Nkamboonzi Kuzondana Nikuli Kwiinkilila Kunembo?

Nkamboonzi nikuli kuzondana kuyoosya boobu munyika yoonse? Kuti tuzibe kaambo aako, tweelede kuziba kuti kuzondana niinzi, bantu bakatalika biyeni kuzondana alubo nkamboonzi nikuzwide munyika yoonse?

Kuzonda Chaambaanzi?

Kuzonda chaamba kulimvwa kutamuyandi pe umwi muntu naakuti kamwi kabunga kabantu. Kuzonda kulisiyene akunyemena umwi muntu kwachiindi chifwiifwi.

NIINZI CHIPA KUTI BANTU BAZONDE BAMWI?

Kuli twaambo twiingi tupa kuti bantu bazonde bamwi. Chiindi chiingi bantu tabazondwi aakaambo kazintu nzibachita pe pesi balazondwa akaambo kambubabede. Bantu bazondwa nga bayeeyelwa kuti mbantu batali kabotu pe, mbantu bakonzya kuchisa bamwi naakuti mbantu batakonzyi pe kuchincha kuti babe bantu bali kabotu. Alubo ngabalangililwa aansi naakuti kulangililwa kuti balakonzya kweetela bamwi mapenzi. Bantu bazonda bamwi kulakonzeka kuti nga bakapenzegwa, teebakajatwa kabotu naakuti bakachitilwa chimwi chintu chipa kuti bazonde bamwi.

NKAMBOONZI KUZONDANA NIKUZWIDE MUNYIKA?

Muntu ulakonzya kuzonda bamwi nikuba katanaswaanana aabo pe. Muchikozyano, muntu ulakonzya kumvwa makani aatali kabotu atala abantu mbalemeka naakuti mbazi loko mpawo aasyome. Eezi nzizyo zipa kuti kube kuzondana aakati kabantu.

Kuti twabona kuzondana mbukufwambaana kuzula munyika, tulamvwisisisya kuti nkamboonzi munyika nimuzwide kuzondana. Pesi kuti tuzunde kuzondana kuli munyika, tweelede kumvwisisisya kuti kuzondana kwakasaanguna biyeni. Bbayibbele lilatubuzya kuti kwakasaanguna biyeni.

BBAYIBBELE LILATONDEEZYA KUTI KUZONDANA KWAKASAANGUNA BIYENI

Chifanikisyo chitondeezya ma-arrow aabili alikuzyunguluka, ma-arrow aaya atondeezya zichitika mukuzondaana. 1. Makani atali aachoonzyo, kuswaanizya kuyungwa abeenzuma, Intaneti, amanyuzi. 2. Kutaba aaluzibo atala, tunsiya-nsiya, musyobo achikombelo. 3. Kuyoowa kuchincha, kusweekelwa akutaziba zikonzya kuchitika. 4. Kuzondana kuswaanizya kusalulana akulwana.

KUZONDANA TEEKWAKEETWA AABANTU PE. Kwakasaanguna chiindi mungelo wakazootegwa Saatani Dyabbulosi naakapapila Leza. Dyabbulosi wakaba “mujayi kuzwa naakatalika” kupapila Leza. Mbuli “mubeji alimwi ngousyi wabubeji” ulikuzumanana kupa kuti kuzondana kwiinkilile kunembo. (Johane 8:44; 1 Johane 3:11, 12) Bbayibbele limwaamba kuti ulinyemede alubo ulaalunya.—Jobu 2:7; Ciyubunuzyo 12:9, 12, 17.

NKUUBA LOKO KUTI BANTU BALI AACHIBI BAZONDE BAMWI. Muntu wakusaanguna Adamu wakatobela kupapila kwaSaatani. Eezi zyakapa kuti bantu boonse babe aachibi. (Baroma 5:12) Mwana waAdamu wakusaanguna uutegwa Kkayini wakajeya mwanike wakwe Abbelo akaambo kakumuzonda. (1 Johane 3:12) Nisimpe, bantu biingi mazubaano batondeezya luyando aluzyalo. Pesi akaambo kakuti balaachibi, biingi babo tabakwe ndaba pe aziyandwa aabamwi, balaabbivwe alubo balalisumpula, buntu oobu bupa kuti kube kuzondana.—2 Timoteyo 3:1-5.

KUTAYANDA BAMWI KUPA KUTI TUBAZONDE. Nyika isumpula michito amaboneno aatali kabotu eezi zipa kuti kuzondana kuvule. Kutayanda bantu bayimwi misyobo, kusaluula, kutukila, kuzwinisya akujaya zintu zyabantu kuli kwiinkilila kunembo nkaambo “nyika yoonse ili mumaanza aamubi” Saatani Dyabbulosi.—1 Johane 5:19.

Bbayibbele talijinkili aakwaamba zipa kuti kube kuzondana luzutu pe. Pesi lilaamba ambukuzoomana.