Ulakonzya Kujana Kubotelwa Kwachoonzyo

1. Nchiichili chiyandisyo nchitwakalengwa katulaacho alubo chiyandisyo eecho chitugwasya biyeni kuti tubotelwe?

KUBOTELWA kwachoonzyo teekulimvwa kuboteledwe luzutu pe kwachiiindi chifwiifwi pesi takumani pe kufumbwa kuti muntu kachipona. Nkamboonzi? Jesu wakazipandulula Munkambawuko yakwe yakuChilundu. Wakati: “Balabotelwa aabo bazi kuti beelede kuzulwidwa aaLeza.” (Mt. 5:3) Jesu wakalizi kuti bantu bakalengwa munzila yakuti babe aachiyandisyo chakuziba akukomba Mulengi wabo, Jehova Leza. Twakalengwa katuli aachiyandisyo eechi. Mbukunga Jehova ‘nguLeza uubotelwa,’ nkinkaako aabo bamukomba uyanda kuti babotelwe.—1 Tim. 1:11.

2-3. (a) Kweendelana anzyaakaamba Jesu, mbaani bamwi bakonzya kubotelwa? (b) Tulalanga-langaanzi muchiiyo eechi alubo nkamboonzi nikuyandikana?

² Zintu zyoonse zyeelede kutweendela kabotu luzutu na mubuumi kuti tujane kubotelwa kwachoonzyo? Peepe. Munkambawuko yakwe, Jesu wakaamba chimwi chintu chigambya. Wakati, “aabo balila” nikuba kuti balila aazintu zyeetwa aachibi nchibalaacho naakuti amwi mapenzi ngibaswaana mubuumi balakonzya kubotelwa. Alubo Jesu wakatondeezya kuti “aabo bakapenzegwa akaambo kabululami” naakuti aabo ‘basampulwa’ akaambo kakuti mbatobeli baKkristu, balakonzya kubotelwa ambabo. (Mt. 5:4, 10, 11) Pesi, zichitika biyeni kuti muntu abotelwe chachoonzyo kali muzyiimo zili oobu?

³ Jesu wakali kutuyiisya kuti, kubotelwa takubi aakaambo kakuti zintu zilikutweendela kabotu mubuumi, pesi wakatondeezya kuti tulakonzya kubotelwa kuti twazulwidwa aaLeza akuswena aafwiifwi anguwe. (Jak. 4:8) Kujana twazichita biyeni eezi? Muchiiyo eechi, tulalanga-langa nzila zitatu zikonzya kutugwasya kuti tujane kubotelwa kwachoonzyo.

LYA CHAKULYA CHAMUBUKOMBI

4. Nchiichili chintu chakusaanguna chikonzya kupa kuti tujane kubotelwa kwachoonzyo? (Intembauzyo 1:1-3)

⁴ CHAKUSAANGUNA: Kuti tubotelwe chachoonzyo, tweelede kulya chakulya chamubukombi. Bantu abanyama beelede kulya kuti bazumanane kupona. Pesi bantu mbabo luzutu balya chakulya chamubukombi. Alubo tulachiyanda chakulya eechi. Nzizyo zyakapa kuti Jesu aambe kuti: “Muntu teelede kupona aachinkwa achilikke pe, pesi amajwi woonse aazwa mumulomo waJehova.” (Mt. 4:4) Nkinkaako, tatweelede kubbizya zuba pe katutalide chakulya chamubukombi chiyandikana loko, chizwa kuli Jehova kabelesya Jwi lyakwe Bbayibbili. Sintembawuzyo wakaamba kuti: ‘Ulikkomene muntu uukkomanina mulawo wa Jehova alimwi uubala syikati amasiku.’—Bala Intembauzyo 1:1-3.

5-6. (a) Niinzi nzitukonzya kujana muBbayibbili? (b) Kubala Bbayibbili kutugwasya biyeni?

⁵ MuBbayibbili, Jehova wakatupa malayilile aayandikana loko aakonzya kutugwasya kuti tubotelwe mubuumi. Bbayibbili litutondeezya makanze Leza ngalaawo atala abuumi bwesu. Tubona mbutukonzya kuswena aafwiifwi anguwe ambatulekelela zibi zyesu. Alubo litupa bulangilizi bwakuti zisyomezyo zyaLeza ziyoozuzikizigwa kunembo. (Jer. 29:11) Kasimpe aaka nkitujana muJwi lyaLeza kapa kuti tubotelwe loko.

⁶ Mbuli mbutuzi, Bbayibbili lili aamalayilile aatugwasya mubuumi bwabuzuba abuzuba. Kuti twaaswiilila malayilile aayo, tulabotelwa. Chiindi nwaamana manguzu akaambo kamapenzi ngituswaana mubuumi, jana chiindi chakubala Jwi lyaLeza akuyeeyesesya. Jesu wakati: “Babotelwa mbaabo bamvwa jwi lyaLeza akulibamba!”—Lk. 11:28.

7. Niinzi nzweelede kuchita kuti ujane zyiingi chiindi nulikubala Jwi lyaLeza?

⁷ Chiindi nubala Jwi lyaLeza, weelede kubelesya chiindi eecho kuti unoneezegwe azintu nzulikubala. Muchikozyano, zyakali zyakuchitikila na eezi, zyakuti umwi muntu wajika chakulya nchuyandisya loko. Akaambo kakuti ulijisikini naakuti kuli zilikukukataazya mumizeezo, walya chakulya eecho kutalikuswiilizya pe kuti chinona biyeni. Pesi mbutamane kulya wasaanguna kulisola kuti teewali kubikkila maanu pe kuti umvwe kuti chakulya eecho chinona biyeni. Nzizyo zichitika akukubala. Kuti wabala kuyabuchijaana ulakachilwa kumvwisisisya kuti nzulikubala zilikwaambuula atalaanzi. Nkinkaako, chiindi nubala Bbayibbili weelede kubelesya mweenya ooyo kuti unoneezegwe anzulikubala. Yezya kubona zifanikisyo mumizeezo, naakuti kumvwa misabilo yazintu nzulikubala kazilikuchitika choonzyo. Alubo uyeeyesesye atala anzulikubala. Kuti wachita oobo, kubala kulakunoneezya alubo kulapa kuti ubotelwe.

8. “Muzike uusyomeka alubo uuchenjede” ulikuuzuzikizya biyeni mulimu wakwe? (Langa makani aamunsi.)

⁸ Jesu wakasala “muzike uusyomeka alubo uuchenjede” kuti atupe chakulya chamubukombi aachiindi cheelede, alino tulikuchijana chakulya eecho.b (Mt. 24:45) Chakulya choonse nchitupegwa aamuzike uusyomeka chizwa muBbayibbili. (1 Tes. 2:13) Chakulya chamubukombi eechi chitugwasya kuti tuzibe mizeezo yaJehova iilembedwe muBbayibbili. Eezi nzizyo zipa kuti tubale magazini yaNgaziyakulinda a-Amubuke! azyiiyo zijanika aa jw.org. Tulalibambila miswaangano yaakati kamviki ayamamanino aamviki. Alubo tweebela JW Broadcasting^® mweezi amweezi. Kuyungizya aachakulya chamubukombi, kuli chintu chachibili nchitweelede kuchita kuti tujane kubotelwa kwachoonzyo.

PONA KWEENDELANA AZYEELELO ZYAJEHOVA

9. Njiili nzila yachibili iikonzya kupa kuti tubotelwe chachoonzyo?

⁹ CHACHIBILI: Kuti tubotelwe chachoonzyo, tweelede kupona kweendelana azyeelelo zyaJehova. Sintembawuzyo wakalemba kuti: “Ulikkomene muntu woonse uuyoowa Jehova, ooyo weenda munzila zyakwe.” (Int. 128:1) Kuyoowa Jehova chaamba kuti tweelede kumulemeka kwiinda mukutantamuka kuchita zintu zipa kuti anyeme. (Tus. 16:6) Nkinkaako, tweelede kweezya amanguzu eesu woonse kupona kweendelana azyeelelo zyaJehova zyakuziba chibotu achibi mbuli mbuzipandulwidwe muBbayibbili. (2 Kor. 7:1) Tulabotelwa kuti twayanda zintu Jehova nzyayanda akuzonda zintu nzyazonda.—Int. 37:27; 97:10; Rom. 12:9.

10. Kweendelana alugwalo lwa Baroma 12:2, nguuli mulimu ngutulaawo?

¹⁰ Bala Baroma 12:2. Muntu ulakonzya kuziba kuti Jehova nguwe ulaacheelelo chakutusalila chibotu achibi alubo weelede kuzumina kuti zyeelelo zyaLeza zilikabotu. Muchikozyano, muntu ulakonzya kuziba kuti mfulumende ilaacheelelo chakubuzya bantu mbubeelede kweenzya moota zyabo. Pesi madilayiva alakonzya kusotoka mulawu ooyo kwiinda mukuchijaanisya moota munzila iitazumizigwi aamulawu. Nkinkaako, swebo tutondeezya kuti tulazilemeka zyeelelo zyaJehova kwiinda mukupona kweendelana aazyeelelo eezyo. (Tus. 12:28) Davida wakalimvwa munzila eeyo, naakali kwaambuula atala aJehova, wakati: “Yebo ulandipa kuzyiba nzila yabuumi. Kumbele lyako kuli kukondwa kutaambiki; kujanza lyako lyalulyo kuli lukkomano mane kukabe kutamani.”—Int. 16:11.

11-12. (a) Kuti katukataazikene naakuti katutakwe manguzu, niinzi nzitweelede kubikkila maanu? (b) Majwi aali muli Bafilipi 4:8, atugwasya biyeni nituyanda kusala zyakulikondelezya?

¹¹ Kuti katukataazikene naakuti katuli twamana manguzu, nga twalimvwa katuyanda kuchita chimwi chintu chikonzya kumaninsya penzi eelyo. Zilikabotu eezi, pesi tweelede kubikkila maanu kuti tutachiti zintu nzyatayandi Jehova.—Ef. 5:10-12, 15-17.

¹² Mulugwalo ndwaakalembela maKkristu bakuFilipi, mwaapostolo Pawulu wakabasungwaazya kuti bayeeyesesye atala azintu ‘ziluleme, . . . zisalala, . . . ziyandwa, azibotu.’ (Bala Bafilipi 4:8.) Nikuba kuti Pawulu taakabikka mulawu atala azyakulikondelezya pesi wakatondeezya kuti ziyanda kubikkila maanu chiindi muntu nasala zyakulikondelezya. Yezya eezi: Kufumbwa mpubona bbala lyakuti “zintu” muvesi eeyi, bikka bbala lyakuti, “miimbo,” “mamuuvi,” “mabbuku aakubala” naakuti “mavidiyo geemu.” Kuchita oobo, kulakugwasya kuti ubone zintu zitambulika kuli Leza azintu zitamubotezyi. Tuyanda kuti nzila njituponaayo yeendelane aazyeelelo zyaJehova zisumpukide. (Int. 119:1-3) Eezi ziyoopa kuti tube aamoyo uutatupi mulandu alubo tuyoolipeda kubweza ntaamu iitobela iikonzya kutugwasya kuti tujane kubotelwa kwachoonzyo.—Mil. 23:1.

BIKKA JEHOVA MUBUSENA BWAKUSAANGUNA

13. Nchiichili chintu chachitatu chikonzya kupa kuti tujane kubotelwa kwachoonzyo? (Johane 4:23, 24)

¹³ CHACHITATU: Tweelede kuba aachoonzyo chakuti kukomba Jehova tukubikka mubusena bwakusaanguna mubuumi bwesu. Mbukunga Mulengi wesu, Jehova uleelela kuti tumukombe. (Chi. 4:11; 14:6, 7) Eezi zipa kuti tubikke kukomba Jehova mubusena bwakusaanguna munzila njayanda, kwiinda mukumukomba “mumuuya amukasimpe.” (Bala Johane 4:23, 24.) Tuyanda kuti muuya uusalala utuzulwide mubukombi bwesu, munzila yeendelana aakasimpe kazwa muJwi lyaLeza, Bbayibbili. Tweelede kubikka Jehova mubusena bwakusaanguna nikuba kuti nkutukkala mulimu wesu ulakasigwa. Kwaambuula oobu, bakwesu abachizi bayinda ku100 balisungidwe akaambo kakuti Mbaakamboni baJehova.c Nikuba oobo, bakwesu abachizi aaba, balabotelwa nkaambo nga beezya amanguzu aabo woonse kuti bajane mweenya wakukomba, kubala akubuzya bamwi atala aLeza wesu aBwaami bwakwe. Chiindi nitusampulwa naakuti kupenzegwa, tulakonzya kubotelwa akaambo kakuti Jehova nga ulaandiswe akuti uyootupa bulumbu akaambo kakusyomeka kwesu.—Jak. 1:12; 1 Pet. 4:14.

ZYAKACHITIKA MUBUUMI

14. Niinzi zyakachitikila umwi uuchikula wakuTajikistan alubo nkamboonzi?

¹⁴ Zintu zilikuchitikila bamwi zilikutondeezya kuti, kuchita zintu zitatu zyaambwa aajulu aawa kupa kuti tujane kubotelwa kwachoonzyo, nikuba kuti zyiimo zilikabotu naakuti pe. Muchikozyano, umwi mulombe ulaaminyaka iili 19 uutegwa Jovidon Bobojonov uukkala kuTajikistan wakabikkwa mujele akaambo kakukaka kunjila mulimu wachisooja. Mu4 October 2019, bakamubweza aanguzu kulimbabo mpawo bakaakumubikka mujele kwamyeezi mpawo bakali kumujata mbuli chigwebenga. Nyuzi zili atala akutajatwa kabotu nkwaakachitwa zyakazibikana nyika yoonse. Kwakaambilizigwa kuti wakali kuumwa akumanikizigwa kuti anjile mumulimu wachisooja akuti azwaate yunifoomu yachisooja. Kuzwa aawo, wakazootolwa kulilimwi jele kwakali kubelekwa loko, mpawo mweendelezi wanyika eeyo wakamweetelela mpawo wakaamba kuti agwisigwe mujele. Nikuba kuti mulombe ooyu wakali muchiimo chiyumu, pesi wakayinkilila kunembo kasyomeka alubo wakali kubotelwa. Niinzi zyakali kupa kuti abotelwe? Nkaambo wakalizi kuti weelede kuzulwidwa aaLeza.

15. Jovidon wakali kuchijana kuli chakulya chamubukombi naakali mujele?

¹⁵ Naakali mujele, Jovidon wakali kulya chakulya chamubukombi nikuba kuti taakalikwe Bbayibbili naakuti limwi lyamabbuku eesu. Wakazichita biyeni eezyo? Bakwesu abachizi bakubusena ooko nkwaakabede bakali kumweetela chakulya alubo bakali kulemba lugwalo lwabuzuba aamapepabbeki aakali aazintu nzibakali kumweetela. Eezi zyakali kupa kuti akonzye kubala Bbayibbili akuti ayeeyesesye atala anzyaakali kubala buzuba abuzuba. Naakagwisigwa mujele, wakabuzya bantu batanasungwa kuti: “Kuyandikana loko kubelesya lwaangunuko lwako, kuti ube aaluzibo atala aJehova kwiinda mukubala Jwi lyakwe amabbuku eesu.”

16. Niinzi zyakagwasya Jovidon kuti alisimye?

¹⁶ Jovidon wakali kupona kweendelana azyeelelo zyaJehova. Kwiinda kuti abikkile maanu kumizeezo iitali kabotu akutalika kulijata munzila iitali kabotu, Jovidon wakabikkila maanu kuli Jehova akuzintu nzyayanda. Jovidon wakali kubona bubotu bwazintu zyakalengwa aaLeza. Buzuba abuzuba kuseeni wakali kubuka kalikuswiilizya kulila kwatuyuni. Mansiku wakali kulanga mweezi anyenyeezi. Wakati: “Zipo eezi zizwa kuli Jehova zyakapa kuti ndibotelwe alubo zyakandisungwaazya.” Kuti katuli bantu balumba akaambo kachakulya chamubukombi nchatupa Jehova achakulya chakumubili, tuyoobotelwa. Alubo kubotelwa ooku, kuyoopa kuti tulisimye.

17. Majwi aali muli 1 Petro 1:6, 7, kujana amugwasya biyeni muntu uuli muchiimo chikozyenie aachaJovidon?

¹⁷ Jovidon wakali kubikka kukomba Jehova mubusena bwakusaanguna. Wakalizi kuti kukkala kasyomeka kuli Leza wakasimpe nchintu chiyandikana loko. Jesu wakati: “NguJehova Leza wako nguyelede kukomba alubo nguwe alikke nguyelede kubelekela mulimu uusalala.” (Lk. 4:8) Balupati-pati bamasooja amasooja, bakali kuyanda kuti Jovidon asiye chikombelo chakwe. Pesi wakali kukomba kazizwa aansi aamoyo buzuba abuzuba mansiku kakumbila Jehova kuti amugwasye kuti ataleki pe kusyomeka kulinguwe. Nikuba kuti Jovidon taakali kujatwa munzila iili kabotu pesi taakwe naakaleka pe kusyomeka kuli Jehova. Eezi zipa kuti abotelwe loko lino. Kugwisigwa changuzu kulimbabo, kuumwa akusungwa kwakagwasya Jovidon kuti abe aalusyomo lusimide loko.—Bala 1 Petro 1:6, 7.

18. Niinzi chikonzya kutugwasya kuti tukkale katubotelwa?

¹⁸ Jehova ulizizi zintu zipa kuti tubotelwe chachoonzyo. Kuti twabelesya zintu eezi zitatu zipa kuti tujane kubotelwa kwachoonzyo, tulakonzya kubotelwa nikuba katuli muzyiimo ziyumu. Alubo andiswe tuyookonzya kwaamba kuti: “Balikkomene bantu aabo bajisi Jehova kali Leza wabo!”—Int. 144:15.