Mugibelo, October 25
Safani wakatalika kulibala kumbele lyamwami.—2 Mak. 34:18.
Naakaba aaminyaka iili 26, Mwaami Josiya wakalayilila kuti tempele lisaangune kubambululwa. Naakali kuchita mulimu ooyo, wakajana, “bbuku lya Mulawo wa Jehova lyakapegwa kwiinda muli Musa.” Naakamvwa bbuku eelyo kalilikubalwa, Mwaami Josiya wakabweza ntaamu kwiinda mukuchita zintu zyakalembedwe mubbuku eelyo. (2 Mak. 34:14, 19-21) Ulayanda na kubala Bbayibbili chiindi choonse? Kuti kulikweezya kulibala, kulakunoneezya na kubala? Nga waamaka na mavesi aakugwasya? Josiya naakali waamba kusisya minyaka iili 39, wakachita chintu chakapa kuti afwe. Wakalisyoma kwiinda kuti akumbile Jehova kuti amuzulwide. (2 Mak. 35:20-25) Twiiyaanzi? Nikuba kuti twakomena zili biyeni, naakuti twaba aachiindi chilamfu katuli kwiiya Bbayibbili, tweelede kukkala katuyanduula Jehova. Eezi ziswaanizya kukkala katukomba, kukumbila kuti atuzulwide, kubala Jwi lyakwe akukumbila kugwasigwa aabakombima basimide mubukombi. Kuti twachita oobo, tatukachiti zintu zipa kuti katuleye katabi alubo tuyookkala katubotelwa.—Jak. 1:25. w23.09 12 ¶15-16
Nsondo, October 26
Leza ulabakazya aabo balisumpula, pesi aabo balibombya ubafwida luzyalo lupati.—Jak. 4:6.
Bbayibbili lyaambuula atala abanakazi biingi bakabelekela Jehova alubo bakali kumuyanda. Banakazi aaba bakali, ‘kulinyona muzintu nzibakali kuchita, alubo kabasyomeka muzintu zyoonse.’ (1 Tim. 3:11) Mukuyungizya, bachizi bachiniini balakonzya kwiiya kuzwa kubachizi bakomena mubukombi bali mumbungano yabo. Nibachizi bachiniini, mulakonzya na kuyanduula zikozyano ziche zyabachizi bakomena mubukombi alubo mubone mbumukonzya kutobelezya zikozyano zyabo? Mulange buntu mbubalaabo mpawo mubone mbumukonzya kubutobelezya. Buntu buyandikana loko muKkristu uusimide mubukombi mbwayelede kubaabo nkulibombya. Kuti muchizi kalibombya, ulaba aabweenzuma bulikabotu aJehova abamwi. Muchikozyano, muchizi uuyanda Jehova ulalibombya kwiinda mukusala kuswiilila mabambe aabusilutwe ngaakabikka Taateesu wakujulu. (1 Kor. 11:3) Mabambe aaya alabeleka mumbungano amumpuli. w23.12 18-19 ¶3-5
Muvulo, October 27
Balumi beelede kuyanda banakazi babo mbuli mbubayanda mibili yabo.—Ef. 5:28.
Jehova uyanda kuti baalumi bayande banakazi babo akubagwasya muzintu zyakumubili, balimvwe kabali beenzinyina akuti baswene aafwiifwi aJehova. Kuyeeya kabotu, kulemeka bantu bachanakazi akuchita zintu zipa kuti bamwi bakusyome, kulagwasya kuti uzoobe mwaalumi uulikabotu mulukwatano. Kuti wakwata, ulakonzya kuba wisi aabana. Niinzi nzukonzya kwiiya kuzwa kuli Jehova atala akuba ndeende uulikabotu? (Ef. 6:4) Jehova wakabuzya Mwanaakwe aantanganana kuti ulamuyanda akuti ulabotelwa anguwe. (Mt. 3:17) Kuti waba aabana, babuzye chiindi choonse kuti ulabayanda. Balumbayizye chiindi choonse nibachita zintu zilikabotu. Kuti baalumi bali aabana batobelezya chikozyano chaJehova, ngabali kugwasya bana babo kuti ambabo bakomene mubukombi. Ulakonzya kulibambila mulimu ooyu kwiinda mukutondeezya kuti ulaandaba abamumpuli yako abamumbungano akwiiya mbukonzya kubatondeezya luyando akubalumba.—Joh. 15:9. w23.12 28-29 ¶17-18