Levitikko

18 Jehova wakayinkilila kunembo kwaambuula aaMozesi kati: 2 “Ambuula ama-Israyeli ubabuzye kuti, ‘Ndime Jehova Leza wanu. 3 Mutachiti mbuli mbubachita bantu bamunyika ya-Ijipita oomo mumwakakkede alubo mutachiti zintu nzibachita bantu bamunyika yaKkenani oomo mundili kumutola alubo mutatobeli milawu yabo. 4 Mweelede kubamba nzila zyangu zyakubeteka akubamba milawu yangu alubo mweende mulinjiyo. Ndime Jehova Leza wanu. 5 Mweelede kubamba milawu yangu anzila zyangu zyakubeteka. Kufumbwa muntu uuchita oobo, uzoopona akaambo kanjiyo. Ndime Jehova.

6 “‘Taakwe muntu aakati kanu weelede kuswena aafwiifwi abbululu wakwe waafwiifwi kuti awonaawe.* Ndime Jehova. 7 Toyelede koona aawuso pe alubo toyelede koona aabanyoko pe. Mbaanyoko nkinkaako, toyelede koona aabo pe.

8 “‘Toyelede koona aamwanakazi wawuso pe. Nkaambo nkuvumbula masampu aawuso.*

9 “‘Toyelede koona aamuchizi wako pe kazitakwe ndaba kuti mwana wawuso na naakuti mwana wabanyoko alubo kazitakwe ndaba pe kuti muzyalwa mung’anda iimwi na, naakuti pe.

10 “‘Toyelede koona aamuzukulu wako musimbi kazitakwe ndaba kuti mwana wamwanaako mulombe na naakuti mwana wamwanaako musimbi nkaambo nchinkuna chako.

11 “‘Toyelede koona aamwana musimbi wamwanakazi wawuso, mwana wawuso, nkaambo muchizi wako.

12 “‘Toyelede koona aamuchizi wawuso pe nkaambo uzyalwaamwi awuso.

13 “‘Toyelede koona aamukulana naakuti mwanike wabanyoko wachanakazi nkaambo uzyalwaamwi abanyoko.

14 “‘Toyelede kuvumbula masampu aamukulana naakuti aamwanike* wawuso pe kwiinda mukoona aamwanakazi wakwe nkaambo mbaanyoko.

15 “‘Toyelede koona aamukamwanaako pe. Mwanakazi wamwanaako nkinkaako, toyelede koonaawe pe.

16 “‘Toyelede koona aamwanakazi wamukulanaako naakuti wamwanikaako pe, nkaambo nkuvumbula masampu aamukulanaako naakuti aamwanikaako.*

17 “‘Toyelede koona aamwanakazi aamwi amwanaakwe musimbi. Toyelede kubweza muzukulu wakwe, kazitakwe ndaba kuti ngwamwanaakwe mulombe naakuti ngwamwanaakwe musimbi kuti woonaawe. Nduzubo lwakwe. Kuchita oobo kulatondwa.*

18 “‘Toyelede kukwata mukulana wamwanakazi wako naakuti mwanikaakwe kuti abe mukwatwanyina akoonaawe mwanakazi wako kachipona.

19 “‘Utasweni aafwiifwi amwanakazi kuti woonaawe muchiindi chakusofwaala kwakwe nali kumweezi.

20 “‘Toyelede koona aamwanakazi wamweenzinyokwe* kuti ulisofwaazye.

21 “‘Toyelede kuzumizya kufumbwa mwanaako kuti apayizigwe* kuli Molekki. Toyelede kusofwaazya zina lyaLeza wako munzila iili boobu pe. Ndime Jehova.

22 “‘Toyelede koona aamwaaluminyokwe mbuli mbuwona aamwanakazi. Kuchita oobo nchisesemyo.

23 “‘Mwaalumi tayelede koona aamunyama kuti alisofwaazye aanguwe pe, naba mwanakazi tayelede kwiinka kumunyama kuti awonaawe. Kuchita oobo kulatondwa.

24 “‘Mutalisofwaazyi aazintu zyoonse eezi nkaambo zisi nzindili kutanda kunembo lyanu, zyakalisofwaazya kwiinda mukuchita zintu zyoonse eezi. 25 Nkinkaako, nyika ilisofweede alubo ndizooyipa mulandu akaambo kachibi chayo alubo bantu bakkede mumo bazootandwa mulinjiyo. 26 Pesi inywe mweelede kubamba milawu yangu anzila zyangu zyakubeteka alubo tamweelede kuchita zintu zyoonse eezi zisesemya, kazitakwe ndaba kuti ndinywe naakuti mweenzu uukkede aakati kanu. 27 Nkaambo zintu zyoonse eezi zisesemya zyakali kuchitwa aabantu bakamusaangunina kukkala munyika eeyi, nkinkaako, lino nyika ilisofweede. 28 Tamuzootandwi pe munyika eeyi akaambo kakwiisofwaazya mbuli mbuzitazootandwe zisi zyakamusaangunina. 29 Kuti umwi wanu wachita chimwi chazintu zyoonse eezi zisesemya, boonse bachita zintu eezyo, beelede kujayigwa aakati kabantu bakulimbabo. 30 Mweelede kubamba milawu yangu kwiinda mukutachita chimwi chaziyanza eezi zisesemya zyakali kuchitwa kunembo lyanu kuchitila kuti mutalisofwaazyi aazintu eezyo. Ndime Jehova Leza wanu.’”