Amwiinkilile “Kunembo Kweenda Mukasimpe”

1. Kwaambuuzyania atala ambutwakakajana kasimpe kutugwasya biyeni?

“WAKAKAJANA biyeni kasimpe?” Kulakonzeka kuti mubuzyo ooyu wakawusandula kwaziindi zyiingi. Ooyu nguumwi mubuzyo ngwasaanguna kubuzya mukombima kuti kayanda kuti tuzibane kabotu. Tulakuyanda kumvwa kuti bakombima bakamuziba biyeni Jehova akumuyanda alubo tulabotelwa kubabuzya mbutukayanda kasimpe. (Rom. 1:11) Kwaambuuzyania kuliboobu kutugwasya kuti tukabone kakayandikana kasimpe. Alubo ngatwaba aachiyandisyo chakuti twiinkilile “kunembo kweenda mukasimpe,” nkukwaamba kupona munzila iipa kuti Jehova atulongezye akuti tutambulike kulinguwe.—3 John 4.

2. Tulalanga-langaanzi muchiiyo eechi?

² Muchiiyo eechi, tulalanga-langa tumwi twaambo tupa kuti tuyande kasimpe. Mpawo tulabona mbutukonzya kwiinkilila kunembo kutondeezya kuti tulachiyanda chipo eechi. Chiiyo eechi chilatugwasya kubona mbukuyandikana kutukwela nkwaakachita Jehova mukasimpe (Joh. 6:44) Alubo chilatugwasya kuti tuyungizye chiyandisyo chesu chakubuzya bamwi atala akasimpe.

NKAMBOONZI NITUYANDA “KASIMPE”?

3. Nkaakali kaambo kapati kapa kuti tuyande kasimpe?

³ Kuli twaambo twiingi tupa kuti tuyande kasimpe. Kaambo kapati nkakuti tuyanda Jehova Leza, Kasensa kakasimpe. Jwi lyakwe Bbayibbili lyakatugwasya kuziba kuti Jehova ngusinguzuzyoonse Mulengi wajulu anyika, Taateesu wakujulu uulaaluyando alubo ulaandaba andiswe. (1 Pet. 5:7) Jwi lyakwe lyakatugwasya kuziba kuti Jehova nguLeza “silweetelelo, uutafwambaani kukalala alimwi uuzwide luyando lutamani akasimpe.” (Kul. 34:6) Litondeezya kuti Jehova uyanda bululami. (Is. 61:8) Akuti tabotelwi pe chiindi nabona katuswaana mapenzi akuti ulilibambilide kwaamanisya muchiindi chakwe nchabikkide. (Jer. 29:11) Eezi zilabotezya. Nchitumuyanda Jehova.

4-5. Nkamboonzi mwaapostolo Pawulu naakakozyanisya bulangilizi angobyo?

⁴ Nkaakali kamwi kaambo kapa kuti tuyande kasimpe? Kasimpe kalatugwasya. Muchikozyano, kasimpe kamuBbayibbili kaswaanizya bulangilizi bwabuumi bulikunembo. Pawulu wakatondeezya mbubuyandikana bulangilizi oobu naakalemba kuti: “Bulangilizi oobu mbutulaabo ningobyo yabuumi bwesu, njachoonzyo alubo tayizungaani pe.” (Heb. 6:19) Mbuli ngobyo mbiiyimikizya bwaato, bulangilizi bwesu bulakonzya kutugwasya kuti tubatame muchiindi chamapenzi.

⁵ Mulugwalo oolu, Pawulu wakali kwaambuula atala abulangilizi bwakujulu maKkristu bananikidwe mbubalaabo. Pesi majwi aakwe alabeleka akumaKkristu bali aabulangilizi bwakuyoopona kukabe kutamani muparadayizi aanyika. (Joh. 3:16) Kwiiya atala abulangilizi bwakuzoopona kukabe kutamani, kwakapa kuti tube aamakanze mubuumi.

6-7. Kwiiya kasimpe kalaatala abuumi bulikunembo, kwakamugwasya biyeni Yvonne?

⁶ Amuyeeye chikozyano chamuchizi uutegwa Yvonne. Yvonne taakakomenena mukasimpe pe alubo naakachili muniini, wakali kuyoowa kufwa. Bumwi buzuba naakabala amwi majwi aakuti: “Limwi zuba tabukachi,” wakakataazikana loko alubo wakaamba kuti: “Majwi aayo akapa kuti ndibe aachilabila. Ndakali kuyeeya atala alyajuunza. Ndakali kulibuzya kuti: ‘Nkamboonzi nitupona kwachiindi chifwiifwi?’ ‘Nkamboonzi nitulaano?’ Teendakali kuyanda pe kufwa.”

⁷ Mukuya kwachiindi, Yvonne kali wakomena-komena, wakazooswaana Bakamboni baJehova. Wakaamba kuti: “Ndakasaanguna kusyoma kuti ndilakonzya kuba aabulangilizi bwakuzoopona muParadayizi aanyika kukabe kutamani.” Kwiiya atala akasimpe aaka kwakamugwasya biyeni? Wakati: “Tandichibi aachilabila mansiku kandili kukataazikana atala alyajuunza naakuti kufwa.” Mbuli mbutwabona, Yvonne ukabona kakayandikana loko kasimpe alubo kubuzya bamwi atala abulangilizi bwabuumi bwakunembo kupa kuti akkutisikane.—1 Tim. 4:16.

8-9. (a) Muchikozyano chaJesu, umwi mwaalumi wakatondeezya biyeni kuti wakali kububona kabuyandikana bunoti mbwaakajana? (b) Niinzi zitondeezya kuti ukabona kakayandikana kasimpe?

⁸ Kasimpe kamuBbayibbili kalaswaanizya amakani mabotu ali atala aBwaami bwaLeza. Jesu wakakozyanisya kasimpe kaBwaami abunoti busisidwe. Muli Mateyo 13:44, Jesu wakati: “Bwaami bwakujulu buli mbuli bunoti busisidwe mulusaka, muntu mbwaakajana akubusisa. Akaambo kakukondwa, ulayinka kuti akawuzye zintu zyoonse nzyalaazyo mpawo awule lusaka oolo.” Mulugwalo oolu, mwaalumi ooyu taakali kuyanduula bunoti pe. Pesi naakabujana, wakazumina kusweekelwa aazintu nzyaakalaazyo kuti abuule. Wakawuzya zintu zyoonse nzyaakalaazyo. Nkamboonzi? Nkaambo wakalizi kuti bunoti oobo bwakali kuyandikana loko kwiinda zintu zyoonse nzyaakali kuyoosweekelwa.

⁹ Kweelede mbukabona anduwe akasimpe. Tulizi kuti nyika eeyi tiikwe nchiikonzya kukupa chiinda kubotelwa nkutujana mukubelekela Jehova lino, katuli aabulangilizi bwakuyoopona kukabe kutamani aansi aaBwaami bwaLeza. Zintu nzitukonzya kusweekelwaazyo lino, taakwe ambuzibede pe kuti twazyeezyanisya aabweenzuma mbutulaabo aJehova. Kubotelwa kwesu kupati kuzwa mukubotezya Leza “munzila iizwide.”—Kol. 1:10.

10-11. Niinzi zyakapa kuti Michael achinche maponeno aakwe?

¹⁰ Biingi besu bakalipeda kusiya zimwi zintu kuti batambulike kuli Jehova. Bamwi bakasiya milimu iibbadala. Bamwi bakaleka kuyanduula bunoti. Alubo bamwi bakachincha maponeno aabo chiindi nibakayiya atala aJehova. Eezi nzizyo nzyaakachita Michael. Taakakomenena mukasimpe pe. Naakachili muniini wakayiila kkarati. Wakaamba kuti: “Ndakali kubona kakuyandikana kuba aamubili uusimide alubo ndakali kulimvwa kuti ndili mwaalumi. Chimwi chiindi, ndakali kulimvwa kuti tanduumiki pe.” Pesi naakasaanguna kwiiya Bbayibbili, wakabona Jehova mbakubona kulwana. (Int. 11:5) Michael kalikwaambuula atala amukwesu amwanakazi wakwe bakamuyiisya Bbayibbili, wakati: “Taakwe nibakandibuzya kuti ndisiye kkarati, bakali kundiyiisya kasimpe kali muBbayibbili luzutu.”

¹¹ Kwiinkilila kunembo kwiiya atala aJehova nkwaakali kuchita Michael, kwakapa kuti amuyande loko Jehova. Kubona Jehova mbabeetelela bakombi bakwe kwakamusika aamoyo. Mukuya kwachiindi, Michael wakazoobona kuti wakeelede kusala kuchincha maponeno aakwe. Wakati: “Ndakalizi kuti kusiya kkarati nchiichintu chakali kuyoondiyumina mubuumi bwangu. Pesi ndakalizi kuti, kuchita oobo kwakali kuzoobotezya Jehova alubo ndakali aachoonzyo chakuti taakwe chintu chiyandikana loko nchindakali kuyoosweekelwaacho chiinda kumubelekela.” Michael wakabona kasimpe nkaakajana kakayandikana loko. Eezi zyakapa kuti achinche maponeno aakwe.—Jak. 1:25.

12-13. Kasimpe kamuBbayibbili kakamugwasya biyeni Mayli?

¹² Bbayibbili likozyanisya kasimpe alambe limunika mumudima kuti litondeezye mbukayandikana kasimpe. (Int. 119:105; Ef. 5:8) Mayli uuzwa kuAzerbaijan ulubona kaluyandikana lugwasyo ndwaakajana kuzwa muJwi lyaLeza. Wakakomenena mumpuli iili aabantu banjila zikombelo zisiyene. Wisi wakali muMuslim alubo bayina bakali muJuda. Mayli wakati: “Nikuba kuti teendakali kuzumbuuzya pe kuti Leza mpali, pesi ndakali aamibuzyo myiingi. Ndakali kulibuzya kuti, ‘Nkamboonzi Leza naakalenga bantu alubo nkamboonzi bantu nibazyalilwa kuti bafwabe kwabuumi bwabo boonse mpawo kumamanino bazoopenzegwe kukabe kutamani muhelo?’ Mbukunga bantu baamba kuti zintu zyoonse zichitika nkuyanda kwaLeza, ndakali kulibuzya kuti, ‘Leza mweendelezi uubotelwa kubona bantu kabali koomba na?’”

¹³ Mayli wakazumanana kuyanduula nsandulo zyamibuzyo yakwe. Mukuya kwachiindi, wakazumina kwiiya Bbayibbili alubo wakazooba umwi waBakamboni baJehova. Mayli wakati: “Nzilyaamba Bbayibbili zyakachincha maboneno aangu atala abuumi alubo zyakapa kuti ndibotelwe. Bupanduluzi bumvwisisika mbundakajana muBbayibbili bwakapa kuti ndikkalinkane mumizeezo.” Mbuli Mayli, toonse tutembawula Jehova, ooyo wakatwiita “kuzwa mumudima kuti [tuye] mumumuni wakwe uugambya.”—1 Pet. 2:9

14. Niinzi nzitweelede kuchita kuti tutondeezye kuti tulakayanda kasimpe? (Langa kabbokesi kati “Zimwi Zintu Zikozyanisigwa Aakasimpe KamuBbayibbili.”)

¹⁴ Eezi nzikozyano ziche biyo zitondeezya mbukayandikana kasimpe. Ulakonzya kuyeeya atala azimwi zikozyano zyiingi alubo ulakonzya kubala akuyanduulisisya kuti ukonzye kujana tumwi twaambo tupa kuti tukayande kasimpe. Kuti twayinkilila kunembo kuyanda kasimpe, tuyoojana zimwi nzila zyiingi, zyakutondeezya kuti tulakayanda kasimpe.

NGA TULATONDEEZYA BIYENI KUTI TULAKAYANDA KASIMPE?

15. Njiili imwi nzila mutukonzya kutondeezyaayo kuti tulakayanda kasimpe?

¹⁵ Tulakonzya kutondeezya kuti tulakayanda kasimpe kwiinda mukubala Bbayibbili amabbuku eesu chiindi choonse alubo katuyanduulisisya. Nikuba kuti twaba aachiindi chilamfu katuli mukasimpe, tweelede kuziba kuti kwiiya takumani pe. Magazini yakusaanguna yaNgaziyakulinda yakaamba kuti: “Munyika muzwide makani aakubeja zyakuti kulakonzya kutuyumina kujana makani akasimpe. Kuti ukonzye kukajana kasimpe, weelede kukayanduula. Weelede kubeleka changuzu kuti ukajane. Utakkutisikani anjiisyo imwi luzutu yakasimpe pesi kkala kuyanduula zimwi njiisyo zili muBbayibbili. Kubala akuyanduulisisya, kuyanda kubeleka changuzu alubo kuti twachita oobo, tulagwasigwa.”

16. Njiili nzila yakubala njwaakabona iikugwasya loko? (Tusimpi 2:4-6)

¹⁶ Kulakonzeka kuti bamwi tabakuyandi pe kubala akuyanduulisisya. Pesi Jehova utukumbila kuti ‘tuzumanane kuyandaula’ akuti ‘tuzumanane kulangaula’ kuchitila kuti tukamvwisisisye kabotu kasimpe. (Bala Tusimpi 2:4-6.) Kuti twabeleka changuzu munzila eeyi, tuyoogwasigwa chiindi choonse. Corey waamba kuti ubikkila maanu kuvesi iimwi aachiindi chimwi chiindi nabala Bbayibbili akuyanduulisisya. Waamba kuti: “Ngandabala makani aamunsi woonse. Nga ndabala amwi Magwalo aayendelana aavesi eeyo alubo ngandayanduulisisya. Nzila eeyi indigwasya kuti ndiiye zyiingi loko.” Kufumbwa kuti tubelesya nzila eeyi naakuti iimbi, kuti twalipa chiindi chakuyanduulisisya atala akasimpe, ngatuli kutondeezya kuti tukabona kakayandikana.—Int. 1:1-3.

17. Zyaambaanzi kuponena kasimpe? (Jakkobo 1:25)

¹⁷ Kuli zimwi zintu nzitweelede kuchita kutali kwiiya kasimpe luzutu. Tweelede kuponena kasimpe, nkukwaamba kuti, tweelede kubelesya zintu nzitwiiya mubuumi bwesu kuchitila kuti zitugwasye. Kuti twachita oobo, tulajana kubotelwa kwachoonzyo. (Bala Jakkobo 1:25.) Niinzi nzitukonzya kuchita kuti tutondeezye kuti tulikupona kweendelana akasimpe? Umwi mukwesu wakaamba kuti tweelede kulilanga-langa kuti tubone mputuli kuchita kabotu amputweelede kubambulula. Mwaapostolo Pawulu wakaamba kuti: “Kweendelana ambutwakomena, atwiinkilile kunembo kweenda bweelede munzila njiyeeyi.”—Flp. 3:16.

18. Nkamboonzi nitweelede kuchita zyoonse nzitukonzya kuti twiinkilile “kunembo kweenda mukasimpe”?

¹⁸ Yeeya atala abubotu mbutujana kuti twachita zyoonse nzitukonzya, kuti ‘twiinkilile kunembo kweenda mukasimpe.’ Kuchita oobo kutugwasya kuti tupone buumi bulikabotu alubo kupa kuti tubotezye Jehova kuswaanizya abakombima. (Tus. 27:11; 3 Joh. 4) Ootu ntutwaambo tupati tupa kuti tuyande kasimpe akuti tuponene nkako.