Niinzi nzukonzya kuchita kuti usimye bulangilizi bwako? Muchikozyano, kuti kuli aabulangilizi bwakuyoopona aanyika kukabe kutamani, bala makani aamuBbayibbili aali atala aParadayizi mpawo uyeeyesesye atala angawo. (Is. 25:8; 32:​16-18) Yeeyela mbubunoobede buumi munyika mpya. Libone kuliwo. Kuti twakkala katuyeeyesesya atala anyika mpya, mapenzi eesu alaba ‘aachiindi chifwiifwi alubo alaba mawuba.’ (2 Kor. 4:17) Bulangilizi mbwakupede Jehova, bulakonzya kukugwasya kuti ulisimye. Jehova utupede zintu zitugwasya kuti tulisimye. Nkinkaako, kuti kuyanda kugwasigwa kuti uchite mulimu wako, ulisimye kumasunko nguswaana naakuti ukkale kubotelwa, komba kuli Jehova kazizwa aansi aamoyo alubo umukumbile kuti akuzulwide nubala Bbayibbili kuli aawulikke. Zumina kusungwaazigwa aabakombinyokwe. Kkala kuli aabulangilizi. Kuti wachita oobo, ‘ulasimisigwa amanguzu woonse kweendelana amanguzu [aaLeza] aagambya, kuchitila kuti ulisimye chakumaninina amoyo mulamfu akukondwa.’—Kol. 1:11. w23.10 17 ¶19-20

Kuli twaambo twiingi loko tupa kuti tulumbe Jehova munkombyo. Tulakonzya kumulumba akaambo kazintu nzitulaazyo nkaambo zintu zyoonse zibotu nzitulaazyo zizwa kulinguwe. (Jak. 1:17) Muchikozyano, tulakonzya kumulumba akaambo kabubotu bwanyika azintu zyakalengwa. Alubo tulakonzya kumulumba akaambo kakutupa buumi, kutupa bamumpuli, beenzuma abulangilizi. Alubo tuyanda kulumba Jehova akaambo kakutuzumizya kuti tube beenzinyina. Kulayandikana kuti tuyeeyesesye atala azintu nzituyanda kulumba Leza kutugama. Tulikupona munyika muzwide bantu batalumbi. Bantu biingi babikkila maanu kuzintu nzibayanda kutali kuzintu nzibeelede kuchita kuti batondeezye kuti balalumba kuzintu nzibalaazyo. Kuti twaba aamuuya ooyo, nkombyo zyesu zilaba zyakukumbila luzutu. Kuti tutachegwi aamuuya ooyu, tweelede kukkala katuli bantu balumba Jehova akaambo kazintu zyoonse nzyatuchitila.—Lk. 6:45. w23.05 4 ¶8-9

Akaambo kakuti Jehova nguTaata siluyando, tabotelwi pe chiindi natubona katuli mumapenzi. (Is. 63:9) Pesi tatukwabilili pe kumasunko woonse ngituswaana, aali mbuli milonga naakuti mabanga-banga aamulilo. (Is. 43:2) Nikuba oobo, wakatusyomezya kuti ulatugwasya kuti ‘twiinde’ mulingawo. Alubo unootugwasya kuti tukkale katumukomba. Jehova utupa muuya wakwe uusalala kuti utugwasye kuti tulisimye. (Lk. 11:13; Flp. 4:13) Eezi zipa kuti tube aachoonzyo chakuti chiindi choonse Jehova unootugwasya azintu nzituyandikana kuchitila kuti tulisimye akuti tukkale katusyomeka kulinguwe. Jehova uyanda kuti tumusyome. (Heb. 11:6) Chimwi chiindi, tulakonzya kubonaanga masunko ngituswaana mayumu loko. Alubo tulakonzya kusaanguna kubonaanga Jehova takonzyi pe kutugwasya. Pesi Bbayibbili litusyomezya kuti kwiinda munguzu zyaLeza, tulakonzya “kutanta bwaanda.” (Int. 18:29) Kwiinda kuti tuzumbuuzye, tulakonzya kukomba kuli Jehova katuli aalusyomo lwakuti ulazisandula nkombyo zyesu.—Jak. 1:​6, 7. w23.11 22 ¶8-9