Myeelwe
24 Bbalamu naakabona kuti kwakali kumubotezya Jehova kulongezya* ma-Israyeli, taakwe naakabweeda lubo kuti akayanduule makani aakuti bachitikilwe zibi, pesi wakalanzya busyu bwakwe kunkanda. 2 Chiindi Bbalamu naakatambya meso aakwe akubona ma-Israyeli kakkede kweendelana amisyobo yabo, muuya waLeza wakaza aalinguwe. 3 Wakaamba kaambyo kati:
“Majwi aaBbalamu mwana waBbeyori
Amakani aamwaalumi wakajulwa meso,
4 Majwi aayooyo uulikumvwa jwi lyaLeza,
Ooyo wakabona chilengaano chaSinguzuzyoonse,
Ooyo wavuntama aansi meso aakwe katajalidwe:
5 Mabotu kaka matente aako O Jakkobo,
Matente aako aakukombela O Israyeli!
6 Basika kule mbuli makuti,*
Mbuli myuunda iili kumbali aamulonga,
Mbuli kanembe nkaakazikkila Jehova,
Mbuli minsamu yakkeddari iili kumbali aamaanzi.
7 Maanzi alikwiinkilila kunembo kusawuka kuzwa muzibikkilo zyakwe zibili zyazikumba
Ambuto yakwe ibyalidwe* kumbali aamaanzi miingi.
Mwaami wakwe uzooba mupati kwiinda Agagi
Alubo bwaami bwakwe buzoosumpulwa.
8 Leza ulikumugwisya kuzwa ku-Ijipita,
Uli mbuli meja aapule wang’ombe wamusokwe kulimbabo.
Uzoonyonyoona zisi, basikumudyaaminina,
Azifuwa zyabo uzoozipwaya alubo uzoobanyonyoona aatwaanta twakwe.
9 Ubwatilide aansi, ulede aansi mbuli mulavu
Alubo mbuli mulavu, ngwani uunga ulamubusya?
Aabo bakulongezya balilongezedwe
Alubo aabo bakutuka balitukidwe.”
10 Mpawo Bbalakki wakamunyemena loko Bbalamu. Bbalakki wakakambilila maboko chakusampula alubo wakati kuli Bbalamu: “Ndakakwiita kuti utuke basinkondoma, pesi iwe wabalongezya kwaziindi eezi zitatu. 11 Lino fwambaana uye kung’anda. Ndalikuyanda kukulemeka kapati, pesi bona, Jehova wakukachizya kujana bulemu.”
12 Bbalamu wakasandula Bbalakki kati: “Teendakababuzya na batumwa mbwaakatuma kuti, 13 ‘Nikuba kuti Bbalakki wandipa ng’anda yakwe kayizwide nsiliva angolida, tandikoochita zintu nzindiyanda* ziteendelani aamalayilile aaJehova, kazitakwe ndaba kuti nzibotu naakuti nzibi. Ndiyoowamba zintu Jehova nzyatandibuzye kupela’? 14 Lino ndaabuya kubantu bakulindiswe. Kuza ndikubuzye kuti bantu aaba bazoobachitaanzi bantu bakulindinywe muchiindi chili kunembo.”* 15 Nkinkaako, wakaamba kaambyo aaka:
“Majwi aaBbalamu mwana waBbeyori,
Amajwi aamwaalumi wakajulwa meso,
16 Majwi aayooyo uulikumvwa jwi lyaLeza,
Ooyo ulaaluzibo lwaSijulu Lyamajulu,
Ooyo wakabona chilengaano chaSinguzuzyoonse
Kavunteme aansi, pesi meso aakwe katajalidwe pe:
17 Ndizoomubona, pesi kutali lino,
Ndizoomubona, pesi kutali lino-lino.
Nyenyeezi izoozwa muli Jakkobo,
Alubo nkoli yabwaami izoonyampuka kuzwa kuli Israyeli.
Alubo kwaamba choonzyo, uzookwamuna nkumu yaMowabbu*
Azipoompo zyabana balupyopyongano.
18 Edomu uzooba lukono,
Kwaamba choonzyo, Seyiri uzooba lukono lwabasinkondonyina,
Chiindi Israyeli natondeezya chibindi chakwe.
19 Umwi uuzwa kuli Jakkobo uzoozunda,
Uzoonyonyoona boonse batakafutuke kuzwa mumuunzi.”
20 Naakabona Amalekki, wakayinkilila kunembo akaambyo kakwe kati:
“Amalekki wakali wakusaanguna aakati kazisi,
Pesi kumamanino uzoonyonyooka.”
21 Naakabona maKkeni, wakayinkilila kunembo akaambyo kakwe kati:
“Ndawu yako yakukkala ilikwabilidwe alubo ndawu yako yakukkala ilaajulu aabbwe.
22 Pesi umwi muntu uzootenta Kkayini.
Zilatola chiindi chilamfu biyeni Asiriya katanamutola kubuzike?”
23 Alubo wakayinkilila kunembo akaambyo kakwe kati:
“Baamayo! Ngwani uutazoofutuke chiindi Leza aakuchita zintu eezi?”
24 Maato azoosika kuzwa kunkomwe yaKKitimu,
Azoopenzya Asiriya,
Akupenzya Ebberi.
Pesi anguwe uzoonyonyooka chakumaninina.”
25 Mpawo Bbalamu wakanyampuka weenda waya kumuunzi wakwe, anguwe Bbalakki wakatozya kwakwe.