Mwalizi Na?

Balangizi baambwa muBbayibbele bakali kubelekaanzi?

BALANGIZI baambwa muBbayibbele bakali kulangania maanda azintu zyabamwi bantu.

Chiindi Josefa mwana waJakkobo naakali mubuzike kuEgepita, wakaba mulangizi wang’anda yasimalelaakwe. Simalelaakwe wakapa Josefa “zintu zyakwe zyoonse . . . kuti kazilanganya.” (Matl. 39:2-6) Mukuya kwachiindi, Josefa wakazooba amanguzu muEgepita mpawo wakazooba amulangizi wakali kulangania ng’anda yakwe.​—Matl. 44:4.

Muchiindi chaJesu, bantu bakali aamyuunda chiindi chiingi bakali kukkala mumadolopo kule amyuunda yabo. Nkinkaako bakali kusala balangizi kuti kabalangania milimu yakali kubelekwa buzuba abuzuba mumyuunda yabo.

Muntu uli biyeni wakali kweelela kuba mulangizi? Umwi mulembi wakuRoma uutegwa Columella wakaamba kuti, muzike wakali kusalwa kuba mulangizi wakeelede kuba “muntu ulaaluzibo atala amilimu yamumuunda.” Alubo wakeelede kuba muntu “ubeendelezya kabotu bamwi kutali chalunya.” Wakayungizya kuti: “Chakali kuyandikana loko nkuti wakeelede kuba muntu uyanda kwiiya kutali muntu ulibona kuti ulizizi zintu zyoonse.”

Jwi lyaLeza libelesya chikozyano chamulangizi amilimu yakwe kwaamba milimu imwi iichitwa mumbungano. Muchikozyano mwaapostolo Petro wakasungwaazya maKristu kuti babelesye zipo nzibakapegwa aLeza “mukubelekelana mbuli [balangizi] babotu baluzyalo lwa Leza.”​—1 Pet. 4:10.

Jesu alakwe wakabelesya chikozyano chamulangizi muchikozyano chijanika muli Luka 16:1-8. Kuyungizya waawo, chiindi naakali kwaambuula atala achitondeezyo chakubako kwakwe kali Mwaami, wakasyomezya batobeli bakwe kuti wakali kuyoosala “muzike uusyomeka alimwi uucenjede” naakuti “mubanzi uusyomeka.” Mulimu mupati wamulangizi ooyu ngwakupa batobeli baKristu chakulya chamubukombi aachiindi cheelede muchiindi chamamanino. (Mt. 24:45-47; Lk. 12:42) Tulalumba kapati kuba aakati kabantu bajana mabbuku aasimya lusyomo lwesu ngitupegwa amulangizi usyomeka, ajanika munyika yoonse.