Mawofesi aaBusanduluzi Alikugwasya Bantu Biingi Loko

Hafu yabasanduluzi bali mumulimu wachiindi choonse babelekela kumawofesi aabusanduluzi (RTO) kutali kumawofesi aamitabi. Nkamboonzi mabambe aaya nali kugwasya loko? Niinzi ziyandikana kuti zigwasye basanduluzi kuti bawuchite kabotu mulimu wabo? Alubo busena nkwaabede mawofesi aabusanduluzi aalikugwasya biyeni kuti mulimu wabusanduluzi weende kabotu?

Kubelekela kumawofewsi aabusanduluzi kuligwasya basanduluzi kuti kabaambuula aabantu biingi baambuula mulaka wabo. Karin uusandulula mulaka wachiLow German wakaamba kuti: “Kuzwa nitwakalongela Cuauhtémoc kuChihuahua iili kuMexico, tulikwaambuula chiLow German buzuba abuzuba abamwi mbitubelekaabo, mbitukambawukila ambituswaananaabo kuzintoolo. Tukkala aakati kabantu baambuula mulaka wesu. Ngatwabamvwa kababelesya tunonia mulaka ntutwakali twaba aachiindi chilamfu katutatumvwi pe alubo tulikubelesya mabala ngibabelesya bantu mazubaano.”

James uusandulula mulawa wachiiFrafra kuGhana wakaamba kuti chimwi chiindi ngawabayeeya bamumpuli yaBbeteli. Pesi wakaamba kuti: “Ndilakuyanda kubelekela ookuno kuRTO. Kukambawukila bantu baambuula mulaka wesu akubabona kabali kutambula makani mabotu kupa kuti ndibotelwe loko.”

Niinzi nzibalalanga-langa bakwesu chiindi nibasala busena bwamawofesi aabusanduluzi? Joseph uubeleka kuDipatimenti lyaZyakuyaka lyamunyika yoonse kuWarwick, New York kuU.S.A. wakaamba kuti: “Bumwi buyumu-yumu mbutuswaana mbwakuti kuli aamwi masena, magesi amaanzi alakataazya alubo intaneti tayijati kabotu pe. Nkinkaako, kuti tukonzye kusala busena bulikabotu, ngatwalanga-langa masena aasiyene-siyene nkuwambuulwa mulako ooyo.

Chiindi chiingi, ngatwabelesya masena aachitilwa miswaangano mipati, Maanda aaBwaami naakuti ng’anda yamamishinali kuti abe mawofesi aabusanduluzi. Basanduluzi ngabalikweenda kabayoobelekela nkuko kabazwa nkubakkala. Kuti kakutakwe Ng’anda yaBwaami naakuti masena aachitilwa miswaangano mipati katawo pe kubusena oobo, bakwesu ngabapegwa mvumo yakuti bawule aamwi masena ngibakonzya kubelesya mbuli mawofesi amaanda aabasanduluzi. Kuti zyiimo zyachincha, mayake aayo ngaawuzigwa alubo mali ngayazoobelesegwa kulizimwi zintu.

Balapegwa Zibelesyo Kuchitila Kuti Mulimu Weende Kabotu

Mumunyaka wamulimu wamu2020, kwakabelesegwa mali iisika ku13 miliyoni (U.S.) kuti mulimu weende kumawofesi aabasanduluzi. Basanduluzi balikumaRTO bayanda makkompiyuta, zibelesyo zyakulekkooda, intaneti, magesi, maanzi azimwi. Muchikozyano, kuyandikana mali iisika $750 (U.S.) kuti musanduluzi umwi awumwi ajane kkompiyuta azimwi zibelesyo. Makkompiyuta aaya ngaalaamapulogilamu aawuzigwa apulogilamu yaBakamboni baJehova iitegwa Watchtower Translation System iigwasya basanduluzi kuti bawuchite kabotu mulimu wabo.

Basanduluzi ngabapegwa zibelesyo zyakulekkooda kabali kumawofesi aabo. Zibelesyo eezyo zyakabagwasya loko chiindi nikwaba bulwazi bwaCorona nkaambo basanduluzi biingi bakali kubeza zibelesyo eezyo kabayoolekkoodela kumaanda aabo. Alubo balikuzumanana kubelesya zibelesyo eezyo chiindi nibalekkooda mavidiyo azimwi.

Bakwesu abachizi bakkala aafwiifwi balagwasilizya kulanga-langa nzibasandulula basanduluzi kuti babone kuti zilikuzwa kabotu na alubo balagwasilizya kubambulula mayake azimwi zibelesyo kumawofesi aabusanduluzi. Cirstin uubeeleka kuRTO yamulaka wachiAfrikaans kuCape Town iili kuSouth Africa wakaamba kuti: “Basikupupulula amapayona aachiindi choonse ngabalipeda kuzoochita milimu eeyi.”

Bantu aaba balabotelwa kuzoogwasilizya. Umwi muchizi uugwasilizya kuRTO wakaamba kuti kubelekela nkuko kupa kuti ndibotelwe loko. Bamwi bakwesu abachizi bankuko ngabakumbilwa kuti bazoolekkoodwe. Umwi musanduluzi uutegwa Juana uusandulula mulaka wachiTotonac kuMexico wakaamba kuti: “Lino akaambo kuti tuli aafwiifwi adolopo lili aabantu baambuula mulaka wesu, nkuuba kujana bakwesu abachizi balipeda kubelesegwa kukulekkoda mavidiyo azimwi.”

Pesi mawofesi aabusanduluzi alikugwasya na kuti mulimu wabusanduluzi uzwe kabotu? Bantu biingi babala mabbuku eesu bakasandula mubuzyo ooyu kuti iiyi. Cédric uusandulula mulaka wachiKongo kuDemocratic Republic of Congo wakaamba kuti: “Bamwi bakwesu abachizi bakali kwaamba mabbuku esu kuti akasandululwa mumulaka ‘wachiKongo chamaWatchtower.’ Bakali kwaamba oobo nkaambo mabbuku eesu akali kusandululwa munzila iisiyene anzila njibaambuulaayo bantu. Pesi lino balikwaamba kuti mabbuku eesu alikusandululwa mumulaka wachiKongo chambuulwa mazubaano alubo basanduluzi balikubelesya mabala aabelesegwa aabantu buzuba abuzuba.”

Andile uusandulula mumulaka wachiXhosa kuSouth Africa wakaamvwa bantu kabali kwaamba zintu zibotu atala amulimu wabo wakusandulula. Wakaamba kuti: “Bantu biingi ngabatubuzya kuti nzila njasandululwaayo mabbuku eesu yakachincha. Nikuba bana tabachibali Ngaziyakulinda muChikuwa pesi babwiibala muXhosa. Alubo balabotelwa kapati anzila njiyakasandululwaayo Bbaibbele lya Busanduluzi bwa Nyika Mpya lyakabambululwa.”

Zipo nzimusanga kuti zigwasilizye mumulimu wamunyika yoonse kuswaanizya anzimusanga aa donate.jw.org nzizyo zigwasilizya kuti kube mawofesi aabusanduluzi, akkale kabambululwa akuti kuulwe zimwi zintu zyakubelesya kumawofesi aayo.