Levitikko
24 Jehova wakayinkilila kunembo kwaambuula aaMozesi kati: 2 “Layilila ma-Israyeli kuti beete kulinduwe mafuta aama-olifa mabotu aakumunikisya, kuchitila kuti malambe akkale kaayaka chiindi choonse. 3 Aroni weelede kuchita mabambe aakuti malambe akkale kaayaka chiindi choonse kuzwa goko kusika kuseeni kunembo lyaJehova, aanze aakketeni lyaBbokesi lyaBukamboni mutente lyakuswaanganina. Ooyu mulawu ngwaayelede kutobela mazyalani aako woonse kukabe kutamani. 4 Weelede kwaabikka kabotu-kabotu malambe aachibikkilo chamalambe changolida iisalalisya kunembo lyaJehova chiindi choonse.
5 “Weelede kubweza fulawa nante, ujike zinkwa zyalawundi zili 12 zili aampako aakati. Weelede kubelesya zipanzi zibili zyazipanzi zili kkumi zya-efa* kuchinkwa chimwi achimwi. 6 Mweelede kubikka zinkwa eezi kazili muzipanzi zibili aajulu aatebbulu yangolida iisalalisya kunembo lyaJehova. Chipanzi chimwi achimwi cheelede kuba aazinkwa zili musanu achimwi zyiilikene. 7 Weelede kubikka tununkilizyo tutuba achipanzi chimwi chachinkwa. Tununkilizyo ootu twiiminina chinkwa chipegwa kachili chipo* chitentwa aamulilo kuli Jehova. 8 Mubuzuba bumwi abumwi bwaSabata, unoozibamba kabotu-kabotu kunembo lyaJehova. Eechi nchizuminano changu chitamani ama-Israyeli. 9 Zilaba zya-Aroni abana bakwe alubo bazoozilida mundawu iisalala nkaambo nchintu chisalalisya kulinguwe, chizwa kuzipo zyaJehova zitentwa aamulilo. Ooyu mulawu walyoonse alyoonse.”
10 Aakati kama-Israyeli kwakali mulombe wakali mwana wamwanakazi wachi-Israyeli, wisi wakali mu-Ijipita mpawo wakasaanguna kulwana aamwaalumi mu-Israyeli mukkeempu. 11 Mwana wamwanakazi wachi-Israyeli wakasaanguna kusampula Zina* akulituka* nkinkaako, bakamweeta kuli Mozesi. Banyina bakali kutegwa Dibbri mwana waDibburayi wamusyobo waDani. 12 Bakamujalila kusikila nibakamvwa nzyaakasala Jehova.
13 Mpawo Jehova wakati kuli Mozesi: 14 “Mugwisye aanze aakkeempu ooyo watuka. Mpawo boonse bamumvwa ababikke maboko aabo aamutwe wakwe kuzwa waawo, mbungano yoonse yeelede kumutulula mabwe. 15 Alubo weelede kubuzya ma-Israyeli kuti: ‘Kufumbwa muntu uutuka Leza wakwe uzoolisandwida akaambo kamulandu wakwe. 16 Sikusampula zina lyaJehova weelede kujayigwa nikuba kuti kube biyeni. Mbungano yoonse yeelede kumutulula mabwe. Muntu wakuliimwi nyika weelede kujayigwa munzila iikozyenie anjajayigwaayo mu-Israyeli akaambo kakusampula Zina.
17 “‘Kuti muntu wajaya mweenzinyina,* anguwe weelede kujayigwa. 18 Kufumbwa muntu wuuma akujaya munyama uuvubidwe, weelede kumubbadala, buumi kubuumi. 19 Kuti muntu wachisa mweenzinyina, nzyaamuchita zyeelede kuchitwa akulinguwe. 20 Kufuyuka akufuyuka, liso aliso, linyo alinyo. Mbaakamuchisa umwi anguwe mbayelede kuchisigwa. 21 Muntu wawuma munyama mpawo wamujaya, weelede kubbadala munyama ooyo, pesi muntu wawuma muntu mpawo wamujaya weelede kujayigwa.
22 “‘Mweelede kubelesya mulawu uumwi nimubeteka, kufumbwa kuti muli kubeteka mweenzu na naakuti mu-Israyeli, nkaambo ndime Jehova Leza wanu.’”
23 Mpawo Mozesi wakaambuula aama-Israyeli alubo bakeeta ooyo wakatuka aanze aakkeempu mpawo bakamutulula mabwe. Nkinkaako, ma-Israyeli bakachita mbuli Mozesi mbaakali walayililwa aaJehova.