Jehova uyanduula nzila yakutondeezya kuti bantu bakwe ulabayanda akuti balatambulika kulinguwe. Magwalo aamba kuti kwaziindi zibili, Jehova wakabuzya Jesu kuti Mwanaakwe uuyandwa, uumubotezya. (Mt. 3:17; 17:5) Ulayanda na kumvwa Jehova kakubuzya kuti ulamubotezya? Jehova taambuuli aandiswe pe amulomo mpande pesi ubelesya Bbayibbili kuti aambuule aandiswe. Tulamumvwa Jehova kali kwaambuula aandiswe kuti twabala majwi aaJesu ngaakali kubuzya basikwiiya bakwe aali muMabbuku Aamakani Mabotu. Jesu wakatobelezya buntu bwaWisi munzila iimaninide. Nkinkaako, chiindi nitubala atala aJesu mbaakabuzya batobeli bakwe basyomeka batamaninide kuti ulabayanda, tulakonzya kuyeeyela Jehova kalikutubuzya majwi aayo andiswe. (Joh. 15:​9, 15) Kuti twaswaana mapenzi, tazyaambi kuti nga tatuchitambuliki pe kuli Leza. Pesi mapenzi atupa mweenya wakutondeezya mbutumuyanda Leza akutondeezya kuti tulamusyoma.—Jak. 1:12. w24.03 28 ¶10-11

Kuti kuli muzyali, gwasya bana bako kuti balibambile nsandulo zyeendelana aaminyaka yabo. Chimwi chiindi, kumiswaangano nga twayiya nkani zipati zili mbuli mapenzi aamulukwatano ankani zyakulijata, pesi kunooli mafuka bana ngibakonzya kusandula. Alubo gwasya bana bako kuti bamvwisisisye kuti nkamboonzi chimwi chiindi nibataambwi kuti basandule nikuba kuti ngabatambika. Kubapandulwida makani aaya kulakonzya kubagwasya kuti batanyemi chiindi nikwaambwa bamwi kuti basandule kutali mbabo. (1 Tim. 6:18) Toonse tuyanda kulibambila nsandulo zipa kuti Jehova alemekwe alubo zisungwaazya bakombima. (Tus. 25:11) Chimwi chiindi tulakonzya kwaamba zintu zyakatuchitikila mubuumi, pesi tatweelede kwaamba zintu zyiingi loko zili atala andiswe. (Tus. 27:2; 2 Kor. 10:18) Chiindi nitwaamba zintu zyakatuchitikila, tweelede kuba aachoonzyo chakuti twaamba zintu zitondeezya mbutwakagwasigwa aJehova, Jwi lyakwe abakombima.—Chi. 4:11. w23.04 24-25 ¶17-18

Luyando lulayandikana kuti tukkale katulangide alubo katuyeeya kabotu. (Mt. 22:​37-39) Kuyanda Jehova kutugwasya kuti tulisimye kufumbwa buyumu-yumu mbutukonzya kuswaana chiindi nituchita mulimu wakukambawuka. (2 Tim. 1:​7, 8) Akaambo kakuti tulabayanda aabo mbitukambawukila, tatuleki pe kubakambawukila nikuba kubakambawukila katubelesya mafooni akubalembela magwalo. Tuli aabulangilizi bwakuti limwi zuba bazoochincha akusaanguna kuchita zintu zilikabotu. (Ezk. 18:​27, 28) Kuyanda basimayakilane kuswaanizya kuyanda bakombima. Tutondeezya kuti tulabayanda kwiinda mukwiinkilila kunembo ‘kusungwaazyania akuyakana.’ (1 Tes. 5:11) Mbuuli masooja mbaabelekelaamwi, andiswe tulasungwaazyania. Tulakonzya kuchita zintu zichisa bakwesu abachizi pesi eezi nga tatuzichiti aachaali alubo kuti batubisizya tatubabweedezyi pe. (1 Tes. 5:​13, 15) Alubo tutondeezya luyando kwiinda mukulemeka bakwesu bazulwida mumbungano.—1 Tes. 5:12. w23.06 10 ¶6; 11 ¶10-11