Levitikko
25 Mukuyungizya, Jehova wakaambuula aaMozesi aaChilundu chaSinayi kati: 2 “Ambuula aama-Israyeli ubabuzye kuti: “Nimwazoosika munyika njinditamupe, nyika eeyo yeelede kuzoobamba sabata lyaJehova. 3 Kwaminyaka iili musanu awumwi, mweelede kubyala mbuto mumyuunda yanu mpawo kwaminyaka iili musanu awumwi, mweelede kukwezuula misaansa yamumyuunda yanu alubo mweelede kubunganizya butebuzi bwanyika. 4 Pesi mumunyaka wamusanu ayibili, kweelede kuba sabata lyakuti nyika ipumune chakumaninina, sabata lyaJehova. Tamweelede kubyala mbuto mumyuunda yanu naakuti kukwezuula misaansa yamumyuunda yanu. 5 Tamweelede kutebula kufumbwa chintu chakalimenena kuzwa kuzilyo zyakasyaala nimwakali kutebula alubo mutabunganizyi masaansa kuzwa kumisaansa yanu yakatakwezuulwa pe. Kweelede kuba munyaka wakuti nyika ipumune chakumaninina. 6 Nikuba oobo, mulakonzya kulya chakulya chilimenena munyika mumunyaka wasabata, inywe, bazike banu bachaalumi abachanakazi, mubelesi uubbadalwa abantu bazwa kuliimwi nyika bakkede aandinywe, 7 kuswaanizya abanyama bavubwa abanyama bamusokwe bamunyika yanu. Zyoonse zimena munyika zilakonzya kuligwa.
8 “‘Weelede kubala minyaka yamasabata aali musanu aabili, minyaka iili musanu ayibili yiindulwidwe tuli musanu atubili alubo mazuba aaminyaka yamasabata aali musanu aabili, ayelede kuba minyaka iili 49. 9 Muzoopa kuti mweembo ulilile aajulu mumweezi wamusanu ayibili mubuzuba bwakkumi, muBuzuba Bwakumaninsya Milandu, mweelede kupa kuti kulila kwamweembo kumvwike munyika yanu yoonse. 10 Mweelede kusalazya munyaka wachi 50 alubo mwaambilizye lwaangunuko munyika kubantu boonse bakkala mulinjiyo. Ulaba Munyaka wanu Walwaangunuko, umwi awumwi ulabweeda kunyika yakwe alubo umwi awumwi ulabweeda kumpuli yakwe. 11 Munyaka wachi 50 ulaba Munyaka wanu Walwaangunuko. Tamweelede kubyala mbuto naakuti kutebula zilyo zyakalimenena azilikke kuzwa kuzilyo zyakasyaala, nikuba kubunganizya masaansa kuzwa kumisaansa yakatakwezuulwa. 12 Nkaambo ooyu Munyaka Walwaangunuko, weelede kusalala kulindinywe. Mulakonzya kulya eezyo zyakalimenena azilikke munyika.
13 “‘MuMunyaka ooyu Walwaangunuko, umwi awumwi wanu weelede kubweeda kulukono lwakwe. 14 Kuti wawuzizya mweenzinyokwe nikuba kuula chimwi chintu kuzwa kulinguwe, mutabbidilani pe. 15 Nuula chimwi chintu kuzwa kumweenzinyokwe, weelede kubala kuti kwakayinda minyaka iingane kuzwa muMunyaka Walwaangunuko alubo sikuuzya weelede kukuuzizya kweendelana aaminyaka yasyaala yakutebula zilyo. 16 Kuti kakusyeede minyaka myiingi, muulo wakwe ulakonzya kuutansika, pesi kuti kakusyeede minyaka miche, muulo wakwe ulakonzya kuuselusya nkaambo uliikuuzya kweendelana aaminyaka yasyaala yakutebulwa kwazilyo. 17 Taakwe muntu aakati kanu weelede kubbida mweenzinyina alubo mweelede kuyoowa Leza wanu, nkaambo ndime Jehova Leza wanu. 18 Kuti mwabamba milawu yangu akutobela nzila zyangu zyakubeteka, muzookkala munyika eeyo kamulyiibide. 19 Nyika izoomupa butebuzi bwayo, muzoolya mukkute alubo muzookkala mulinjiyo kamulyiibide.
20 “‘Pesi kuti mwaamba kuti: “Ani tuzoolyaanzi mumunyaka wamusanu ayibili, kakuli tatuzoobyali mbuto nikuba kubunganizya zilyo?” 21 Ndizoopa kuti mujane chilongezyo mumunyaka wamusanu awumwi alubo nyika izoomupa butebuzi bukkwana minyaka iitatu. 22 Mpawo muzoobyala mbuto mumunyaka wamusanu ayitatu alubo muzoolya zilyo zyachiindi kusikila mumunyaka wamusanu ayine. Muzoolya zilyo zyachiindi kusikila nzimutazoobyale zizoobizwe.
23 “‘Nyika tiyelede kuuzigilwaatu pe nkaambo nyika njiyangu. Ime ndimubona kamuli bamuzwakule abeenzu. 24 Munyika yoonse yalukono lwanu, mweelede kupa kuti sikuuzya muunda abe aacheelelo chakuzoowuula lubo.
25 “‘Kuti bbululu wako wafwaba mpawo wawuzya lumwi lubono lwakwe, sikunununa uuli aafwiifwi anguwe, weelede kusika awuule lubo muunda ooyo. 26 Kuti umwi muntu katakwe sikunununa, pesi wazoonota alubo wajana nzila yakuuwuula lubo, 27 weelede kubala mali yeendelana aazilyo nzyaakajana kuzwa mumunyaka ngwaakawuzya muunda mpawo abbadale mali iitasyaale kuzwa kumali njaakawuuzyaayo muunda mpawo ulakonzya kubweeda kulubono lwakwe.
28 “‘Pesi kuti katakonzyi kuboozya nzyaakawuzya, zizookkala kazili zyasikuula kusikila muMunyaka Walwaangunuko alubo zizooboola kulinguwe muMunyaka Walwaangunuko mpawo ulabweeda kulubono lwakwe.
29 “‘Kuti muntu wawuzya muunzi uuli mumuunzi uukwabililidwe aamuduli, ulayinkilila kunembo kali aacheelelo chakuunununa kusika kumamanino aamunyaka kuzwa chiindi naakawuuzya. Unooli aacheelelo chakuunununa lubo kwamunyaka woonse. 30 Pesi kuti teewaboozegwa pe kumamanino aamunyaka uukkwene, ng’anda eeyo iili aakati kamuunzi uukwabililidwe ilaba lubono lutamani lwasikwiiwula kumazyalani aakwe woonse. Tiyelede kubweedezegwa pe muMunyaka Walwaangunuko. 31 Nikuba oobo, maanda aali mumyuunzi iitakwabililidwe ayelede kubonwa mbuli myuunda. Cheelelo chakwiiwula lubo tacheelede kumana pe alubo yeelede kubweedezegwa muMunyaka Walwaangunuko.
32 “‘Pesi maanda aamaLevi aali mukati kamyuunzi yabo, maLevi anookkede kali aacheelelo chakwaanununa kukabe kutamani. 33 Kuti lubono lwamaLevi teelwawulwa pe, ng’anda iili mumuunzi wabo yakawuzigwa izoowangununwa muMunyaka Walwaangunuko nkaambo maanda aamyuunzi yamaLevi, ndukono lwabo aakati kama-Israyeli. 34 Mukuyungizya, ndawu yamachezezyo iizyungulukide myuunzi yabo tiyelede kuuzigwa pe nkaambo ndukono lwabo kukabe kutamani.
35 “‘Kuti umwi mu-Israyeli uukkede aafwiifwi anduwe wafwaba zyakuti tachikonzyi pe kulisanina, weelede kumugwasya mbuli mbuchita muntu uuzwa kuliimwi nyika naakuti uukkala aakati kanu, kuchitila kuti ayinkilile kunembo kupona kali aamwi anduwe. 36 Utabwezi mpindu yiindilide naakuti mali yako kayili yazyala kuzwa kulinguwe. Weelede kuyoowa Leza wako alubo mu-Israyelinyokwe uzooyinkilila kunembo kupona kalaamwi anduwe. 37 Toyelede kumukweletesya mali kuyanda kuti izoozyale naakuti kumupa chakulya kuyanda mpindu yiindilide. 38 Ndime Jehova Leza wanu wakamugwisya munyika ya-Ijipita kuti ndimupe nyika yaKkenani, kuchitila kuti ndimutondeezye kuti ndime Leza wanu.
39 “‘Kuti mu-Israyelinyokwe uukkala aafwiifwi anduwe wafwaba mpawo walyuuzya kulinduwe, toyelede kumumanikizya kuchita milimu yabuzike. 40 Weelede kujatwa mbuli mubelesi uubbadalwa, mbuli muntu uukkala munyika eeyo. Weelede kubelekaamwi anduwe kusikila muMunyaka Walwaangunuko. 41 Kuzwa waawo, ulakusiya we abana bakwe mbalaabo mpawo abweede kubabbululu bakwe. Weelede kubweeda kulukono lwamasianyinakulu. 42 Nkaambo mbazike bangu mbindakagwisya munyika ya-Ijipita. Tabeelede kulyuuzya munzila njawuzigwaayo muzike. 43 Toyelede kumujata chalunya pe alubo weelede kuyoowa Leza wako. 44 Bazike banu bachaalumi abachanakazi beelede kuzwa kuzisi zimuzyungulukide. Mweelede kuula bazike bachaalumi naakuti bachanakazi kuzwa kubantu aabo. 45 Alubo mulakonzya kuula bazike kuzwa kubana babantu bazwa kuli zimwi zisi bakkede aandinywe. Mulakonzya kubawula kuzwa kulimbabo akuzwa kubana bamumpuli zyabo bakazyalilwa munyika yanu mpawo bazooba lukono lwanu. 46 Nimwafwa, mulakonzya kubasiila bana banu kuti babe lukono lwabo kukabe kutamani. Balakonzya kuba babelesi banu, pesi tamweelede kubajata chalunya pe ma-Israyelinyokwe.
47 “‘Pesi kuti muntu uuzwa kuliimwi nyika naakuti muntu uukkede aakati kanu wanota mpawo mu-Israyelinyokwe uukkede aafwiifwi anguwe wafwaba mpawo walyuuzya kumuntu ooyo uuzwa kuli chimwi chisi naakuti kumuntu uukkede aakati kanu naakuti kuli umwi wamumpuli yamuntu uuzwa kuli chimwi chisi, 48 ulayinkilila kunembo kali aacheelelo chakunununwa nazwaakulyuuzya. Mukulanaakwe ulakonzya kumunununa, 49 naakuti wisi mupati naakuti mwana wawisi mupati ulakonzya kumunununa naakuti bbululu wakwe waafwiifwi, umwi wamumpuli yakwe, ulakonzya kumunununa.
“‘Naakuti we lwakwe kuti wanota, ulakonzya kulinununa. 50 Muntu ooyo kalaamwi asikunununa, beelede kubala minyaka kuzwa naakalyuuzya kulinguwe kusikila muMunyaka Walwaangunuko alubo mali njaakawuzigwaayo yeelede kweendelana aaminyaka eeyo. Nzila njaabelekaayo muchiindi eecho yeelede kweendelana aamali njafola mubelesi uubbadalwa. 51 Kuti kakuchili minyaka myiingi iisyeede, weelede kubbadala mali yakunununa yeendelana aaminyaka iisyeede. 52 Pesi kuti kakuchisyeede minyaka miche kuti Munyaka Walwaangunuko usike, weelede kulibalila mpawo abbadale mali yakwe yakwaangununwa yeendelana aaminyaka iisyeede. 53 Weelede kwiinkilila kunembo kamubelekela munyaka amunyaka mbuli mubelesi uubbadalwa mpawo weelede kuba aachoonzyo chakuti tamujati chalunya pe. 54 Nikuba oobo, kuti katakonzyi kulinununa kweendelana anzila eezi, uzoowangununwa muMunyaka Walwaangunuko, kuswaanizya abana bakwe.
55 “‘Nkaambo ma-Israyeli mbazike bangu. Mbazike bangu mbindakagwisya munyika ya-Ijipita. Ndime Jehova Leza wanu.