuti ndilikweenda ‘mumumpata uusiya mbi’ pesi Leza wakandigwasya.”—Intembauzyo 23:4.
a Kuti ujane makani miingi atala akulekelela muntu wakatasyomeka mulukwatano, langa zyiiyo zili muAmubuke yaChikuwa yamuApril 22, 1999 aansi amutwe utii, “When a Mate Is Unfaithful.”