Kumvwanana Aabakombima Kulatugwasya!

1-2. Niinzi chiyandikana loko kuli Jehova alubo uyanda kuti tuchiteenzi?

NZILA njitubajataayo bamwi iyandikana loko kuli Jehova. Jesu wakatuyiisya kuti, tweelede kuyanda basimayakilane besu mbuli mbutuliyanda. (Mt. 22:​37-39) Eezi ziswaanizya kubajata kabotu nikuba aabo batasyomi nzitusyoma. Kuti twachita oobo, tunooli tulikutobelezya chikozyano chaJehova Leza nkaambo “upa kuti zuba lyakwe lizwide bantu babi ababotu alubo upa kuti mvula iwe kubantu baluleme abataluleme.”—Mt. 5:45.

² Nikuba kuti Jehova ulabayanda bantu boonse, pesi mbayanda loko mbaabo bachita zilikabotu. (Joh. 14:21) Uyanda kuti tutobelezye chikozyano chakwe. Utusungwaazya kuti ‘tuyandane loko’ abakwesu abachizi. (1 Pet. 4:8; Rom. 12:10) Nzila njitweelede kubayandaayo bakombima, yeelede kukozyania anzila njitubayandaayo babbululu besu naakuti beenzuma baamoyo.

3. Niinzi nzitweelede kuyeeya atala aluyando?

³ Mbuli mbutubeleka changuzu kuti tulanganie maluba ngitunga twabyala kuchitila kuti akomene, mbulubede aluyando, tweelede kubeleka changuzu kuti lukomene. Mwaapostoli Pawulu wakasungwaazya maKkristu kuti: “Luyando lwanu lwabuzyalwanyokwe alwiinkilile kunembo.” (Heb. 13:1) Jehova uyanda kuti tukkale katubeleka changuzu kuti tuyande bamwi. Muchiiyo eechi, tulabona kuti nkamboonzi nitweelede kuyanda bakombima akuti nga tulazichita biyeni kuti twiinkilile kunembo katubayanda.

ZIPA KUTI TUMVWANANE AABAKOMBIMA

4. Mbuli mbukulembedwe muli Intembauzyo 133:​1, niinzi chikonzya kutugwasya kuti tukkale katubona mbukuyandikana kujatana kwabakwesu abachizi? (Langa zifanikisyo.)

⁴ Bala Intembauzyo 133:1. Tuzuminana aanzyaakaamba sintembawuzyo wakaamba kuti, kumvwanana aabantu bayanda Jehova ‘nkubotu’ alubo ‘kulakondelezya.’ Kuti muntu wakkala kabona munsamu buzuba abuzuba nga tachibuboni pe bubotu bwamunsamu ooyo. Andiswe tulakonzya kukachilwa kubona bubotu bwakujatana kwabakwesu abachizi akaambo kakuti tukkala katubabona. Niinzi nzitweelede kuchita kuti tukkale katubona bubotu bwabakombima? Tulayungizya kuyanda bakwesu abachizi kuti twabona umwi awumwi mbayandikana mumbungano ambatugwasya.

5. Kuyanda bakombima kubagwasya biyeni bamwi?

⁵ Bantu banjila miswaangano kakusaanguna ngabasungwaazigwa akaambo kaluyando ndututondeezyania. Akaambo kaluyando ndubabona, nga baba aachoonzyo chakuti bajana kasimpe. Jesu wakaamba kuti: “Bantu boonse bazooziba kuti muli basikwiiya bangu, kuti kamuli aaluyando aakati kanu.” (Joh. 13:35) Atubone zyakachitikila Chaithra wakali kwiiya Bbayibbili aBakamboni baJehova naakali kuyunivesiti. Naakatambwa kuti azoonjile muswaangano wabbooma, wakazumina. Mubuzuba bwakusaanguna naakanjila muswaangano ooyu, wakabuzya muntu wakali kumuyiisya Bbayibbili kuti: “Bazyali bangu tabanandikumbata pe. Pesi aamuswaangano ooyu, ndakumbatwa aabantu bali 52 mubuzuba bumwi kupela. Ndabona kuti Jehova wanditondeezya kuti ulandiyanda kwiinda mubakombi bakwe. Ndiyanda kuba mumpuli eeyi.” Chaithra wakayinkilila kunembo kalikwiiya Bbayibbili alubo wakabbabbatizigwa mu 2024. Nichoonzyo, bantu bapya kuti babona milimu yesu mibotu iiswaanizya kuyanda bakombima, nga zyapa kuti bayande kubelekela Jehova.—Mt. 5:16.

6. Kumvwanana aabakwesu abachizi kutukwabilila biyeni?

⁶ Kumvwanana aabakwesu abachizi kulakonzya kutukwabilila. Pawulu wakabuzya maKkristunyina kuti: “Amwiinkilile kunembo kusungwaazyania buzuba abuzuba . . . kuchitila kuti kutabi naaba uumwi aakati kanu uuba aamoyo muyumu akaambo kakweenwa aamanguzu aachibi.” (Heb. 3:13) Kuti kakutuyumina kuti tukkale katuchita zintu zilikabotu, Jehova ulakonzya kubelesya mukombima kuti atugwasye. (Int. 73:​2, 17, 23) Kugwasigwa munzila eeyi kulatukwabilila.

7. Luyando akujatana zinjililana biyeni? (Bakkolose 3:​13, 14)

⁷ Tuli mukabunga kabantu babeleka changuzu kuti batondeezyanie luyando alubo eezi nga zyapa kuti tujane zilongezyo zyiingi. (1 Joh. 4:11) Muchikozyano, luyando lupa kuti twiinkilile “kunembo kutondeezyania moyo mulamfu” alubo lupa kuti tujatane abakwesu abachizi. (Bala Bakkolose 3:​13, 14; Ef. 4:​2-6) Nkinkaako, nituli kumiswaangano yambungano tulabotelwa alubo taakwe kabunga kambi kabotelwa mbuli mbutubotelwa.

ATULEMEKANE

8. Jehova utugwasya biyeni kuti tujatane abakombima?

⁸ Kujatana nkutulaako abakombima bamunyika yoonse nchigambyo. Jehova nguwe uupa kuti tujatane nikuba kuti tatumaninide pe. (1 Kor. 12:25) Bbayibbili lyaamba kuti: “Inywe muyiisigwa aaLeza kuti muyandane.” (1 Tes. 4:9) Mulaamwi majwi, Jehova ubelesya Magwalo kuti atubuzye nzitweelede kuchita kuchitila kuti tumvwanane aabakombima. Tulakonzya ‘kuyiisigwa aaLeza’ kwiinda mukubala akuyeeyesesya atala anjiisyo zyakwe akuzibelesya. (Heb. 4:12; Jak. 1:25) Eezi nzizyo loko Bakamboni baJehova nzibeezya kuchita.

9. Lugwalo lwa Baroma 12:​9-13, lutuyiisyaanzi atala akulemekana?

⁹ Jwi lyaLeza litugwasya biyeni kuti tumvwanane aabakwesu abachizi? Atubone nzyaakaamba Pawulu atala ankani eeyi zilembedwe muli Baroma 12:​9-13. (Bala.) Wakaamba kuti, “Kumakani aakulemekana, amube kunembo.” Aambaanzi majwi aaya? Ndiswe nitweelede kusaanguna kubweza ntaamu yakuti ‘tuyandane loko’ abamwi munzila zisiyene-siyene, mbuli kubalekelela, kubatamba mumaanda eesu akwaabilana aambabo nzitulaazyo. (Ef. 4:32) Tatweelede kulindila kuti mukwesu naakuti muchizi abe nguwe uusaanguna kubweza ntaamu yakuti tumvwanane. Tulakonzya ‘kuba kunembo’ mukuchita oobo. Jesu wakaamba kuti: “Kupa, kupa kubotelwa loko kwiinda kutambula.”—Mil. 20:35.

10. Kujana twatondeezya biyeni kuti tatuli bakandu “kumakani aakulemekana”? (Langa chifanikisyo.)

¹⁰ Pawulu naakazwa aakwaamba kuti tube kunembo munkani yakulemekana, wakazoowaamba kuti “amubeleke changuzu, mutabi bakandu pe.” Muntu uutali mukandu, musungu alubo ubeleka changuzu. Kuti wapegwa mulimu, ulawuchita mulimu ooyo amoyo woonse. Tusimpi 3:​27, 28 yaamba kuti: “Utawayiwayi kubacitila zibotu aabo mboyelede kucitila boobo ikuti naa kocikonzya kubagwasya.” Nkinkaako, kuti twabona kuti umwi uyanda lugwasyo, tulakonzya kuchita nzitukonzya kuti tumugwasye. Tatubalili naakuti kuyeeya kuti umwi ulakonzya kumugwasya.—1 Joh. 3:​17, 18.

11. Niinzi chikonzya kutugwasya kuti tumvwanane aabamwi?

¹¹ Imwi nzila njitukonzya kutondeezyaayo kuti tulabalemeka bamwi, nkwiinda mukufwambaana kubalekelela nibatunyemya. Ba-efeso 4:26 yaamba kuti: “Mutabbizyi zuba kamunyemede.” Nkamboonzi? Vesi 27 yaamba kuti, “mutamupi mweenya Dyabbulosi.” MuJwi lyakwe, Jehova ukkala katubuzya kuti tulekelele bamwi. Bakkolose 3:13 yaamba kuti: “Amwiinkilile kunembo . . . kamulekelelana amoyo woonse.” Kulekelela bamwi ninzila iiyandikana loko iipa kuti tumvwanane ambabo. Kuti twachita oobo, nga tulikugwasilizya “kubamba kujatana kwamuuya, muchaanzyo chaluumuno.” (Ef. 4:3) Mubufwiifwi, kulekelela bamwi kupa kuti tujatane akuti tube aaluumuno.

12. Jehova utugwasya biyeni kuti tube bantu balekelela?

¹² Nichoonzyo, kulakonzya kutuyumina kuti tulekelele aabo batunyemya. Pesi kuti twagwasigwa aamuuya uusalala, tulakonzya kubalekelela. Pawulu naakatusungwazya kuti “amuyandane loko” akuti “amube basungu,” wakayungizya kuti: “Amupye moyo akaambo kamuuya.” Muntu ‘uupya moyo’ musungu alubo ubeleka changuzu akaambo kakuti nga ulikugwasigwa aamuuya uusalala. (Rom. 12:11.) Nkinkaako, muuya uusalala ulakonzya kutugwasya kuti tubayande loko bamwi akuti tubalekelele amoyo woonse. Aaka nkiikaambo kapa kuti tukombelezye Jehova amoyo woonse kuti atugwasye.—Lk. 11:13.

“TAKWEELEDE KUBA KWAANZAANA AAKATI KANU”

13. Niinzi zikonzya kupa kuti twaanzaane?

¹³ Mbungano ‘ilaabantu bamisyobo yoonse’ bakakomezegwa munzila zisiyene. (1 Tim. 2:​3, 4) Kuti teetwabikkila maanu, kusiyana ooku kulakonzya kupa kuti twaanzaane akaambo kazintu nzitusala kuchita, mbuli nzila njituzwaataayo anjitulibambaayo, mumakani aabusilisi naakuti zyakulikondelezya. (Rom. 14:4; 1 Kor. 1:10) Akaambo kakuti Leza nguwe uutuyiisya kuti tuyandane, tatweelede kupa kuti bamwi babonaanga zintu nzitusala kuchita nzizyo zilikabotu kwiinda nzibasala.—Flp. 2:3.

14. Niinzi nzitweelede kweezya kuchita chiindi choonse alubo nkamboonzi?

¹⁴ Tulakonzya kupa kuti mumbungano mutabi kwaanzaana kwiinda mukubeleka changuzu kuti tusungwaazyanie akuyakana chiindi choonse. (1 Tes. 5:11) Muchiindi chifwiifwi chayinda, bantu biingi bakali batontola mubukombi naakuti bakali bagwisigwa mumbungano bakaboola. Tulabatambula amaanza aabili! (2 Kor. 2:8) Atubone zyakachitikila umwi muchizi wakanjila miswaangano kakusaanguna kuNg’anda yaBwaami kali waba aaminyaka iili 10 katontwede mubukombi. Wakaamba kuti, “Bantu bakali kundijuzya kabali kumwemwetela akundijata mumaboko.” (Mil. 3:19) Zintu eezi zyakapa kuti amvwe biyeni? Wakaamba kuti, “Nzibakachita zyakapa kuti ndibone kuti kuboko kwaJehova kwakali kundizulwida kuti ndisaangune lubo kubotelwa.” Kwiinda mukuyakana, tulakonzya kubelesegwa aaKkristu kuti tulemunune aabo ‘bakatede akulemenwa.’—Mt. 11:​28, 29.

15. Nziizili zimwi nzitukonzya kuchita zikonzya kupa kuti kube kujatana mumbungano? (Langa chifanikisyo.)

¹⁵ Imwi nzila mutukonzya kupa kuti kube kujatana aakati kesu, nkwiinda mumajwi ngitwaambuula. Jobu 12:11 yaamba kuti: “Sena kutwi takusoli majwi mbubonya mulaka mboulabila cakulya?” Muntu uukonzya kujika ngawasaanguna kulabila chakulya nchaajika kuti amvwe kuti chilikunona na katanachipa bamwi. Andiswe tweelede kusaanguna kuyeeya nzituyanda kwaambuula katutanaambuula. (Int. 141:3) Chiindi choonse, tweelede kuba aachoonzyo chakuti zintu nzituyanda kwaambuula zilayaka, zilalemununa ‘akubagwasya aabo baswiilila.’—Ef. 4:29.

16. Mbaani loko beelede kuba kunembo kukwaambuula majwi aasungwaazya?

¹⁶ Baalumi bakwete abazyali, beelede kubikkila maanu kuzintu nzibaambuula kuchitila kuti ziyake bamwi. (Kol. 3:​19, 21; Tit. 2:4) Ambabo baalu beelede kuba kasawu kakulemununa akuumbulizya mbukunga mbeembeli bambelele zyaJehova. (Is. 32:​1, 2; Gal. 6:1) Kamwi kasimpi kamuBbayibbili katuyeezya kuti: “Ijwi lyaambwa aciindi ceelede, eelo kaka ndibotu kapati!”—Tus. 15:23.

LUYANDO “ALUBE LWAMICHITO ALWAKASIMPE”

17. Niinzi nzitukonzya kuchita kuti tuyande bakwesu abachizi kazizwa aansi aamoyo?

¹⁷ Mwaapostoli Johane utusungwaazya kuti “luyando lwesu talweelede kuba lwamajwi naakuti lwaamulomo, pesi alube lwamichito alwakasimpe.” (1 Joh. 3:18) Tuyanda kuti tubayande bakwesu abachizi kazizwaansi aamoyo. Kujana twazichita biyeni eezi? Kuti twajana chiindi chakubaamwi abakwesu abachizi, tulamvwanana ambabo alubo tulayandana loko ambabo. Nkinkaako, yanduula myeenya yakuti ujane chiindi chakubaamwi ambabo kumiswaangano yambungano akumulimu wakukambawuka. Jana chiindi chakuti uswaye bamwi. Kuti twachita oobo, ngatulikutondeezya kuti ‘tuyiisigwa aaLeza kuti tuyandane.’ (1 Tes. 4:9) Alubo tulayinkilila kunembo kubona nzyaakaamba sintembawuzyo wakati, “Eelo kaka ncibotu alimwi cilakondelezya kuti babunyina kabakkede antoomwe calukamantano!”—Int. 133:1.