Myeelwe
2 Jehova wakaambuula aaMozesi a-Aroni kati: 2 “Ma-Israyeli beelede kuyaka matente aabo kweendelana ankuzibikkidwe nkamu zyamisyobo yabo iitatu, umwi awumwi aafwiifwi achitondeezyo chang’anda yamawisi. Beelede kuyaka matente aabo kaalangide tente lyakuswaanganina kabalizyungulukide.
3 “Batanookkale kubuzwezuba, ninkamu yamisyobo iitatu iizulwidwa aaJuda, kweendelana ankamu zyabo. Silutwe wabana baJuda nguNashoni mwana wa-Aminadabbu. 4 Aabo bakalembwa kunkamu yakwe yamasooja bakali 74 600. 5 Batazooyake matente aafwiifwi anguwe mbamusyobo wa-Isakkara. Silutwe wabana ba-Isakkara nguNetaneli mwana waZuwari. 6 Aabo bakalembwa kunkamu yakwe yamasooja bakali 54 400. 7 Batobela musyobo waZebbuloni. Silutwe wabana baZebbuloni ngu-Eliyabbu mwana waHeloni. 8 Aabo bakalembwa kunkamu yakwe yamasooja bakali 57 400.
9 “Boonse bakalembwa kuba masooja kunkamu yaJuda bakali 186 400. Mbabo beelede kusaanguna kweenda.
10 “Nkamu yamisyobo iitatu iizulwidwa aaRubbeni kweendelana ankamu zyabo, yeelede kuba kubbazu lyakumusanza. Silutwe wabana baRubbeni ngu-Elizure mwana waShedawuri. 11 Aabo bakalembwa kunkamu yakwe yamasooja bakali 46 500. 12 Batazooyake matente aafwiifwi anguwe mbamusyobo waSimiyoni. Silutwe wabana baSimiyoni nguShelumiyeli mwana waZurishadayi. 13 Aabo bakalembwa kunkamu yakwe yamasooja bakali 59 300. 14 Batobela mbamusyobo waGadi. Silutwe wabana baGadi ngu-Eliyasafu mwana waRuwelu. 15 Aabo bakalembwa kunkamu yakwe yamasooja bakali 45 650.
16 “Boonse bakalembwa kuba masooja kunkamu yaRubbeni bakali 151 450 alubo mbabo beelede kuba bachibili kweenda.
17 “Chiindi tente lyakuswaanganina nililonzegwa, nkamu yamusyobo waLevi yeelede kuba aakati kazimwi nkamu.
“Beelede kweenda kweendelana ambubakkala mukkeempu, umwi awumwi mundawu yakwe kweendelana ankamu zyamisyobo iitatu.
18 “Nkamu zyamisyobo iitatu iizulwidwa aa-Efremu kweendelana ankamu zyabo inooli kububbila. Silutwe wabana ba-Efremu ngu-Elishama mwana wa-Amihudi. 19 Aabo bakalembwa kunkamu yakwe yamasooja bakali 40 500. 20 Batobela mbamusyobo waManase. Silutwe wabana baManase nguGamaliyeli mwana waPedazuri. 21 Aabo bakalembwa kunkamu yakwe yamasooja bakali 32 200. 22 Batobela mbamusyobo waBbenjamini. Silutwe wabana baBbenjamini ngu-Abbidani mwana waGidiyoni. 23 Aabo bakalembwa kunkamu yakwe yamasooja bakali 35 400.
24 “Boonse bakalembwa kuba masooja kunkamu ya-Efremu bakali 108 100 alubo mbabo beelede kuba bachitatu kweenda.
25 “Nkamu yamisyobo iitatu iizulwidwa aaDani kweendelana ankamu zyabo inooli kubbazu lyakunyika. Silutwe wabana baDani ngu-Ahiyezeri mwana wa-Amishadayi. 26 Aabo bakalembwa kunkamu yakwe yamasooja bakali 62 700. 27 Batazooyake matente aafwiifwi anguwe mbamusyobo wa-Asha. Silutwe wabana ba-Asha nguPagiyeli mwana wa-Okkirani. 28 Aabo bakalembwa kunkamu yakwe yamasooja bakali 41 500. 29 Batobela mbamusyobo waNafutali. Silutwe wabana baNafutali ngu-Ahira mwana wa-Enani. 30 Aabo bakalembwa kunkamu yakwe yamasooja bakali 53 400.
31 “Boonse bakalembwa kuba masooja kunkamu yaDani bakali 157 600. Beelede kuba bamamanino kweenda, kweendelana ankamu yabo yamisyobo iitatu.”
32 Aaba mbiima-Israyeli bakalembwa kweendelana amaanda aamawisi, boonse bakalembwa kuba masooja kunkamu zyabo bakali 603 550. 33 Pesi maLevi teebakalembwaamwi pe abamwi ma-Israyeli, mbuli Jehova mbaakalayilila Mozesi. 34 Ma-Israyeli bakachita zyoonse Jehova nzyaakalayilila Mozesi. Oobu mbubakayaka matente aabo kweendelana ankamu zyabo zyamisyobo iitatu alubo mbubakali kweenda, umwi awumwi kweendelana ampuli yakwe alubo kweendelana ang’anda yamawisi.