Mbukunga tuli maKkristu, tatugoleli aakuziba njiisyo zyakusaanguna zyamuBbayibbili. Kwiinda mukugwasigwa aamuuya uusalala, tulilipedelede kwiiya “niziba zintu zinikide zyaLeza.” (1 Kor. 2:​9, 10) Nuli aawulikke, ulakonzya kusaanguna kubala atala azintu zipa kuti uswene aafwiifwi aJehova. Muchikozyano, ulakonzya kubala atala aJehova mbaakabatondeezya luyando bakombi bakwe bachiindi ambalikubatondeezya luyando mazubaano. Ulakonzya kubala atala aJehova mbaakali kuyanda kuti ma-Israyeli bamukombe ambayanda kuti maKkristu bamukombe mazubaano. Naakuti ulakonzya kubala atala abupolofita bwamuBbayibbili buli atala abuumi bwaJesu amulimu ngwaakachita naakali aanyika. Ulakonzya kubotelwa loko chiindi nwaanoobala nkani eezi kubelesya Watch Tower Publications Index naakuti Bbuku Ligwasya Kuvwuntauzya lyaBakamboni baJehova. Kubala Bbayibbili munzila iinikide kulakonzya kusimya lusyomo lwako alubo kulakugwasya kuti ujane “luzyibo lwa Leza.”—Tus. 2:​4, 5. w23.10 18-19 ¶3-5

Bbala ndyaakabelesya mwaapostoli Petro lyakuti “loko” mubufwiifwi lyaamba “kutalamuka.” Mamanino aavesi 8 apandulula mpindu zibawo kuti twayandana loko. Kuyandana loko kupa kuti tuvumbe zibi zyabakwesu abachizi. Tulakonzya kuzikozyanisya oobu: Atuteedi twajata luyando mumaboko, twalutalamuna mbuli mulembo uutalamuka mpawo twawudonsa kuti utajali chibi chimwi kupela pesi kuti ujale “zibi zyiingi kapati.” Kuvumba ninzila yakwaamba kuti tulekelele. Mbuli mulembo uutalamuka mbuukonzya kuvumba aali doti, luyando luvumba zintu nzibapambanisya bamwi akaambo kakutamaninina kwabo. Kuti twabayanda loko bamwi tulakonzya kubalekelela nibapambanisya nikuba kakuli kuyumu kuchita oobo. (Kol. 3:13.) Kuti twabalekelela bamwi nga tulikutondeezya kuti tuli aaluyando akuti tuyanda kubotezya Jehova. w23.11 11-12 ¶13-15

Naakaba aaminyaka iili 26, Mwaami Josiya wakalayilila kuti tempele lisaangune kubambululwa. Naakali kuchita mulimu ooyo, wakajana, “bbuku lya Mulawo wa Jehova lyakapegwa kwiinda muli Musa.” Naakamvwa bbuku eelyo kalilikubalwa, Mwaami Josiya wakabweza ntaamu kwiinda mukuchita zintu zyakalembedwe mubbuku eelyo. (2 Mak. 34:​14, 19-21) Ulayanda na kubala Bbayibbili chiindi choonse? Kuti kulikweezya kulibala, kulakunoneezya na kubala? Nga waamaka na mavesi aakugwasya? Josiya naakali waamba kusisya minyaka iili 39, wakachita chintu chakapa kuti afwe. Wakalisyoma kwiinda kuti akumbile Jehova kuti amuzulwide. (2 Mak. 35:​20-25) Twiiyaanzi? Nikuba kuti twakomena zili biyeni, naakuti twaba aachiindi chilamfu katuli kwiiya Bbayibbili, tweelede kukkala katuyanduula Jehova. Eezi ziswaanizya kukkala katukomba, kukumbila kuti atuzulwide, kubala Jwi lyakwe akukumbila kugwasigwa aabakombima basimide mubukombi. Kuti twachita oobo, tatukachiti zintu zipa kuti katuleye katabi alubo tuyookkala katubotelwa.—Jak. 1:25. w23.09 12 ¶15-16