Levitikko

7 “‘Ngoyu mulawu uuli atala achipo chamulandu: Nchintu chisalalisya. 2 Chipo chamulandu bazoochijayila kundawu nkubajayila zipo zitentwa alubo ganzi lyacho lyeelede kusansiilwa mumabazu woonse aachipayililo. 3 Uzoopa mafuta aacho woonse kuswaanizya amafuta aakumuchila aluvumbula* 4 ansa zibili amafuta aazyo aali aafwiifwi amala. Alubo uzoogwisya mafuta aali aachini, aamwi ansa. 5 Mupayizi uzoozitenta kuti zisuke busi aachipayililo kazili chipo chitentwa kuli Jehova. Nchipo chamulandu. 6 Bapayizi boonse bachaalumi bazoochilya alubo cheelede kulidwa mundawu iisalala. Nchintu chisalalisya. 7 Mulawu uuli atala achipayizyo chachibi ulabeleka akuchipo chamulandu. Nyama yachipayizyo eecho njamupayizi njaabelesya kumaninsya milandu.

8 “‘Mupayizi napa chipo chitentwa chawumwi muntu, chikumba chachipo chitentwa nchaakapegwa, chilaba chamupayizi.

9 “‘Chipo choonse chazilyo chijikilwa mu-oveni naakuti chijikilwa mumpani naakuti mumpani yakukangila, nchamupayizi uuchipa. Chilaba chakwe. 10 Pesi chipo choonse chazilyo chiswaanizidwe aamafuta naakuti chitaswaanizidwe aamafuta, chilaba chabana ba-Aroni. Umwi awumwi ulajana chaabilo cheelene.

11 “‘Ngoyu mulawu uuli atala achipayizyo chalumvwanano muntu nchakonzya kupa Jehova: 12 Kuti kalikucheeta kuti atondeezye kulumba, weelede kucheetaamwi achipayizyo chakulumba chazinkwa zyalawundi zili aampako aakati zitakwe bumena, ziswaanizidwe aamafuta azinkwa zipapalete zitakwe bumena zinanidwe mafuta azinkwa zyalawundi zili aampako aakati zyakajikwa aafulawa nante iiswaanizidwe kabotu-kabotu amafuta. 13 Uzooyeta chipo chakwe chalumvwanano aamwi azinkwa zyalawundi zili aampako aakati zyachinkwa chili aabumena achipayizyo chakulumba chachipayizyo chakwe chalumvwanano. 14 Kumusyobo umwi awumwi wachipo, uzoogwisya chimwi kuti achipe kachili chaabilo chisalala kuli Jehova. Chilaba chamupayizi uusansiila ganzi lyazipayizyo zyalumvwanano. 15 Nyama yachipayizyo chakulumba, yazipayizyo zyalumvwanano yeelede kuligwa mubuzuba mbwayipa. Taakwe njayelede kubamba kusika kuseeni.

16 “‘Kuti chipayizyo chakwe kachili nchipo chachikonke naakuti nchipo chakuliyandila biya, cheelede kuligwa mubuzuba mbwapa chipayizyo chakwe mpawo chasyaala chilakonzya kuligwa mubuzuba butobela. 17 Pesi kufumbwa nyama yachipayizyo iisyaala kusikila mubuzuba bwachitatu, yeelede kutentwa mumulilo. 18 Nikuba oobo, kuti nyama yachipayizyo chakwe chalumvwanano yaligwa mubuzuba bwachitatu, ooyo wiipa takootambulwa pe. Chipayizyo eecho tachikoopa kuti ayandwe pe, nchisesemyo alubo muntu uuchilya uzoolisandwida akaambo kamulandu wakwe. 19 Nyama iiguma chintu chitasalali tayeelede kuligwa pe, yeelede kutentwa mumulilo. Kufumbwa muntu uusalala ulakonzya kulya nyama iisalala.

20 “‘Pesi kufumbwa muntu uusofweede alubo uulya nyama yachipayizyo chalumvwanano chaJehova, muntu ooyo weelede kujayigwa aakati kabantu bakulimbabo. 21 Kuti umwi muntu wajata chimwi chintu chisofweede, kufumbwa kuti nkusofwaala kuzwa kumuntu naakuti munyama uusofweede naakuti kufumbwa chintu chisesemya chisofweede mpawo walya imwi nyama yachipayizyo chalumvwanano chaJehova, muntu ooyo weelede kujayigwa aakati kabantu bakulimbabo.’”

22 Jehova wakayinkilila kunembo kwaambuula aaMozesi kati: 23 “Buzya ma-Israyeli kuti, ‘Taakwe mafuta ngimweelede kulya pe, abe aapule wang’ombe naakuti aakagutu naakuti aakapongo. 24 Mafuta aamunyama wakalifwida amafuta aamunyama wakajayigwa aawumwi munyama alakonzya kubelesegwa kuli zimwi zintu zyoonse, pesi tamweelede kwaalya pe. 25 Nkaambo kufumbwa muntu uulya mafuta aamunyama ngwaayeta kachili chipo chitentwa aamulilo kuli Jehova, weelede kujayigwa aakati kabantu bakulimbabo.

26 “‘Tamweelede kulya ganzi pe kufumbwa mundawu mumukkala, kufumbwa kuti ndyabayuni naakuti ndyabanyama. 27 Kufumbwa muntu uulya chintu choonse chitegwa ganzi, weelede kujayigwa aakati kabantu bakulimbabo.’”

28 Jehova wakayinkilila kunembo kwaambuula aaMozesi kati: 29 “Buzya ma-Israyeli kuti, ‘Kufumbwa muntu weeta chipayizyo chakwe chalumvwanano kuli Jehova, weelede kweetela Jehova chipanzi chachipo kuzwa kuchipayizyo chakwe chalumvwanano. 30 Uzooyeta mafuta kuswaanizya akaango kazijisi mumaboko, kachili chipo chitentwa aamulilo kuli Jehova. Mpawo uzoochiyumbila ooku akooku kachili chipo chakuyumba kunembo lyaJehova. 31 Mupayizi uuzootenta mafuta kuti asuke busi aachipayililo, pesi kaango kalaba ka-Aroni abana bakwe.

32 “‘Mweendo wachilisyo wazipayizyo zyalumvwanano, muzoowupa mupayizi kawuli chipanzi chisalala. 33 Umwi wabana ba-Aroni uunooli wapa ganzi lyazipayizyo zyalumvwanano amafuta, nguwe uubweza mweendo wachilisyo kawuli chaabilo chakwe. 34 Nkaambo ndabweza kaango kachipo chakuyumba amweendo wachaabilo chisalala uuzwa kuzipayizyo zyalumvwanano zyama-Israyeli, kuti ndizipe Aroni mupayizi abana bakwe. Ooyu mulawu walyoonse alyoonse wama-Israyeli.

35 “‘Eechi nchiichaabilo chakazwa kuzipo zyaJehova zitentwa aamulilo chakabikkwa kumbali kuti chibe chabapayizi, Aroni abana bakwe mubuzuba naakababikka kuti babeleke kabali bapayizi kuli Jehova. 36 Jehova wakalayilila kuti bapegwe chaabilo eechi kuzwa kuma-Israyeli mubuzuba naakabananika. Ooyu mulawu ngwaayelede kutobela mazyalani aabo kukabe kutamani.’”

37 Ooyu nguumulawu uuli atala achipo chitentwa, chipo chazilyo, chipayizyo chachibi, chipo chamulandu, chipayizyo chakusalwa kwabapayizi achipayizyo chalumvwanano, 38 mbuli Jehova mbaakalayilila Mozesi muChilundu chaSinayi mubuzuba mbwaakalayilila ma-Israyeli kuti bape zipo zyabo kuli Jehova munkanda yaSinayi.