Atukkale Katweenda Aalusyomo

1. Nkamboonzi mwaapostoli Pawulu naakali kubotelwa atala anzila njaakali kuponaayo?

AALI CHIMWI chiindi, mwaapostoli Pawulu wakali waziba kuti wakali waba aafwiifwi kuti ajayigwe. Pesi nzila njaakali kuponaayo yakali kupa kuti akkutisikane mubuumi. Wakaamba kuti: “Ndachijaana mumuzundaano kusikila kumamanino, ndalubamba lusyomo.” (2 Tim. 4:​6-8) Pawulu wakasala munzila yabusongo kuti alipede kubelekela Jehova alubo wakali aachoonzyo chakuti nzyaakali kuchita zyakali kupa kuti Jehova abotelwe. Andiswe tuyanda kusala kuchita zintu zibotu alubo nzyayanda Jehova. Kujana twazichita biyeni?

2. Chaambaanzi kweenda aalusyomo?

² Pawulu naakali kwaambuula atala anguwe abamwi maKkristu basyomeka wakaamba kuti: “Tulikweenda aalusyomo kutali aazintu nzitubona.” (2 Kor. 5:7) Wakali kwaambaanzi? MuBbayibbili, chimwi chiindi, bbala lyakasandululwa kuti “kweenda” lyaamba buumi mbwasala kupona muntu. Bantu batakwe lusyomo muli Jehova, zintu nzibasala ziyeeme aazintu nzibabona, nzibamvwa ambubalimvwa. Pesi muntu uuli aalusyomo muli Jehova, zintu nzyasala ziyeeme aakuti Jehova uzibona biyeni zintu eezyo. Zintu nzyachita zitondeezya kuti ulaachoonzyo chakuti Jehova uzoomulongezya akaambo kakuti utobelezya malayilile aazwa muJwi lyakwe.—Int. 119:66; Heb. 11:6.

3. Mbuubuli bubotu buba kuti tweenda aalusyomo? (2 Bakkorinte 4:18)

³ Chimwi chiindi toonse nga twasala zintu akaambo kakuti twazibona, twakamvwa umwi muntu naakuti tuli kuziyanda zintu eezyo. Tulakonzya kunjila mupenzi kuti twabikkila maanu kuzintu eezi kupela nitusala ziyandikana. Nkamboonzi? Zintu nzitubona anzitumvwa zilakonzya kupa kuti tusale munzila iitali kabotu. Kuti twasala zintu kweendelana azintu nzitubona, nzitumvwa naakuti mbutulimvwa, tulakonzya kuchita zintu Jehova nzyatayandi pe kuti tuchite. (Muk. 11:9; Mt. 24:​37-39) Pesi kuti tweenda aalusyomo tulakonzya kusala zintu “zitambulika kuMwaami.” (Ef. 5:10) Kutobelezya malayilile aaLeza kulapa kuti tube aaluumuno lwamumizeezo akuti tubotelwe chachoonzyo. (Int. 16:​8, 9; Is. 48:​17, 18) Kuti twakkala katweenda aalusyomo tuzoojana buumi butamani.—Bala 2 Bakkorinte 4:18.

4. Niinzi zitondeezya kuti muntu ulikweenda aalusyomo naakuti ulikweenda aazintu nzyabona?

⁴ Tuziba biyeni kuti tulikweenda aalusyomo naakuti tulikweenda aazintu nzitubona? Kulanga-langa mibuzyo iitobela kulakonzya kutugwasya: Niinzi nzitubikkila maanu chiindi nituyanda kusala? Tubikkila maanu kuzintu nzitubona kupela na? Naakuti tuswiilila milawu yaJehova na akwiisyoma chiindi nitusala? Atubone mbutukonzya kwiinkilila kunembo kweenda aalusyomo munkani ziyandikana eezi zitobela: Chiindi nitusala mulimu, nitusala muntu wakukwatanaawe anitwapegwa malayilile ambunga. Mukaambo kamwi akamwi, tulabona nzitweelede kubikkila maanu kuti tusale kabotu.

CHIINDI NUYANDA KUSALA MULIMU

5. Niinzi nzitweelede kubikkila maanu chiindi nitusala mulimu?

⁵ Toonse tuyanda kujana zintu zyakuponaazyo azyampuli zyesu. (Muk. 7:12; 1 Tim. 5:8) Imwi milimu ilabbadala. Milimu eeyo ipa kuti muntu akonzye kujana zintu ziyandikana buzuba abuzuba akuti abikke imwi mali aambali njatazoobelesye muchiindi chilikunembo. Pesi imwi milimu, ifozya mali nche zyakuti mali eeyo ikkwana kuula zintu ziyandikana zyampuli yakwe kupela. Kutanazumina mulimu, nga wasaanguna kubuzya kuti unoofola maliinzi. Pesi kuti muntu katakwe lusyomo muli Leza nzizyo kupela nzyabikkila maanu eezi.

6. Kujana twatondeezya biyeni kuti tweenda aalusyomo chiindi nitusala mulimu? (Mahebberu 13:5)

⁶ Kuti katweenda aalusyomo, tuyoobikkila maanu kuti mulimu ooyu tawupambanisyi bweenzuma mbutulaabo na aJehova. Tulakonzya kulibuzya kuti: ‘Mulimu ooyu tawuzoopi kuti na ndiliswaanizye muzintu nzyazonda Jehova?’ (Tus. 6:​16-19) ‘Mulimu ooyu uzoopa kuti ndikachilwe kuchita zintu zyamubukombi na, naakuti kupa kuti ndikkale kule ampuli yangu kwachiindi chilamfu?’ (Flp. 1:10) Kuti wasandula kuti iiyi kumibuzyo eeyi, kulikabotu kuti utawuzumini pe mulimu ooyu nikuba kuti milimu kayitali kujanika-janika. Akaambo kakuti tweenda aalusyomo, zintu nzitusala zitondeezya kuti tulaachoonzyo chakuti Jehova uzootupa nzituyandikana.—Mt. 6:33; bala Mahebberu 13:5.

7-8. Umwi mukwesu wakuSouth America wakatondeezya biyeni kuti weenda aalusyomo? (Langa chifanikisyo.)

⁷ Atubone nzyaakaamba umwi mukwesu uutegwa Javiera wakuSouth America atala ambukuyandikana kweenda aalusyomo. Wakaamba kuti: “Ndaka-apulayila mulimu wakali kwiiyindulula tubili mali njindakali kufola. Ndakali kuuyanda mulimu ooyu nkaambo ndakali kulibuzya kuti ndizookkala aantobo.” Nikuba oobo, Javier wakali aachiyandisyo chakuba payona. Wakayungizya kuti: “Bakandiita kumulimu ooyu kuti bandibuzye mbundakali kunoobeleka. Kanditanayinka kumulimu ooyu, ndakakomba kuli Jehova kuti andigwasye nkaambo ndakalizi kuti ulizizi nzindiyanda. Ndakali kuyanda mulimu uufozya mali nyingi pesi teendakali kuyanda pe kuti undikachizye kuzuzikizya zipeekezyo zyangu zyamubukombi.”

⁸ Javier wakaamba kuti: “Maneja naakali kundipandulwida kuti ndinoobeleka biyeni wakandibuzya kuti chiindi chiingi ndinoobeleka ovatayimu. Ndakamupandulwida kuti tandikonzyi pe kunoobeleka ovatayimu akaambo kazipeekezyo zyamubukombi nzindilaazyo.” Javier wakazoowukaka mulimu ooyu. Mviki zibili zyakatobela, wakasaanguna kupayona. Mumunyaka nguyooyo wakazoojana mulimu uubelekwa kwamazuba mache. Wakaamba kuti: “Jehova wakazimvwa nkombyo zyangu alubo wakapa kuti ndijane mulimu weendelana apulogilamu yangu yakupayona. Ndilabotelwa kuti ndakajana mulimu uundizumizya kuti ndibelesye chiindi changu chiingi mukubelekela Jehova abakwesu.”

9. Wayiyaanzi kuli zyakachitikila Trésor?

⁹ Niinzi nzitweelede kuchita kuti twabona kuti mulimu ngutuli kubeleka tulikutuzumizya pe kuti tweende aalusyomo? Atubone zyakachitikila Trésor uuzwa kuCongo. Wakaamba kuti: “Mulimu wangu mupya ndakali kuuyandisya loko. Mali njindakali kufola kumulimu ooyu yakali nyingi zyakuti yakali kwiiyindulula tutatu mali njindakali kufola kumulimu ngundakali kubeleka kusaanguna alubo bantu bakali kundilemeka.” Nikuba oobo, Trésor wakali kukkala katanjili miswaangano akaambo kakuti wakali kukkala kabeleka ovatayimu. Alubo chimwi chiindi babelesinyina bakali kumubuzya kuti ataambi pe kuti kuli busosi bwakali kuchitika aakkampani. Trésor wakali kuyanda kusiya mulimu ooyu pesi wakali kukataazikana kuti ulakkala katabeleki. Niinzi chakamugwasya? Wakaamba kuti: “Habbakkukki 3:​17-19 yakandigwasya kumvwisisisya kuti nikuba kuti tandichikwe mali nyingi, Jehova wakali kunoondilangania. Nkinkaako, ndakasiya mulimu ooyo.” Wakajinsya kuti: “Mabbosi miingi bayeeya kuti, kuti muntu kabeleka mulimu uufozya mali nyingi ulalipeda kuchita kufumbwa chintu nikuba kutajana chiindi chakuba aampuli yakwe akuchita zintu zyamubukombi. Ndilikubotelwa kuti ndakakwabilila bweenzuma mbundilaabo aJehova abwampuli yangu. Nikwakayinda munyaka, Jehova wakandigwasya kuti ndijane mulimu uupa kuti ndijane zintu nzindiyandikana akuti ndibe aachiindi chiingi chakumubelekela. Kuti twabikka zintu Jehova nzyayanda mubusena bwakusaanguna, kumasaangunino chimwi chiindi kulakonzya kutuyumina kujana zintu nzituyandikana, pesi Jehova ulatulangania.” Nichoonzyo kuti twasyoma malayilile aaJehova azisyomezyo zyakwe, tulayinkilila kunembo kweenda aalusyomo alubo uyootulongezya.

CHIINDI NUSALA WAKUKWATANAAWE

10. Niinzi chikonzya kupa kuti tweende aazintu nzitubona chiindi nitusala muntu wakukwatanaawe?

¹⁰ Lukwatano nchipo chizwa kuli Jehova alubo zili mulindiswe kuti tuyande kukwata naakuti kukwatwa. Kuti muchizi kali kuyanduula mukwesu wakukwatanaawe uulikabotu, ulakonzya kulanga buntu mbwalaabo, mbaboneka, mpuwo njalaayo, mali njalaayo, mikuli yamumpuli njalaayo ambapa kuti alimvwe.b Zintu eezi zilayandikana. Nikuba oobo kuti wabikkila maanu kuzintu eezi kupela nga ulikweenda aazintu nzyabona.

11. Kweenda aalusyomo kutugwasya biyeni chiindi nitusala muntu wakukwatanaawe? (1 Bakkorinte 7:39)

¹¹ Bakwesu abachizi banga batobelezya malayilile aaJehova chiindi nibasala muntu wakukwatanaawe bapa kuti Jehova abotelwe. Muchikozyano, babelesya malayilile aamuBbayibbili aakuti balindile kusikila bayinda “aachiimo chabukubusi” kabatanayeeya kuba mulukwatano. (1 Kor. 7:36) Baba aachoonzyo chakuti muntu uulikabotu wakukwatanaawe ulaabuntu Jehova mbwaamba kuti mbubo mbwayelede kubaabo mulumi uulikabotu naakuti mwanakazi uulikabotu. (Tus. 31:​10-13, 26-28; Ef. 5:33; 1 Tim. 5:8) Kuti muntu uutali Kamboni wayanda mukwesu naakuti muchizi, Kamboni nga waswiilila malayilile aakuti akwate naakuti akwatwe “muMwaami kupela” aajanika muli 1 Bakkorinte 7:39. (Bala.) Kuti bachita oobo, nga bayinkilila kunembo kweenda aalusyomo kabali aachoonzyo chakuti Jehova ulabagwasya kuti balimvwe kabotu.—Int. 55:22.

12. Wayiyaanzi kuchikozyano chaRosa?

¹² Atubone zyakachitikila Rosa, payona wakuColombia. Mulimu wakwe wakali kupa kuti abe aachiindi chiingi awumwi mwaalumi wakatali Kamboni. Mwaalumi ooyo wakasaanguna kumuyanda Rosa. Anguwe Rosa wakali kumumenena mate mwaalumi ooyo. Wakaamba kuti: “Wakali mwaalumi uulikabotu, wakali kugwasya bantu bamuchilawu chakwe alubo wakali muntu uulikabotu loko. Wakali kundichitila zintu zibotu. Wakali aabuntu boonse mbundakali kuyanda kumuntu ngundakali kulombozya kuzookwatanaawe pesi taakali Kamboni pe.” Wakayungizya kuti: “Kwakali kundiyumina kuti ndimubuzye kuti tandimuyandi pe nkaambo wakali kundichitila zintu zibotu. Aachiindi eecho, ndakalimvwa kandilendeleledwe alubo ndakali kuyanda kukwatwa pesi teendakayinamujana pe mukwesu.” Pesi Rosa taakwe naakabikkila maanu kupela kuzintu nzyaakali kubona. Wakayeeya kuti kusala ooku kwakali kuyoobupambanisya biyeni bweenzinyina mbwalaabo aJehova. Nkinkaako, wakaleka kumvwanana aamwaalumi ooyo alubo wakakkala kajisikini mumulimu waJehova. Nikwakayinda chiindi chifwiifwi, wakatambwa kuti anjile Chikolo chaBakambawusi baBwaami alubo lino ubeleka kali payona uuyandikana. Rosa wakaamba kuti: “Jehova wakandipa zilongezyo zyiingi zipa kuti ndibotelwe.” Nikuba kuti teekuuba pe kweenda aalusyomo munkani zili aachakuchita azintu ziyandwa aamoyo pesi kuti twakkala katubona zintu mbuli mbazibona Jehova tulagwasikana.

CHIINDI NITUPEGWA MALAYILILE AMBUNGA

13. Niinzi chikonzya kupa kuti tweende aazintu nzitubona chiindi nitupegwa malayilile ambunga?

¹³ Baalu, balangizi bamabazu, bakuwofesi yamutabi abamuKabunga Keendelezya ngabatupa malayilile aatugwasya kuti tubelekele Jehova. Niinzi nzitweelede kuchita kuti katutali kumvwisisisya kaambo kapa kuti tupegwe malayilile aayo? Tulakonzya kuzumbuuzya kuti malayilile aaya alagwasya na? Tulakonzya kusaanguna kubikkila maanu kukutamaninina kwabakwesu batupa malayilile aayo.

14. Niinzi chikonzya kutugwasya kuti tweende aalusyomo chiindi nitupegwa malayilile ambunga? (Mahebberu 13:17)

¹⁴ Kuti katweenda aalusyomo, tunoosyoma kuti Jehova ulikuzulwida mbunga yakwe akuti ulizizi zyiimo zyesu. Akaambo kazeezi tulafwambaana kuswiilila malayilile ngitupegwa alubo tuchita oobo katuli aamaboneno aalikabotu. (Bala Mahebberu 13:17.) Tulizi kuti kuswiilila kupa kuti mbungano yesu ijatane. (Ef. 4:​2, 3) Nikuba kuti bakwesu batuzulwida tabamaninide pe, tulaachoonzyo chakuti Jehova uzootulongezya kuti twaswiilila. (1 Sam. 15:22) Muchiindi cheelede, uzoobambulula zintu zyoonse ziyanda kubambululwa.—Mik. 7:7.

15-16. Niinzi chakagwasya uumwi mukwesu kuti ayende aalusyomo nikuba kuti wakali kuzumbuuzya atala amalayilile ngibakapegwa? (Langa chifanikisyo.)

¹⁵ Atubone zyakachitika zitondeezya bubotu buba akaambo kakweenda aalusyomo. Nikuba kuti mulaka wachiSpanish waambuulwa aabantu biingi muPeru, pesi bantu biingi baambuula milaka yamunyika eeyo. Umwi wamilaka eeyo mulaka wachiQuechua. Kwaminyaka myiingi, bakwesu abachizi baambuula chiQuechua bakali kuyanduula bantu baambuula mulaka ooyu mundawu njibakambawukila. Nikuba oobo, kuli malayilile aakazwa kumfulumende aakeelede kutobelezegwa, eezi zyakapa kuti kube kuchincha munzila yakukambawukila bantu. (Rom. 13:1) Akaambo kazeezi, bamwi bakakataazikana kababonaanga kuchincha ooku kwakali kuyoopa kuti kubayumine kukambawuka muchilawu eecho. Akaambo kakuti bakwesu bakachita kweendelana akuchincha ooku, Jehova wakalongezya kubeleka changuzu nkubakali kuchita kuti bajane bantu biingi baambuula chiQuechua.

¹⁶ Kevin mwaalu mumbungano yaambuulwa chiQuechua nguumwi wabantu aabo bakali kukataazikana. Wakaamba kuti: “Ndakalibuzya kuti, ‘Tunoobayanduula biyeni bantu baambuula chiQuechua?’” Kevin wakachitaanzi? Wakayungizya kuti: “Ndakayeeya lugwalo lwa Tusimpi 3:5 alubo ndakayeeya atala aMozesi. Jehova wakamupa malayilile aakali kubonekaanga taagwasyi. Jehova wakabuzya Mozesi kuti azulwide ma-Israyeli kuzwa mu-Ijipita kuya kuLwizi Lusalala ooko kwakali kubonekaanga tabakonzyi pe kuchija bantu baku-Ijipita bakali kubatobela. Nikuba oobo, Mozesi wakaswiilila alubo Jehova wakamulongezya munzila yachigambyo akaambo kakuti wakaswiilila.” (Kul. 14:​1, 2, 9-11, 21, 22) Kevin wakalilibambilide kuti abelesye nzila mpya yakukambawuka. Kwakaba mpinduunzi? Wakaamba kuti: “Ndakagamba loko kubona Jehova mbaakatulongezya. Kakutanaba mabambe aaya, twakali kweenda kwachiindi chilamfu katuli kukambawuka alubo chimwi chiindi, twakali kujana muntu uumwi naakuti babili baambuula chiQuechua. Lino tulikubikkila maanu kukambawukila kundawu kuli bantu biingi baambuula chiQuechua. Akaambo kazeezi, tuli aabantu biingi bakukambawukila, bakubweedela abakwiiyaabo Bbayibbili. Namba yabantu balikunjila miswaangano yakayungizya.” Nichoonzyo Jehova ulatulongezya chiindi choonse nitweenda aalusyomo.

17. Twayiyaanzi muchiiyo eechi?

¹⁷ Twalanga-langa zintu zitatu ziyandikana mutweelede kwiinkilila kunembo katweenda aalusyomo. Pesi tweelede kukkala katweenda aalusyomo muzintu zyoonse nzituchita mubuumi zili mbuli kusala zyakulikondelezya, nkani iili atala alwiiyo naakuti kukomezya bana. Kuzintu zyoonse nzitusala, tatweelede kugolela aakusala kuchita chintu eecho akaambo kakuti twachibona kachili kabotu mumeso eesu. Tweelede kubikkila maanu kuti zibujatikizya biyeni bweenzuma mbutulaabo aJehova, malayilile aakwe achisyomezyo chakwe chakuti ulatulangania. Kuti twachita oobo, tuyookonzya kweenda “muzina lya Jehova Leza wesu lyoonse alyoonse mane kukabe kutamani.”—Mik. 4:5.