Nikwakali kwayinda minyaka iibili bantu bakuBbabbiloni kabali bazunda Jerusalema, Mwaami Nebbukkadinezari wakuBbabbiloni wakalota chiloto chiyoosya chachibumbwa chipati. Alubo wakabuzya baalumi bakwe basongo kuswaanizya aDaniyele kuti wakali kuyoobajaya kuti bakachilwa kumubuzya nzyaakalota abupanduluzi bwachiloto eecho. (Dan. 2:​3-5) Daniyele wakeelede kubweza ntaamu chakufwambaana nkaambo bantu biingi bakali kukonzya kujayigwa. Daniyele “wakaunka kumwami akumulomba kuti amupe ciindi cakuti amupandulwide ciloto cakwe.” (Dan. 2:16) Zyakali kuyanda chibindi alusyomo kuti akonzye kuchita zintu eezi. Katanapandulula chiloto eechi, Bbayibbele taakwe mpulyaamba pe kuti Daniyele wakali wazichita eezi. Daniyele wakabuzya beenzinyina, kuti “bapaile kuli Leza wakujulu kuti abafwide luse akubagwasya kujatikizya maseseke aaya.” (Dan. 2:18) Jehova wakazisandula nkombyo zyabo. Kwiinda mukugwasigwa aaLeza, Daniyele wakapandulula chiloto chaNebbukkadinezari. Daniyele abeenzinyina teebakazoojayigwa pe. w23.08 3 ¶4

Langa-langa bubotu bwakuba aamoyo mulamfu. Kuti katuli aamoyo mulamfu, tulabotelwa alubo nga tulibateme. Kuba aamoyo mulamfu kutugwasya kuti tuyeeye munzila iilikabotu akuti tupone buumi bulikabotu. Kuti katutondeezya bamwi moyo mulamfu, tunoomvwanana ambabo alubo mbungano ilayungizya kujatana. Kuti umwi muntu watunyemya mpawo twanonoka kunyema, zilagwasya kuti chiimo chitayindilili kubija. (Int. 37:​8, makani aamunsi.; Tus. 14:29) Kwiinda zyoonse, nga tulikutobelezya Taateesu wakujulu alubo nga tulikuswena aafwiifwi anguwe. Moyo mulamfu mbuntu buyandikana loko alubo bulatugwasya. Nikuba kuti chimwi chiindi nga kwatuyumina kuti tube aamoyo mulamfu, pesi kwiinda mukugwasigwa aaJehova tulakonzya kwiinkilila kunembo kuti tube aabuntu oobu. Alubo chiindi nitulindila nyika mpya, tulakonzya kubaachoonzyo chakuti “liso lya Jehova lilangide baabo bamuyoowa, aabo [balindila] luyando lwakwe lutamani.” (Int. 33:18) Toonse atukanze kuti twiinkilile kunembo kuzwaata moyo mulamfu. w23.08 22 ¶7; 25 ¶16-17

Jakkobo wakaamba kuti muntu ulakonzya kwaamba kuti ulaalusyomo pesi milimu yakwe nga ilaali? (Jak. 2:​1-5, 9) Alubo Jakkobo wakaamba muntu uubona ‘mukwesu naakuti muchizi katakwe zyakuzwaata achakulya’ pesi katamugwasyi pe. Muntu ooyo ulakonzya kwaamba kuti ulaalusyomo pesi ngatakwe milimu pe, nkinkaako lusyomo lutakwe milimu talugwasyi pe. (Jak. 2:​14-16) Jakkobo wakaamba kuti Rahabbu nchikozyano chibotu chamuntu wakali aalusyomo luli aamilimu. (Jak 2:​25, 26.) Rahabbu wakamvwa atala aJehova alubo wakabona mbaakagwasya ma-Israyeli. (Jos. 2:​9-11) Wakatondeezya lusyomo muli Leza kwiinda mumilimu, wakazitondeezya eezi chiindi naakakwabilila basikulanga-langa nyika bachi-Israyeli babili chiindi buumi bwabo nibwakali mungoozi. Eezi zyakapa kuti mwanakazi ooyu wakatali wachi-Israyeli alubo wakatamaninide aambwe kuti uliluleme mbuli Abbrahamu. Chikozyano chakwe chitondeezya mbukuyandikana kuba aalusyomo luli aamilimu.w23.12 5-6 ¶12-13