Nikuba kuti tuli bakombi baLeza basyomeka, tuswaanana aabuyumu-yumu alubo nga twachiswa mbuli bamwi boonse. Tulalisimya kukukazigwa naakuti kupenzegwa aabantu bazonda bakombi baJehova. Nikuba kuti Jehova tatukwabilili pe kubuyumu-yumu boonse oobu, pesi utusyomezya kuti ulatugwasya. (Is. 41:10) Kwiinda mukugwasigwa aaLeza, tulakonzya kukkala katubotelwa, katusala kabotu akuti katusyomeka nikuba kuti zyiimo zyayuma biyeni. Jehova usyomezya kutugwasya kwiinda mukutupa “luumuno lwaLeza.” (Flp. 4:​6, 7) Luumuno oolo, chaamba kulimvwa katubeteme mumizeezo amumoyo akaambo kakuti nga tuli aabweenzuma buyandikana loko aJehova. Luumuno oolo “lwiinda kumvwisisisya koonse,” nkukwaamba kuti ndubotu loko kwiinda mbutukonzya kuyeeyela. Kuli nwaakali walimvwa kubeteme na chiindi nwaakamana kukomba kuli Jehova amoyo woonse? Kuti kakuli oobo, wakalimvwa kubeteme akaambo kakuti Jehova wakakupa “luumuno lwaLeza.” w24.01 20 ¶2; 21 ¶4

Kuyanda Leza kupa kuti bakombi bakwe basyomeka batembawule zina lyakwe amoyo woonse. Mwaami Davida wakalizi kuti kutembawula zina lyaJehova nkutembawula Jehova lwakwe. Zina lyaJehova liswaanizya mpuwo yakwe alubo lituyeezya atala abuntu bubotu boonse mbwalaabo azintu zibotu nzyaakachita. Davida wakali kuchita zintu zitondeezya kuti zina lyaTaateesu likkale kalisalala alubo wakali kulitembawula. Wakali kuyanda kuti “zyoonse zili mukati” kakwe zitembawule zina lyaJehova lisalala. Munzila iikozyenie, maLevi bakali kuzulwida kukutembawula Jehova. Bakazumina kuti teebakali kutembawula zina lyaJehova chakumaninina mbuli mbulyeelede kuchitwa. (Neh. 9:5) Kulibombya kuli boobu akutembawula zina lyaJehova amoyo woonse kwakapa kuti Jehova abotelwe. w24.02 9 ¶6

Jehova takusoli pe kuti wakachilwa kuzuzikizya chipeekezyo nchwatali kukonzya pe. (2 Kor. 8:12) Bona twaambo twakapa kuti ukachilwe kuchizuzikizya mpawo ubambulule. Yeeyesesya atala azintu nzwaakazuzikizya kale. Bbayibbili lyaamba kuti “Leza, teeLeza uutaluleme pe, zyakuti nga ulaluba mulimu wanu.” (Heb. 6:10) Anduwe toyelede kuziluba pe zintu nzwaakachitila Jehova. Yeeyesesya atala azintu nzwaakazuzikizya kale mbuli kubelekela kuti ube aabweenzuma busimide aJehova, kubuzya bamwi atala anguwe akubbabbatizigwa. Mbuli mbwaakabeleka changuzu kuti uzuzikizye zipeekezyo zyako zyamubukombi chiindi, ulakonzya kubeleka changuzu lino kuti uzuzikizye zipeekezyo nzwaakakanza. Anduwe kuti wagwasigwa aJehova ulakonzya kuchizuzikizya chipeekezyo chako. Chiindi choonse yezya kubona Jehova mbalikukugwasya alubo ulakugwasya kuti ubotelwe chiindi nulikubelekela kuti uzuzikizye chipeekezyo chako. (2 Kor. 4:7) Kuti teewabweeda musule, uzoojana zilongezyo zyiingi.—Gal. 6:9. w23.05 31 ¶16-18