CHIIYO 34
LWIIMBO 3 Leza Ninguzu Zyesu, Mbulangizi Bwesu, Ngotusyoma
Baachoonzyo Chakuti Jehova Ulalekelela
“Wakandijatila mulandu wazibi zyangu.”—INT. 32:5.
NZITUTAYIYE
Tulabona kuti nkamboonzi nikuyandikana kuti tube aachoonzyo chakuti Jehova ulalekelela aBbayibbili mbulitugwasya kuti tubone kuti Jehova ulabalekelela basizibi basanduka chachoonzyo.
1-2. Niinzi Jehova nzyachita kuti twasanduka kuzibi zyesu? (Langa chifanikisyo chili aachivumbyo.)
MWAAMI Davida wakali kukataazikana akaambo kazibi nzyaakachita chiindi. (Int. 40:12; 51:3; katwe kamakani) Wakachita zibi zipati mubuumi bwakwe. Nikuba oobo, wakasanduka chachoonzyo mpawo Jehova wakamulekelela. (2 Sam. 12:13) Eezi zyakapa kuti Davida abotelwe nkaambo wakalizi kuti Jehova wamulekelela.—Int. 32:1.
2 Mbuli Davida, andiswe tulabotelwa chiindi Jehova natufwida luzyalo. Kulatuumbulizya kuziba kuti Jehova ulilibambilide kulekelela zibi zyesu nikuba zibi zipati, kuti twasanduka chachoonzyo akubeleka changuzu kuti tutayindululi lubo pe kuchita zibi eezyo. (Tus. 28:13; Mil. 26:20; 1 Joh. 1:9) Alubo, kulawumbulizya kuziba kuti chiindi Jehova natulekelela nga watulekelela chakumaninina mbuli kuti taakwe nitwakabisizye pe.—Ezk. 33:16.
Mwaami Davida wakalemba ntembawuzyo zyiingi zipandulula nzila Jehova njalekelelaayo (Langa fuka 1-2)
3-4. Umwi muchizi wakatyeni naakabbabbatizigwa alubo tulalanga-langaanzi muchiiyo eechi?
3 Chimwi chiindi, bamwi nga kwabayumina kuti babe aachoonzyo chakuti Jehova ulalekelela. Muchikozyano, atubone zyakachitikila Jennifer wakazyalilwa mukasimpe. Naakakomena-komena, wakasaanguna kuchita zintu zibi kasisikizya. Muminyaka yakatobela, wakabweeda kuli Jehova alubo wakeelela kuti abbabbatizigwe. Wakaamba kuti: “Chiindi ndakali kuyandisya bunoti, kuchita bwaamu, kunywa bukande zyiindilide alubo ndakali kuyaka biya akunyema. Nikuba kuti ndakalizi kuti, kuti ndakumbila Jehova kuti andilekelele akuti ndasanduka chachoonzyo, chinunuzyo chaKkristu chakali kupa kuti ndisalale. Pesi zyakali kundiyumina kuzisyoma kuti Jehova wakali wandilekelela chachoonzyo.”
4 Chimwi chiindi, kulakuyumina na kuti uzisyome kuti Jehova wakakulekelela akaambo kazibi nzwaakachita chiindi? Jehova uyanda kuti tubotelwe mbuli mbaakabotelwa Davida chiindi nitulekelelwa zibi zyesu. Muchiiyo eechi, tulabona kuti nkamboonzi nikuyandikana kuti tube aachoonzyo chakuti Jehova ulatulekelela? Akuti niinzi zikonzya kutugwasya kuti tube aachoonzyo?
NKAMBOONZI NIKUYANDIKANA KUTI TUSYOME KUTI JEHOVA ULALEKELELA?
5. Ngaali makanze aaSaatani? Amba chikozyano.
5 Kuti twaba aachoonzyo chakuti Jehova ulatulekelela, tulakonzya kutantamuka kamwi kakole kaSaatani. Tutalubi kuti makanze aaSaatani nga kuchita kufumbwa nzyakonzya kuti ape kuti tuleke kukomba Jehova. Kuti azichite eezi, Saatani uleezya kupa kuti tusyome kuti Jehova tazilekeleli pe zibi zyesu. Muchikozyano, atubone zyakachitikila mwaalumi wakuKkorinte wakagwisigwa mumbungano akaambo kakuchita bwaamu. (1 Kor. 5:1, 5, 13) Chiindi naakasanduka mwaalumi ooyu, Saatani wakali kuyanda kuti bamumbungano bamunyemene mwaalumi ooyu kwiinda mukutamutambula lubo mumbungano. Aachiindi nchicheecho, Saatani wakali kuyanda kuti mwaalumi ooyu ‘azundwe aakuusa kwiindilide’ zyakali kuyoopa kuti aleke kukomba Jehova. Saatani tanachincha pe meeneno aakwe. Pesi “nzila zyakwe tulizizi.”—2 Kor. 2:5-11.
6. Niinzi nzitweelede kuchita kuti tutalipi mulandu?
6 Kuti twaba aachoonzyo chakuti Jehova ulatulekelela, tulaleka kulipa mulandu. Chiindi nitubisya, zili mulindiswe biya kuti tulipe mulandu. (Int. 51:17) Kulimvwa munzila eeyi, kulikabotu nkaambo nga moyo wesu ulikutubuzya kuti tubambulule mputwabisya. (2 Kor. 7:10, 11) Nikuba oobo, kuti twalipa mulandu kwachiindi chilamfu kakuli twakasanduka kuzibi zyesu, zilakonzya kupa kuti tumane manguzu. Chiindi nituba aachoonzyo chakuti Jehova ulatulekelela, ngazyapa kuti tuleke kulipa mulandu. Alubo nga twasaanguna kukomba Jehova katuli aamoyo uusalala alubo katubotelwa. (Kol. 1:10, 11; 2 Tim. 1:3) Pesi niinzi chikonzya kutugwasya kuti tube aachoonzyo chakuti Jehova ulatulekelela?
NIINZI CHIKONZYA KUTUGWASYA KUTI TUBE AACHOONZYO CHAKUTI JEHOVA ULATULEKELELA?
7-8. Jehova wakalipandulula biyeni kuli Mozesi alubo eezi zitupa choonzyo chanzi? (Kulonga 34:6, 7)
7 Yeeyesesya atala anzila Jehova njalipandulwidaayo. Muchikozyano, atubone nzyaakaamba Jehova kuli Mozesi kuChilundu chaSinayi.a (Bala Kulonga 34:6, 7.) Kuli zintu zyiingi loko nzyaakali kukonzya kwaamba Jehova atala abuntu bwakwe anzila zyakwe, pesi wakabona kakweelela kuti alyiite kuti “Leza silweetelelo asiluzyalo.” Leza ulaabuntu buli oobo, ulakachilwa na kuti alekelele mukombi wakwe uunga wasanduka chachoonzyo kuzibi zyakwe? Takachilwi pe! Kuti taachita oobo, ngatachikwe luzyalo pe alubo ngawaba aamoyo muyumu. Jehova teembabede pe.
8 Tulakonzya kuba aachoonzyo chakuti Jehova tachinchi pe nkaambo nguLeza wakasimpe. (Int. 31:5) Nkinkaako, tweelede kuzisyoma nzyaamba. Kuti kakukuyumina kuti uleke kulipa mulandu akaambo kazibi nzwaakachita chiindi, libuzye kuti: ‘Ndilasyoma na kuti Jehova ngusiluzyalo, silweetelelo alubo uulekelela kufumbwa muntu uunga wasanduka chachoonzyo? Eezi tazyeelede kupa kuti ndibe aachoonzyo chakuti ulandilekelela na?’
9. Chaambaanzi kulekelelwa zibi zyesu? (Intembauzyo 32:5)
9 Yeeyesesya atala anzila balembi baBbayibbili mbubakapandulula mbalekelela Jehova. Muchikozyano, atubone nzyaakaamba Davida atala anzila Jehova njalekelelaayo. (Bala Intembauzyo 32:5.) Davida wakati: “Wakandijatila mulandu wazibi zyangu.” Bbala lyachiHebberu lyakasandululwa kuti, “kujatila” lilakonzya kwaamba “kunyampula,” “kugwisya” naakuti “kubweza.” Chiindi Jehova naakalekelela Davida, kwakali mbuli kuti wakanyampula zibi zyakwe akuzigwisya aalinguwe. Eezi zyakapa kuti Davida abotelwe akaambo kakuti Jehova wakali wamulekelela chakumaninina. (Int. 32:2-4) Andiswe tulakonzya kubotelwa kuti Jehova watulekelela chakumaninina. Chiindi nitusanduka chachoonzyo kuzibi zyesu, tulakonzya kwiinkilila kunembo katutalipi mulandu pe akaambo kazibi Jehova nzyaakatulekelela chakumaninina.
10-11. Majwi aakuti “ulilibambilide kulekelela zibi” atuyiisyaanzi atala aJehova? (Intembauzyo 86:5)
10 Bala Intembauzyo 86:5. Mulugwalo oolu, Davida wakaamba kuti Jehova “ulilibambilide kulekelela zibi.” Nilyakali kupandulula atala amajwi aaya, limwi bbuku lipandulula Bbayibbili lyakaamba kuti atala aJehova: “‘Ulalekelela’ alubo oobu ‘mbuntu’ bwakwe.’” Nkamboonzi Jehova nali aabuntu oobu bwakulekelela? Chipanzi chavesi eeyi chaamba kuti: “Luyando lutamani ndojisi kulibaabo boonse bakukwiilila ndupati.” Mbuli mbutwakayiya muchiiyo chayinda, luyando lutamani ndulo lupa kuti Jehova abayande loko bakombi bakwe basyomeka. Akaambo kaluyando oolu lutamani, Jehova ‘unoobalekelela camoyo woonse’ basizibi boonse basanduka. (Is. 55:7, makani aamunsi) Kuti kakukuyumina kusyoma kuti Jehova ulalekelela, ulakonzya kulibuzya kuti: ‘Ndilasyoma na kuti Jehova ulilibambilide kulekelela basizibi boonse basanduka bakumbila kuti abafwide luzyalo akubalekelela? Eezi tazyeelede kupa kuti ndibe aachoonzyo na chakuti ulandilekelela andime kuti ndakumbila kuti andifwide luzyalo akundilekelela?’
11 Kulatuumbulizya kuziba kuti Jehova ulizi kuti tulaachibi. (Int. 139:1, 2) Eezi wakazibikka aantanganana Davida muliimwi ntembawuzyo yakwe. Ntembawuzyo eeyo, ilatugwasya kuti tube aachoonzyo chakuti Jehova ulatulekelela.
TUTALUBI ZINTU JEHOVA NZYAYEEYA
12-13. Kweendelana alugwalo lwa Intembauzyo 103:14, niinzi Jehova nzyazi atala andiswe alubo eezi zipa kuti achiteenzi?
12 Bala Intembauzyo 103:14. Davida wakaamba kuti Jehova “ulaibaluka kuti tuli bulongo buyo.” Mumajwi aaya, Davida wakapandulula kaambo kapa kuti Jehova alibambile kulekelela mukombi wakwe uunga wasanduka. Jehova ulizi kuti tulaachibi. Kuti twiimvwisisisye kabotu nkani eeyi, atulange-lange majwi ngaakaamba Davida.
13 Davida wakaamba kuti Jehova “ulizyi kabotu mbotupangidwe.” Wakalenga Adamu “kuzwa kubulongo bwaanyika” alubo ulizi kuti bantu bamaninide kuli zintu nzibayandikana. Muchikozyano, beelede kulya, koona akuyoya. (Matl. 2:7) Pesi Adamu a-Eva nibakabisya, toonse twakabisya. Mbukunga tuli bana babo, twakakona chibi alubo chibi eecho chipa kuti katuchita zintu zitali kabotu. Jehova ulizi kuti tulaachibi, nzizyo zyakapa kuti Davida aambe kuti Jehova “ulaibaluka” kuti tulaachibi. Bbala lyachiHebberu lyakabelesegwa aawa, lilakonzya kwaamba kubweza ntaamu. Nkinkaako, majwi aaDavida tulakonzya kwaabikka munzila eeyi: Jehova ulizi kuti chimwi chiindi tulakonzya kubisya. Pesi chiindi nitubisya, kuti twasanduka kazizwa aansi aamoyo, ulatutondeezya luzyalo akutulekelela.—Int. 78:38, 39.
14. (a) Davida wakayipandulula biyeni nzila Jehova njalekelelaayo? (Intembauzyo 103:12) (b) Chikozyano chaDavida chitondeezya biyeni kuti Jehova ulalekelela chakumaninina? (Langa kabbokesi kati, “Nzila Jehova njalekelelaayo.”)
14 Jehova ulekelela zili biyeni? (Bala Intembauzyo 103:12.) Davida wakaamba kuti chiindi Jehova nalekelela, zibi zyesu nga wazibikka “kumapolelo aazuba mbokuli kulamfwu kapati kuzwa kumabbililo aazuba.” Mbuli mbutuzi, kubuzwezuba akububbila taakwe nizitazooswaanane pe. Nkinkaako, eezi zituyiisyaanzi atala anzila Jehova njatulekelelaayo? Limwi bbuku lyakazikozyanisya munzila eeyi, lyakati: “Kuti chibi chagwisigwa, taakwe bweema bwacho busyaala pe naakuti chintu chipa kuti tuyeeye atala anchicho.” Muchikozyano, kuti bamwi bakamvwide umwi mweema chiindi mpawo kuti bazoowumvwa lubo mweema ooyo, nga bayeeya zintu zyakachitikide muchiindi eecho. Pesi chiindi Jehova nalekelela, taakwe mweema uusyaala pe uupa kuti ayeeye chibi nchitwakachita chiindi naakuti kupa kuti aleke kutulekelela nkaambo zibi zyesu nga wazibikka kule loko.—Ezk. 18:21, 22; Mil. 3:19.
15. Niinzi nzitukonzya kuchita kuti katuli twaba aachiindi chilamfu katulipa mulandu akaambo kazibi nzitwakachita chiindi?
15 Majwi aaDavida aali muli Intembauzyo 103 atugwasya biyeni kuti tube aachoonzyo chakuti Jehova ulatulekelela? Kuti katukkala katulipa mulandu akaambo kazibi nzitwakachita chiindi, tulakonzya kulibuzya kuti: ‘Ndilikuziluba na zintu Jehova nzyayeeya zyakuti ulizi kuti tulaachibi akuti ulabalekelela basikubisya basanduka bali mbuli ndime? Alubo ndilikuyeeya zintu Jehova nzyasala kuluba na naakuti ndilikuyeeya zibi nzyaakandilekelela na nzyatachiyeeyi pe?’ Jehova tabikkili maanu kuzibi nzitwakachita chiindi. Andiswe tatweelede kukkala katuziyeeya pe. (Int. 130:3) Chiindi nituba aachoonzyo chakuti Jehova ulatulekelela, kulakonzya kutugwasya kuti tulilekelele akaambo kazibi nzitwakachita chiindi akuti twiinkilile kunembo katukomba Jehova katubotelwa.
16. Amba chikozyano chitondeezya mbukukonzya kutupambanisya kukkala katulipa mulandu akaambo kazibi nzitwakachita chiindi. (Langa chifanikisyo.)
16 Atuzikozyanisye munzila eeyi. Kulipa mulandu akaambo kazibi nzitwakachita chiindi kuli mbuli kweezya kweenzya moota kumwi kulangide gilazi lilikutondeezya zintu zilikuchitika musule. Chimwi chiindi, kulayandikana kuti ulange aagilazi litondeezya zilikuchitika musule kuti utanjili mungoozi. Pesi kuti wiiyenzye kabotu moota, weelede kubikkila maanu kulanga nkuya. Munzila iikozyenie, chimwi chiindi kulagwasya kuti tuyeeye zibi nzitwakachita chiindi kuti twiiye kulinzizyo akuti tutazoozyiindululi lubo pe zibi eezyo. Pesi kuti twabikkila maanu kuzibi nzitwakachita chiindi, kulipa mulandu kulakonzya kupa kuti tuleke kukomba Jehova. Kwiinda kuti tubikkile maanu kuzibi nzitwakachita chiindi, tweelede kubikkila maanu kuzintu zilikunembo. Tuli munzila iitola kunyika mpya njaakatusyomezya Leza, muchiindi eecho, zintu zibi nzitwakachita chiindi, “tazikaibalukwi limbi pe.”—Is. 65:17; Tus. 4:25.
Mbuli dilayiva mbabikkila maanu nkwaya kutali kuti abikkile maanu kugilazi litondeezya zintu zilikuchitika musule, andiswe tweelede kubikkila maanu kuzilongezyo nzituyoojana muchiindi chilikunembo kutali kuti tubikkile maanu kuzibi nzitwakachita chiindi (Langa fuka 16)
ATUKKALE KATULI AACHOONZYO CHAKUTI JEHOVA ULATUYANDA AKUTI ULATULEKELELA
17. Nkamboonzi nikuyandikana kuti tukkale katulaachoonzyo chakuti Jehova ulatuyanda akuti ulatulekelela?
17 Tweelede kukkala katuli aachoonzyo chakuti Jehova ulatuyanda akuti ulatulekelela. (1 Joh. 3:19) Nkamboonzi? Akaambo kakuti Saatani ulikubeleka changuzu kuti abyale muzeezo wakuti tubonaanga Jehova tatuyandi pe naakuti tatulekeleli pe. Kufumbwa nzila njaabelesya, makanze aakwe ngakuti tuleke kukomba Jehova. Tulangilila kuti Saatani ulayindilila biya kubeleka changuzu kuti atulwane akaambo kakuti ulizi kuti wasyaalilwa chiindi chifwiifwi loko. (Chi. 12:12) Nkinkaako, atumulwane Saatani kwiinda mukukkala katukomba Jehova!
18. Niinzi nzukonzya kuchita kuti ubaachoonzyo chakuti Jehova ulakuyanda akuti ulakulekelela?
18 Kuti ube aachoonzyo chakuti Jehova ulakuyanda, ulakonzya kubelesya zyiiyo nzitwakayiya muchiiyo chakayinda. Kuti ube aachoonzyo chakuti Jehova ulalekelela, yeeyesesya atala anzila njaakalipandululaayo. Yeeyesesya atala abalembi baBbayibbili mbubakaamba atala anzila Jehova njalekelelaayo. Utalubi kuti Jehova ulizi kuti ulaachibi alubo unookufwida luzyalo. Utalubi kuti chiindi Jehova nalekelela, ulalekelela chakumaninina. Kuti wachita oobo, uyooba aachoonzyo chakuti Jehova uyookufwida luzyalo mbuli mbaakali kuchita Davida alubo uyookonzya kwaamba kuti, “Ndalumba Jehova akaambo kakulekelela ‘mulandu wazibi zyangu’!”—Int. 32:5.
LWIIMBO 1 Bube bwa Jehova
a Langa chiiyo chiti, “Jehova Ulalekelela Kwiinda Bantu Boonse” muNgaziyakulinda yamuJune 2022, fuka 4-7.