Levitikko

19 Jehova wakayinkilila kunembo kwaambuula aaMozesi kati: 2 “Ambuula aambungano yoonse yama-Israyeli ubabuzye kuti, ‘Mweelede kusalala, nkaambo ime ndiJehova Leza wanu ndilasalala.

3 “‘Umwi awumwi wanu weelede kulemeka* banyina awisi alubo mweelede kubamba masabata aangu. Ndime Jehova Leza wanu. 4 Mutatobeli baleza babuyo naakuti kulifulila baleza bansimbi. Ndime Jehova Leza wanu.

5 “‘Kuti mwapa chipayizyo chalumvwanano kuli Jehova, mweelede kuchipayizya munzila iipa kuti amuyande. 6 Cheelede kuligwa mubuzuba mbumwachipayizya amubuzuba butobela, pesi chasyaala kusika mubuzuba bwachitatu, cheelede kutentwa mumulilo. 7 Kuti chaligwa mubuzuba bwachitatu, nchintu chitondwa. Tachikootambulwa pe. 8 Muntu uuchilya uzoolisandwida akaambo kamulandu wakwe nkaambo wasofwaazya chintu chisalala chaJehova alubo muntu ooyo weelede kujayigwa aakati kabantu bakulimbabo.

9 “‘Chiindi nimutebula mumyuunda yanu, tamweelede kumaninizya pe zyoonse zili mumbali aamyuunda yanu alubo tamweelede kuvululwida butebuzi bwanu. 10 Tamweelede kuchela masaansa aasyaala mumyuunda yanu yamisaansa alubo tamweelede kubwezelela aalokela aansi. Mweelede kwaasiila bafwaba abamuzwakule. Ndime Jehova Leza wanu.

11 “‘Mutabbi, mutachiti chalweeno alubo mutachiti chakutasyomeka kuli umwi awumwi. 12 Mutakonki chakubeja muzina lyangu akusofwaazya zina lyaLeza wanu. Ndime Jehova. 13 Utawunini mweenzinyokwe pe naakuti kumubbida. Utabambi mbadalo yamuntu wakubelekela busiku boonse kusika kuseeni.

14 “‘Utatuki musinkematwi naakuti kubikka chilebyo kunembo lyamoofu, weelede kuyoowa Leza wako. Ndime Jehova.

15 “‘Mutabeteki munzila iitaluleme pe. Utasaluuli muntu uufwaba pe mpawo uyande muntu uunotede. Weelede kubeteka mweenzinyokwe munzila iiluleme.

16 “‘Uteendi kuyabwaamba makani aakubejelezya aakati kabantu bakulindinywe. Utachiti zintu zinjizya buumi bwawumwi* mumapenzi.* Ndime Jehova.

17 “‘Utazondi mweenzinyokwe mumoyo wako. Weelede kululamika mweenzinyokwe, kuchitila kuti utaswaanizigwi aamwi anguwe muchibi eecho.

18 “‘Utakkwichizyi bana babantu bakulindinywe nikuba kubaangila nkoto alubo weelede kuyanda mweenzinyokwe mbuli mbuliyanda. Ndime Jehova.

19 “‘Mweelede kubamba milawu yangu: Utachiti kuti misyobo iibili yazivuubwa izyalane. Utabyali mbuto zibili zisiyene mumyuunda yako alubo utazwaati chigogo chipangidwe aamilembo iibili iisiyene.

20 “‘Kuti mwaalumi woona aamwanakazi mpawo mwanakazi ooyu kali muzike wakasyomezegwa kukwatwa awumwi mwaalumi, pesi katananununwa pe naakuti kwaangununwa, beelede kupegwa chisubulo. Nikuba oobo, tabeelede kujayigwa pe nkaambo mwanakazi ooyu tanaangununwa pe. 21 Weelede kweeta chipo chakwe chamilandu kuli Jehova kumanjililo aatente lyakuswaanganina, mugutu wachipo chamilandu. 22 Mupayizi weelede kumaninsya milandu yamuntu ooyo kunembo lyaJehova kabelesya mugutu wachipo chamilandu akaambo kachibi nchaakachita mpawo ulalekelelwa kuchibi nchaakachita.

23 “‘Nimwazoonjila munyika eeyo alubo nimwazoobyala minsamu yamichelo iiligwa, michelo eeyo mweelede kuzooyibona kuti tayisalali pe akuti ilakasigwa. Kwaminyaka iitatu, michelo eeyo inookasigwa kulindinywe. Tamweelede kwiilya pe. 24 Pesi mumunyaka wachine, michelo yayo yoonse inooli yasalala alubo chinooli chiindi chakusekelela kunembo lyaJehova. 25 Mpawo mumunyaka wamusanu, mulakonzya kulya michelo yayo kuchitila kuti butebuzi bwanu buyungizigwe. Ndime Jehova Leza wanu.

26 “‘Tamweelede kulya kufumbwa chintu chili aaganzi.

“‘Tamweelede kusonda naakuti kuchita masalamusi.

27 “‘Tamweelede kugela masusu aanu aali mumbali aamitwe yanu naakuti kugela malezu mwaali mumbali.

28 “‘Tamweelede kulinenguula aamibili yanu pe akaambo kamuntu wafwa.* Alubo tamweelede kulilemba aamibili yanu. Ndime Jehova.

29 “‘Utachiti kuti mwanaako musimbi abule bulemu kwiinda mukupa kuti abe wuule kuchitila kuti nyika itachiti chiwuule akuti itazuli kutalijata.

30 “‘Mweelede kubamba masabata aangu akutondeezya kuti mulayilemeka ndawu yangu iisalala. Ndime Jehova.

31 “‘Mutayinki kubasondi pe alubo mutabuzyi makani kubantu baamba zitazoochitike kunembo, kuchitila kuti mutasofwaali akaambo kambabo. Ndime Jehova Leza wanu.

32 “‘Weelede kunyampuka kunembo lyamuntu ulaamvwi, weelede kulemeka muntu mupati alubo weelede kuyoowa Leza wako. Ndime Jehova.

33 “‘Kuti muntu uuzwa kuliimwi nyika wakkala aandinywe munyika yanu, mutamupenzyi pe. 34 Muntu wakuliimwi nyika uukkala aakati kanu, mweelede kumujata mbuli umwi wanu alubo mweelede kumuyanda mbuli mbumuliyanda nkaambo andinywe mwakali beenzu munyika ya-Ijipita. Ndime Jehova Leza wanu.

35 “‘Mutabelesyi zipimyo zyakutasyomeka nimupima bulamfu, bulemu akuvula kwazintu. 36 Mweelede kubelesya zikkelo ziluleme, zipimyo ziluleme zyakupimya zintu zilema, zipimyo ziluleme zyakupimya zintu ziyumu* azipimyo ziluleme zyakupimya zintu zyalwaanzaanzi.* Ndime Jehova Leza wanu wakamugwisya munyika ya-Ijipita. 37 Nkinkaako, mweelede kubamba milawu yangu yoonse anzila zyangu zyakubeteka zyoonse alubo mweelede kuzitobela. Ndime Jehova.’”