Levitikko

15 Jehova wakayinkilila kunembo kwaambuula aaMozesi a-Aroni kati: 2 “Amwaambuule aama-Israyeli mubabuzye kuti, ‘Kuti mwaalumi waba aabulwazi bwakuzwa zintu zili mbuli busina kuchizo chakwe chakuzyazya, kuzwa kwazintu eezyo kupa kuti atasalali pe. 3 Ulasofwaala akaambo kazintu eezyo, kazitakwe ndaba pe kuti zichizwa na kuchizo chakwe naakuti tazichizwi pe, unooli tasalali pe.

4 “‘Kufumbwa bulo mpaalala muntu ooyo uulikuzwa zintu eezyo bulasofwaala alubo kufumbwa chintu nchaakkala chilasofwaala. 5 Muntu uuguma bulo bwamuntu ooyo weelede kuwacha zigogo zyakwe, akusamba aamaanzi alubo ulasofwaala kusika goko. 6 Kufumbwa muntu uukkala aachintu chakkedwe aamuntu ooyo uulikuzwa zintu eezyo weelede kuwacha zigogo zyakwe, asambe aamaanzi alubo ulasofwaala kusika goko. 7 Kufumbwa muntu uuguma mubili wamuntu uulikuzwa zintu eezyo weelede kuwacha zigogo zyakwe, asambe aamaanzi alubo ulasofwaala kusika goko. 8 Kuti muntu uulikuzwa zintu eezyo waswida muntu uutasofweede mate, muntu ooyo waswidwa mate weelede kuwacha zigogo zyakwe, asambe aamaanzi alubo ulasofwaala kusika goko. 9 Kufumbwa chakukkalila nchabelesya muntu uulikuzwa zintu eezyo nagede munyama chilasofwaala. 10 Kufumbwa muntu uujata zintu zyakkedwe aamuntu ooyo ulasofwaala kusika goko alubo kufumbwa muntu uubweza zintu eezyo, weelede kuwacha zigogo zyakwe, asambe aamaanzi alubo ulasofwaala kusika goko. 11 Kuti muntu uulikuzwa zintu zibaanga mbusina wajata umwi muntu katasambide mumaboko, muntu ooyo wajatwa weelede kuwacha zigogo zyakwe, asambe amubili alubo ulasofwaala kusika goko. 12 Kufumbwa chibelesyo chabulongo nchaajata muntu ooyo uulikuzwa zintu eezyo, cheelede kupwachuulwa alubo kufumbwa chibelesyo chachisamu nchaajata cheelede kusanzigwa.

13 “‘Kuti zintu eezyo zyaleka kuzwa mpawo muntu ooyo wasalala kuzwa kulinzizyo, weelede kubala mazuba aali musanu aabili aakulisalazya kwakwe alubo weelede kuwacha zigogo zyakwe asambe aamaanzi aazwa mukasawu mpawo ulasalala. 14 Mubuzuba bwamusanu aatatu, weelede kubweza nziba zibili naakuti bana bankwilimba babili, aze kunembo lyaJehova kumanjililo aatente lyakuswaanganina mpawo azipe mupayizi. 15 Mupayizi ulazipa, imwi ilaba yachipayizyo chachibi mpawo imwi ilaba yachipo chitentwa alubo mupayizi ulamaninsya milandu yamwaalumi ooyo kunembo lyaJehova akaambo kazintu eezyo zyakali kuzwa.

16 “‘Kuti mwaalumi wasuba bwaalumi, weelede kusamba aamaanzi mubili woonse alubo ulasofwaala kusika goko. 17 Weelede kuwacha kufumbwa chigogo naakuti kufumbwa chintu chachikumba chalokelwa aabwaalumi bwakwe alubo chilasofwaala kusika goko.

18 “‘Kuti mwaalumi woona aamwanakazi mpawo wasuba bwaalumi, boonse beelede kusamba aamaanzi alubo balasofwaala kusika goko.

19 “‘Kuti mwanakazi wazwa ganzi akaambo kakuti uli kumweezi, ulakkala kasofweede kwamazuba aali musanu aabili. Kufumbwa muntu uumuguma ulasofwaala kusika goko. 20 Kufumbwa aachintu mpaalala nali kumweezi chilasofwaala alubo kufumbwa chintu nchaakkala chilasofwaala. 21 Kufumbwa muntu uuguma bulo bwakwe weelede kuwacha zigogo zyakwe, asambe aamaanzi alubo ulasofwaala kusika goko. 22 Muntu uuguma kufumbwa chintu nchaakkede mwanakazi ooyo, weelede kuwacha zigogo zyakwe, asambe aamaanzi alubo ulasofwaala kusika goko. 23 Kuti mwanakazi ooyo wakkala aabulo naakuti aali chimwi chintu mpawo umwi muntu waguma bulo oobo naakuti chintu eecho, ulasofwaala kusika goko. 24 Kuti mwaalumi woona aamwanakazi ooyo mpawo wasofwaazigwa aaganzi lyakwe lyakumweezi, mwaalumi ooyo ulasofwaala kwamazuba aali musanu aabili alubo kufumbwa aabulo mpaalala alasofwaala.

25 “‘Kuti mwanakazi wazwa ganzi kwamazuba miingi kakuli teenchiichiindi chakwe pe chakuya kumweezi naakuti wazwa ganzi kwachiindi chilamfu kwiinda mazuba nalikumweezi, ulasofwaala mazuba woonse nalikuzwa ganzi mbuli mazuba aakusofwaala kwakwe nalikumweezi. 26 Kufumbwa aabulo mpaalala mazuba nalikuzwa ganzi bulaba mbuli bulo mpaalala nalikumweezi alubo kufumbwa chintu nchaakkala chilasofwaala mbuli kusofwaala kwakwe chiindi nalikumweezi. 27 Kufumbwa muntu uuguma zintu eezyo ulasofwaala alubo weelede kuwacha zigogo zyakwe, asambe aamaanzi alubo ulasofwaala kusika goko.

28 “‘Nikuba oobo, kuti ganzi lyakwe lyaleka kuzwa, weelede kubala mazuba aali musanu aabili, kuzwa waawo ulasalala. 29 Mubuzuba bwamusanu aatatu, weelede kubweza nziba zibili naakuti bana bankwilimba babili mpawo weelede kuzyeeta kumupayizi kumanjililo aatente lyakuswaanganina. 30 Mupayizi ulabweza imwi kuti ibe chipayizyo chachibi mpawo imwi ibe chipo chitentwa mpawo mupayizi ulamaninsya milandu yamwanakazi ooyo kunembo lyaJehova akaambo kakusofwaala kwakwe kwakuzwa ganzi.

31 “‘Nkinkaako, mweelede kugwasya ma-Israyeli kuti bakkale kabasalala kuchitila kuti batafwi akaambo kakutasalala kwabo kwiinda mukusofwaazya tente lyangu lyakukombela lili aakati kabo.

32 “‘Ooyu nguumulawu uuli atala aamwaalumi uuli aabulwazi bwakuzwa zintu zili mbuli busina amwaalumi uusofwaala akaambo kakusuba bwaalumi, 33 mwanakazi uusofweede akaambo kakuba kumweezi, kufumbwa mwaalumi naakuti mwanakazi uuzwa zintu mumubili amwaalumi woona aamwanakazi uusofweede.’”