Luyando Alupe Kuti Wiinkilile Kunembo Kukambawuka

1. Niinzi nzitwakamvwa kumuswaangano uuchitwa munyaka amunyaka wamu2023?

KUMUSWAANGANO uuchitwa munyaka amunyaka wamu2023,a twakamvwa atala akubambululwa kupya kwazintu nzitusyoma alubo twakamvwa zizibisyo zibotezya loko zili atala amulimu wesu wakukambawuka. Muchikozyano, twakamvwa kuti bantu batakombi balakonzya kuzoojana mweenya wakuba kubbazu lyabakombi baJehova nikuba chiindi Bbabbiloni Mupati kali wanyonyoonwa. Alubo twakamvwa kuti kuzwa muNovember 2023, basikupupulula makani aaBwaami kuli zimwi nzibatachilembi pe aamalipoti aabo aamulimu wakukambawuka. Kuchincha ooku kulikupa kuti mulimu wakukambawuka ubonekaanga tawuchiyandikani loko na? Teembubo pe!

2. Niinzi chipa kuti mulimu wesu wakukambawuka uyandikane loko buzuba abuzuba? (Makko 13:10)

² Buzuba abuzuba, mulimu wesu wakukambawuka tuwubona kawuyandikana loko. Nkamboonzi? Akaambo kakuti kwasyaala chiindi chifwiifwi loko kuti mamanino asike. Atubone nzyaakaamba Jesu atala amazuba aakumamanino kunkani eeyi yamulimu wakukambawuka. (Bala Makko 13:10.) Mubbuku lyaMateyo, Jesu wakaamba kuti makani mabotu akali kuzookambawukwa munyika yoonse mpawo “mamanino” azoosika. (Mt. 24:14) Bbala lyakuti “mamanino” lyaamba kunyonyoonwa kwanyika eeyi mbi chakumaninina. Jehova wakabubikka kale ‘buzuba a-awa’ nizitazoochitike eezi. (Mt. 24:36; 25:13; Mil. 1:7) Buzuba bumwi abumwi butuswenzya aafwiifwi loko abuzuba mbwaakasala Jehova. (Rom. 13:11) Nkinkaako, tweelede kwiinkilila kunembo kukambawuka kusikila mamanino azoosike.

3. Niinzi chipa kuti tukambawuke?

³ Ngoyu mubuzyo uuyandikana loko toonse ngutweelede kuyeeyesesya atala anguwo: Niinzi chipa kuti tukambawuke makani mabotu? Luyando ndulo lupa kuti tukambawuke. Nzituchita mumulimu wakukambawuka, zitondeezya kuti tulaayanda makani mabotu, tulabayanda bantu alubo kwiinda zyoonse, tulamuyanda Jehova azina lyakwe. Atulange-lange twaambo ootu kamwi akamwi.

TULAKAMBAWUKA AKAAMBO KAKUTI TULAAYANDA MAKANI MABOTU

4. Niinzi nzitunga twachita kuti twamvwa makani mabotu?

⁴ Yeeya atala ambulimvwa kuti wamvwa makani mabotu. Nga wamvwa biyeni kuti wamumpuli watumbuka naakuti umwi wakujanina mulimu nguyanda loko? Zili aantanganana kuti nga kakwaata kaango zyakuti nga wayanda kubuzya bamwi. Teenzizyo zyakachitika na nwaakamvwa makani mabotu aali atala aBwaami bwaLeza?

5. Kasimpe kamuBbayibbili nkwaakayiya kakapa kuti uchiteenzi? (Langa chifanikisyo.)

⁵ Yeeya atala ambwakamvwa chiindi nwaakasaanguna kwiiya kasimpe kamuJwi lyaLeza. Wakayiya kuti Taateesu wakujulu ulakuyanda, uyanda kuti ube mumpuli yabakombi bakwe, wakasyomezya kuti uzoomaninsya kuchisa amapenzi, uyanda kuti ube aabulangilizi bwakuzoobona babbululu bako bafwide nibatazoobusigwe munyika mpya azimwi. (Mk. 10:​29, 30; Joh. 5:​28, 29; Rom. 8:​38, 39; Chi. 21:​3, 4) Kasimpe aaka kakapa kuti ubotelwe loko. (Lk. 24:32) Wakaziyanda nzwaakayiya alubo wakakanza kuti ubuzye bantu boonse atala anzizyo.—Kozyanisya a Jeremiya 20:9.

6. Twiiyaanzi kuzintu zyakachitikila Ernest aRose?

⁶ Atulange-lange zyakachitikila bamwi. Mukwesu uutegwa Ernestb wakali waamba kusisya minyaka iili 10 chiindi wisi naakafwa. Ernest wakaamba kuti: ‘Ndakali kulibuzya kuti: ‘Ndeende wakaya kujulu na? Naakuti wakafwidaato zyakuti tandichizoomuboni lubo pe?’ Ndakali kweemuzya bamwi bakachili aamawisi. Ernest wakali kukkala kayinka kukabanda kawisi, mpawo wakali kufugama akukomba kati: “Leza kaka, ndiyanda kuziba kuti ndeende ulikuli.” Kakuli kwiinda minyaka iisika ku17 wisi kafwide, Ernest wakasaanguna kwiiya Bbayibbili. Wakabotelwa loko naakayiya kuti bafwide taakwe nchibazi pe, kuli mbuli kuti balikoona. Alubo wakayiya kuti bafwide bazoobuka muchiindi chilikunembo. (Muk. 9:​5, 10; Mil. 24:15) Ernest wakazoozijana nsandulo zyamibuzyo yakali kumukataazya kwaminyaka myiingi. Kasimpe kamuBbayibbili nkaakali kwiiya kakapa kuti abotelwe loko. Alubo mwanakazi wakwe Rose anguwe wakasaanguna kwiiya Bbayibbili. Nzyaakali kwiiya Rose zyakali kumunoneezya. Mu1978, bakabbabbatizigwa. Ernest amwanakazi wakwe bakasaanguna kubuzya bamumpuli, beenzinyina abamwi nzibakali kwiiya muBbayibbili. Kuchita zintu eezi, kwakapa kuti Ernest aRose bagwasye bantu bayinda ku70 kuti bazibe Jehova akusala kuti babbabbatizigwe.

7. Kuyanda kasimpe kamuBbayibbili kupa kuti tuchiteenzi? (Lukka 6:45)

⁷ Kuti twakayanda loko kasimpe kamuBbayibbili, kalapa kuti tubuzye bamwi atala anzitwiiya. (Bala Lukka 6:45.) Nga twalimvwa mbuli basikwiiya baJesu bakaamba kuti: “Iswe tatukooleka pe kwaambuula atala azintu nzitwakabona anzitwakamvwa.” (Mil. 4:20) Tulakayanda kasimpe zyakuti tuyanda kubelesya kufumbwa myeenya njitujana kuti tubuzye bantu atala amakani mabotu.

TULAKAMBAWUKA AKAAMBO KAKUTI TULABAYANDA BANTU

8. Niinzi chipa kuti tubuzye bamwi atala amakani mabotu? (Langa kabbokesi katii, “Yanda Bantu—Gwasya Bantu Kuti Babe Basikwiiya.”) (Langa chifanikisyo.)

⁸ Mbuli Jehova aJesu, tulabayanda bantu. (Tus. 8:31; Joh. 3:16) Tulabeetelela aabo ‘batakwe Leza’ abaabo ‘batakwe bulangilizi.’ (Ef. 2:12) Akaambo kamapenzi ngibaswaana bantu buzuba abuzuba, kuli mbuli kuti balikunikila mumugodi uulaamaanzi. Nkinkaako, chiindi nitubakambawukila makani mabotu aaBwaami, nga kuli mbuli kuti tulikubanuna mumugodi ooyo. Kuyanda bantu akubeetelela kupa kuti tubakambawukile makani mabotu. Chiindi nibamvwa makani mabotu, nga baba aabulangilizi, balabotelwa alubo nga bajana mweenya wakuti bazoopone “buumi bwachoonzyo” munyika mpya.—1 Tim. 6:19.

9. Njiili nchenjezyo njitubuzya bamwi atala azintu ziyoochitika kunembo alubo nkamboonzi? (Ezekieli 33:​7, 8)

⁹ Alubo kuyanda bantu kupa kuti tubachenjezye kuti nyika eeyi mbi yaba aafwiifwi kunyonyoonwa. (Bala Ezekieli 33:​7, 8.) Tulabeetelela basimayakilane besu abamumpuli zyesu batakombi Jehova. Biingi babo balikupona kabatazi pe kuti “kuzooba mapenzi mapati aatanaba aabuzuba achitika kuzwa kumatalikilo aanyika kusikila sunu, alubo taazoochitiki lubo pe.” (Mt. 24:21) Tuyanda kuti bantu aabo bazibe zitazoochitike chiindi Jehova nayoobeteka bantu. Chikombelo chakubeja nchicho chitazoosaangune kunyonyoonwa mpawo nikutazoonyonyoonwe nyika eeyi mbi. (Chi. 16:​14, 16; 17:​16, 17; 19:​11, 19, 20) Tuli aachiyandisyo chakuti bantu biingi baswiilile nchenjezyo eeyi akuti baze kuzookomba Jehova katulaamwi mubukombi bwakasimpe. Kutegwani abaabo batayandi kutuswiilila kuswaanizya abamumpuli zyesu batakombi?

10. Nkamboonzi nikuyandikana lino kuti tuchenjezye bantu atala azintu ziyoochitika muchiindi chilikunembo?

¹⁰ Mbuli mbukwakapandululwa muchiiyo chakayinda, kulakonzeka kuti Jehova uyoofutula aabo batakasaangune kumusyoma chiindi nibazoobona Bbabbiloni Mupati kali kunyonyoonwa. Kuti kakuli boobo, tweelede kukubona kakuyandikana loko kubuzya bantu atala anchenjezyo eeyi. Tweelede kuyeeya makani aaya: Kuti twabakambawukila bantu lino, kulakonzeka kuti bazooziyeeya nzitunooli twabakambawukila muchiindi chilikunembo. (Kozyanisya a Ezekieli 33:33.) Balakonzya kuzooyeeya nchenjezyo njibakamvwa kulindiswe mpawo bazoosale kukomba Jehova katuli aamwi zintu kazitanabija. Mbuli mulindi wajele wakuFilipi, wakachincha chiindi naakamvwa “muzuzumo wanyika mupati,” amwi bantu batatuswiilili pe lino, balakonzya kuzoochincha chiindi nibazoobona Bbabbiloni Mupati kali wanyonyoonwa.—Mil. 16:​25-34.

TULAKAMBAWUKA AKAAMBO KAKUTI TULAMUYANDA JEHOVA AZINA LYAKWE

11. Niinzi nzitukonzya kuchita kuti tupe Jehova bulemu, lulemeko amanguzu eesu? (Chiyubunuzyo 4:11) (Langa chifanikisyo.)

¹¹ Kaambo kayandikana loko kapa kuti tukambawuke makani mabotu nkakuti tulamuyanda Jehova Leza akuti tulaliyanda zina lyakwe lisalala. Mulimu wakukambawuka tuwubona kayili nzila yakutembawula Leza akaambo kakuti tulamuyanda. (Bala Chiyubunuzyo 4:11.) Tulazumina amoyo woonse kuti Jehova Leza, uleelela kutambula bulemu alulemeko amanguzu kuzwa kubakombi bakwe. Tupa Jehova bulemu alulemeko chiindi nitubuzya bantu bukamboni bwakuti nguwe “wakalenga zintu zyoonse” akuti iswe tulapona akaambo kakuti nguwe wakatupa buumi. Alubo tumupa manguzu eesu chiindi nitubeleka changuzu katubelesya chiindi azintu nzitulaazyo kuti tukambawukile bamwi kweendelana azyiimo zyesu. (Mt. 6:33; Lk. 13:24; Kol. 3:23) Mubufwiifwi, tulakambawuka akaambo kakuti tulamuyanda Leza. Alubo tubuzya bamwi atala azina lyakwe akubabuzya buntu mbwalaabo. Nkamboonzi?

12. Kujana twalisalazya biyeni zina lyaJehova mumulimu wakukambawuka?

¹² Kuyanda Jehova kupa kuti tusalazye zina lyakwe. (Mt. 6:9) Tuyanda kubuzya bamwi kuti zintu zibi nzyaakaamba Saatani atala aJehova nzyakubeja. (Matl. 3:​1-5; Job. 2:4; Joh. 8:44) Chiindi nitukambawuka, nga tuli aachiyandisyo chakubuzya bantu boonse bayanda kuziba kuti Jehova ngwani akuti ulibiyeni. Tuyanda kubuzya bantu kuti buntu bupati mbwalaabo Leza, nduyando. Luyando oolo ndulo lupa kuti achite zintu munzila yabululami. Alubo tuyanda kuti bantu bazibe kuti Bwaami bwaLeza bwaba aafwiifwi kuti buzoomaninsye mapenzi woonse akupa kuti bantu bakkale muluumuno kababotelwa. (Int. 37:​10, 11, 29; 1 Joh. 4:8) Chiindi nitubuzya bantu zintu eezi zili atala aJehova, nga tulikusalazya zina lyakwe. Alubo nga twabotelwa akaambo kakuti tulikuchita zintu zitondeezya kuti tuli Bakamboni baJehova choonzyo. Nkamboonzi nitwaamba oobo?

13. Niinzi chipa kuti tulidunde akaambo kakwiitwa kuti tuli Bakamboni baJehova? (Isaya 43:​10-12)

¹³ Jehova wakatusala kuti tube “bakamboni” bakwe. (Bala Isaya 43:​10-12.) Muminyaka yayinda, lugwalo lwakazwa kuKabunga Keendelezya lwakaamba kuti: “Nchilongezyo chipati loko kwiitwa kuti tuli Bakamboni baJehova.” Nkamboonzi? Atuteedi umwi muntu wakubejelezya chimwi chintu chitali kabotu. Chiindi nuyanduula muntu uutakwiiminine kuti abuzye bamwi kuti zintu zyakaambwa atala anduwe nzyakubeja, ngwani ngukonzya kusala kuti akwiiminine? Zilaantanganana kuti ulasala muntu nguuzi, ngusyoma alubo nguli aachoonzyo chakuti, kuti wakwiiminina, bamwi balasyoma kuti nzyalikwaamba nkasimpe. Kwiinda mukutusala kuti tube Bakamboni bakwe, Jehova wakatondeezya kuti utuzi kabotu akuti ulatusyoma kuti tulababuzya choonzyo bantu kuti nguwe alikke Leza wakasimpe. Nchilongezyo chipati loko kuba Bakamboni baJehova. Eezi zipa kuti tubeleke changuzu katubelesya kufumbwa mweenya ngutujana kuti tusalazye zina lyaJehova kumanwa woonse akaambwa atala anguwe. Kuti twachita oobo, nga tulikutondeezya kuti tulalidunda akaambo kakuba Bakamboni baJehova.—Int. 83:18; Rom. 10:​13-15.

TUNOOYINKILILA KUNEMBO KUKAMBAWUKA KUSIKILA KUMAMANINO

14. Niinzi nzitulangilila kuti zizoochitika kunembo?

¹⁴ Kuli zintu nzitulangilila kuti zizoochitika muchiindi chilikunembo. Kwiinda mukugwasigwa aaJehova, tulangilila kuzoobona bantu biingi kabali kutambula kasimpe mapenzi mapati katanasaanguna. Alubo tulangilila kuti chiindi naazoosaanguna mapenzi mapati, bantu bazookaka kweendelezegwa aaSaatani mpawo bazoosala kukomba Jehova katulaamwi.—Mil. 13:48.

15-16. Niinzi nzitweelede kwiinkilila kunembo katuchita alubo tunoozichita kusikila lili?

¹⁵ Nituchilindila buzuba oobo, kuli mulimu ngutweelede kuchita. Tuli aachilongezyo chakutola lubazu mumulimu uutazooyindululwi pe. Mulimu ooyu ngwakukambawuka makani mabotu aali atala aBwaami bwaLeza munyika yoonse. Aachiindi nchicheecho, tweelede kwiinkilila kunembo kuchenjezya bantu atala azintu zitazoochitike lino-lino. Bantu beelede kuziba kuti mamanino aabwiime bwazintu oobuno aba aafwiifwi loko. Chiindi chakubeteka nichazoosika, bayooziba kuti zintu nzitwakali kubakambawukila zyakali kuzwa kuli Jehova Leza.—Ezk. 38:23.

¹⁶ Tukanzide kuchitaanzi? Kuyanda makani mabotu, kuyanda bantu alubo kwiinda zyoonse kuyanda Jehova Leza azina lyakwe, kweelede kupa kuti twiinkilile kunembo katuli kukambawuka makani mabotu chabusungu kusikila Jehova azoowambe kuti, “Kwakkwana.”