Levitikko

9 Mubuzuba bwamusanu aatatu, Mozesi wakayita Aroni abana bakwe abaalu bama-Israyeli. 2 Wakati kuli Aroni: “Bweza mwana wang’ombe uulikabotu wachipayizyo chako chachibi amugutu uulikabotu wachipo chitentwa, ubeete kunembo lyaJehova. 3 Pesi ma-Israyeli ubabuzye kuti, ‘Amubweze pule wampongo wachipayizyo chachibi amwana wang’ombe akagutu zili aamunyaka uumwi, zilikabotu kuti zibe chipo chitentwa, 4 apule wang’ombe amugutu zyachipayizyo chalumvwanano kuti muzipayizye kunembo lyaJehova. Alubo mubweze chipo chazilyo chiswaanizidwe aamafuta, nkaambo sunu Jehova ulaboneka kulindinywe.’”

5 Nkinkaako, bakabweza zintu Mozesi nzyaakalayilila, bazyeeta kunembo lyatente lyakuswaanganina. Mpawo mbungano yoonse yakaza kunembo yayimikila kunembo lyaJehova. 6 Mozesi wakati: “Nzezi Jehova nzyaalayilila kuti muchite, kuchitila kuti bulemu bwaJehova buboneke kulindinywe.” 7 Mpawo Mozesi wakabuzya Aroni kuti: “Swena aafwiifwi achipayililo, upe chipayizyo chako chachibi achipo chako chitentwa, kuti umaninsye milandu yako amilandu yabamung’anda yako. Alubo upe zipo zyabantu, kuti milandu yabo imane, mbuli Jehova mbaakalayilila.”

8 Aachiindi nchicheecho, Aroni wakasika aafwiifwi achipayililo, wajaya mwana wang’ombe wachipayizyo chazibi zyakwe. 9 Mpawo bana ba-Aroni bakamweetela ganzi alubo wakatompa kanwe kakwe muganzi walilamba aameja aachipayililo. Mpawo ganzi lyakasyaala wakalitila aansi aachipayililo. 10 Wakabweza mafuta ansa amafuta aali aachini kuzwa kuchipayizyo chachibi mpawo wakazitenta kuti zisuke busi aachipayililo mbuli Jehova mbaakalayilila Mozesi. 11 Mpawo wakatenta nyama achikumba aanze aakkeempu.

12 Kuzwa waawo, Aroni wakajaya chipo chitentwa alubo bana bakwe bakamweetela ganzi mpawo wakalisansiila mumabazu woonse aachipayililo. 13 Bakamupa zipanzi zyanyama yachipo chitentwa aamwi amutwe mpawo wakazitenta kuti zisuke busi aachipayililo. 14 Mukuyungizya, wakasanzya mala amyeendo mpawo wakazitenta kuti zisuke busi aamwi achipo chitentwa aachipayililo.

15 Kuzwa waawo, wakapa chipo chabantu mpawo wakabweza mpongo yachipayizyo chazibi yakali yabantu, wiijaya alubo wakapa kuti ibe yachipayizyo chazibi mbuli yakusaanguna. 16 Wakabweza chipo chitentwa wachichita kweendelana azyaambwa aamulawu.

17 Mbaakachita oobo, wakapa chipo chazilyo mpawo wakanokola chimwi chacho chizula mukuboko alubo wakachitenta kuti chisuke busi achipayililo, kuyungizya kuchipo chitentwa kuseeni.

18 Kuzwa waawo, wakajaya pule wang’ombe amugutu zyachipayizyo chalumvwanano chakali chabantu. Bana ba-Aroni bakamweetela ganzi alubo wakalisansiila mumabazu woonse aachipayililo. 19 Pesi mafuta aapule wang’ombe, mafuta aakumuchila wamugutu, luvumbula,* nsa amafuta aali aachini, 20 zipanzi zyoonse eezi zyamafuta, bakazibikka aatwaango mpawo wakatenta zipanzi eezyo zyamafuta kuti zisuke busi aachipayililo. 21 Pesi Aroni wakabweza twaango amweendo wachilisyo waziyumba ooku akooku kazili chipo chakuyumba kunembo lyaJehova, mbuli Mozesi mbaakalayilila.

22 Mpawo Aroni wakalanga kubantu watambika maboko, wabalongezya.* Wakaseluka naakazwaakupa chipayizyo chachibi achipo chitentwa azipayizyo zyalumvwanano. 23 Kumamanino, Mozesi a-Aroni bakanjila mutente lyakuswaanganina mpawo bakazwa, balongezya bantu.

Aachiindi eechi, bulemu bwaJehova bwakaboneka kubantu boonse, 24 mpawo kwakazwa mulilo kuli Jehova alubo wakasaanguna kutenta zipo zitentwa azipanzi zyamafuta zyakali aachipayililo. Bantu boonse nibakabona zyakachitika, bakasaanguna koompolola mpawo bakavuntama, balanga aansi.