Bbuku Libelesegwa Kuyiisya Bbayibbili Lisiyene Aamwi Mabbuku

Mu January 2021, Kabunga Keendelezya kakaambilizya aatala akugwisigwa kwabbuku pya lyakuyiisya litegwa Mbukonzya Kubotelwa Mubuumi Kukabe Kutamani!a Wakamvwa biyeni nikwakaambilizigwa kugwisigwa kwabbuku eeli? Matthew wakuCanada waamba kuti: “Ndakabotelwa loko ikapati chiindi nikwakapegwa nkani amavidiyo akali kupandulula kuti nkamboonzi bbuku eeli nilyakagwisigwa ambuligwasya. Ndakali ndanonokelwa kuti ndilibone akusaanguna kulibelesya.”

Bbuku lyaMbukonzya kubotelwa Mubuumi Kukabe Kutamani libelesya nzila mpya yakuyiisya. Nikuba oobo, ooyu teenguwo musiyano uuliwo awulikke pe aakati kabbuku eeli aamwi mabbuku achiindi. Kuti wabelesya bbuku eeli lyaMbukonzya Kubotelwa Mubuumi Kukabe Kutamani! ulakonzya kumvwa kuti lilisiyene aamwi mabbuku. Kuti tubone kuti nkamboonzi nitwaamba oobo, atubone kuti bbuku eeli lyakapangwa biyeni.

Bbuku Pya Lisiyene Aamwi Mabbuku

Pepa demu. Nkamboonzi nikwakabelesegwa pepa demu? Bbuku lyaMbukonzya Kubotelwa Mubuumi Kukabe Kutamani lilazifanikisyo zyiingi zibotu zyiinda ku 600 eezi zyiinda ziindi zili 10 kuzifanikisyo zijanika mubbuku liti Bbayibbili Nga Lilatuyiisyaanzi? Mapeji miingi aabbuku eeli pya alaandawu zyiingi zitalembeledwe pe alubo zitakwe zifanikisyo. Pesi zintu eezi zibili zyeeta buyumu-yumu: Kuti pepa kalili guba zipa kuti zifanikisyo zili kuli limwi bbazu lyapeji ziboneke, nikuba kaziboneka mbichaani. Kuti eezi zitachitiki bakwesu bali mudipatimenti lyakuDinda lyaMunyika Yoonse (IPD), lyakuWallkill ilikuNew York ku-America bakalanga-langa mapepa aali 4 asiyene alikubelesegwa lino. BaKkomiti yaKulemba yamuKabunga Keendelezya bakalanga-langa mapepa aaya mpawo bakasala limwi litapi kuti zili kusule kwapeji ziboneke. Nikuba kuti pepa eeli liladula kwiinda pepa libelesegwa mulaamwi mabbuku eesu miingi, pesi lipa kuti basikwiiya bakonzye kubala bbuku lyaMbukonzya Kubotelwa Mubuumi Kukabe Kutamani! kabataboni zilembedwe kusule.

Chivumbyo Chisiyene aChivumbyo Chaamwi Mabbuku. Chivumbyo chabbuku eeli pya chilisiyene achivumbyo chaamwi mabbuku nkaambo linamatizidwe apepa lili mbuli pulasitiki achivumbyo. Kwiinda kuti bbuku eeli pya libe achivumbyo ching’ayima, pesi nchiteteete, eezi zipa kuti chifanikisyo chili achivumbyo chiboneke kabotu. Nzila njichipangidwaayo chivumbyo eechi ipa kuti chitafwambaani kuzakala nikuba kuti bbuku lyabelesegwa kwaziindi zyiingi biyeni. Nikuba oobo, nzila njichipangidwaayo chivumbyo eechi iladula kwaziindi zyiinda musanu kuti lyapangwa kaling’ayima. Nkinkaako, mitabi myiingi yakabelekaamwi kuti kuulwe chivumbyo eechi chisimide.

Nkamboonzi nitwakasala kubelesya zintu eezi zidula? Mukwesu ubeleka muDipatimenti lyakuDinda lyaMunyika Yoonse (IPD) wakaamba kuti: “Tulangilila kuti bbuku eeli lizobelesegwe munzila ilikabotu akuti likkale kaliboneka kabotu nikuba kuti lyabelesegwa kwaziindi zyiingi.” Eduardo uubeleka muWofisi yakuDinda yakumutabi wakuBrazil waamba kuti: “Tulabotelwa kubona mbunga yaJehova mbuyakabelesya zibelesyo zyamusyobo ulaajulu kuti kupangwe bbuku bbotu, lisimide alubo linoneezya kulibelesya pesi kabazibelesya kabotu mali zyakasangwa.”

Kudinda Mabbuku Muchiindi chaKkorona

Twakasaanguna kudinda bbuku lyaMbukonzya Kubotelwa Mubuumi Kukabe Kutamani! muMarch 2021. Kwakali kuyumu kuchita oobo nkaambo chakali chiindi chaKkorona. Akaambo kakuti mawofisi aBbeteli akalijalidwe, tekwakali kuchita pe kuti bakwesu babeleka kabazwa kumaandaabo bagwasilizye mumulimu wakudinda naakuti kutamba bakwesu bapya kuti bazobelekele aaBbeteli. Akaambo kazeezi, ndawu zyiingi zyakudinda zyakali abantu bache, alubo zimwi ndawu zyakalijalidwe akaambo kamulawu wakapegwa amfulumende.

Twakabuzunda biyeni buyumu-yumu oobu? Nitwakali twabukonzya kusaanguna kudinda mabbuku, bakwesu abachizi bamulaamwi madipatiment aaBbeteli bakakumbilwa kuti bagwasilizye mukudinda mabbuku. Joel uubeleka muDipatimenti lyakuDinda lyaMunyika Yoonse (IPD) wakaamba kuti: “Kulipeda kwabo achiyandisyo chabo chakwiiya milimu mipya zyakapa kuti mulimu ooyu uzwidilile.”

Nikuba kuti twakaswaanana abuyumu-yumu bwiingi, twakazwidilila kudinda mamiliyoni amabbuku aMbukonzya Kubotelwa Mubuumi Kukabe Kutamani! Kuti kudindwe mabbuku aya kwakabelesegwa zibelesyo zisiyene-siyene ziswaanizya nsimbi, zyakupangisya zivumbyo, mapepa, inki, azyakunamatizya. Mumyeezi ilimusanu yakusaanguna kudinda kwakabelesegwa mali iyiinda ku U.S$2.3 miliyoni kuula zibelesyo kupela. Kuti tutabelesyi mali nyiingi, twakaba achoonzyo chakuti twadinda namba yamabbuku ayandikana kupela mumbungano imwi ayimwi.

“Bbuku Eeli Lipangidwe Munzila Ilikabotu”

Basikupupulula abasikwiiya Bbayibbili balibona biyeni bbuku eeli pya? Mukwesu Paul waku-Australia wakati: “Bbuku lyaMbukonzya Kubotelwa Mubuumi Kukabe Kutamani! lilanoneezya kubelesya zyakuti nga ndabotelwa kuchitisya zyiiyo zyaBbayibbili. Nzila njilipangidwaayo nimbotu loko alubo ipa kuti twaambuzyanie munzila izwidilila. Lijisi makani miingi amvwisisika, mibuzyo iisungwaazya, mavidiyo, mapikicha, machaati azipeekezyo nzyaakonzya kulibikkila sikwiiya. Bbuku eeli lipangidwe munzila ilikabotu zyakuti lipa kuti ndikonzye kuyiisya kabotu.”

Umwi sikwiiya Bbayibbili waku-United States wakaamba kuti: “Ndilaliyanda loko bbuku eeli pya. Zifanikisyo zindigwasya kuti ndimvwisisisye twaambo tuyandikana. Mavidiyo andisika aamoyo alubo apa kuti ndibweze ntaamu.” Sikwiiya ooyu wiiya tubili mumviki alubo ukkala kanjila miswaangano yambungano.

Kuchiyandikana kudindwa mamiliyoni amabbuku aMbukonzya Kubotelwa Mubuumi Kukabe Kutamani! muli iimwi milaka myiingi. Kusikila sunu, bamuKabunga Keendelezya bakazumizya kuti bbuku eeli lidindwe mumilaka iili 710, namba eeyi yiinda ka 340 kumilaka yamabbuku akadindwa aabbuku liti Bbayibbele Nga Lilatuyisyaanzi?

Mali yakabelesegwa kudinda yakazwa kuli? Yakazwa kukusanga kuchitwa munyika yoonse, chiindi chiingi kuchitwa kakubelesegwa webbusayiti itii donate.jw.org. Tulamulumba akaambo kakutondeezya muuya wakulipeda nkumuchita, kutugwasya kuti tuzwidilile kupanga mabbuku akuyiisya Bbayibbili agwasya aabo bayanda kwiiya atala aJehova ‘akupona mane kukabe kutamani.’—Intembauzyo 22:26.