Myeelwe
25 Israyeli naakali kukkala kuShitimu, bantu bakasaanguna kuchita bwaamu abana basimbi bakuMowabbu. 2 Banakazi bakali kutamba bantu kuzipayizyo zyabaleza babo alubo bantu bakasaanguna kulya akukotamina baleza babo. 3 Nkinkaako, ma-Israyeli bakaliswaanizya mukukomba Bbaala wakuPeyori alubo Jehova wakabanyemena loko ma-Israyeli. 4 Jehova wakati kuli Mozesi: “Bweza bazulwidi* boonse babantu, ubaanzike kunembo lyaJehova zuba kalibala* kuchitila kuti bukali bwaJehova bumane kuma-Israyeli. 5 Mpawo Mozesi wakabuzya babetesi bama-Israyeli kuti: “Umwi awumwi weelede kujaya baalumi aaba baliswaanizya mukukomba Bbaala wakuPeyori.”
6 Aachiindi nchicheecho, umwi mu-Israyeli wakeeta mwanakazi wakuMidiyani kubabbululu bakwe kunembo lyaMozesi ambungano yoonse yama-Israyeli, chiindi nibakali kulila kumanjililo aatente lyakuswaanganina. 7 Chiindi Finiyasi mwana wa-Eliyezari, mwana wa-Aroni mupayizi naakamubona, chakufwambaana wakanyampuka kuzwa aakati kambungano wabweza sumu. 8 Mpawo wakatobela mwaalumi ooyu mu-Israyeli kutente lyakwe alubo wakabayasa boonse kabali babili, mwaalumi mu-Israyeli amwanakazi ooyo ngwaakayasa kubwanakazi. Aachiindi nchicheecho, penzi lyakali lyasikila ma-Israyeli lyakayimikila. 9 Aabo boonse bakafwa akaambo kapenzi eeli bakali 24 000.
10 Mpawo Jehova wakati kuli Mozesi: 11 “Finiyasi mwana wa-Eliyezari, mwana wa-Aroni mupayizi, walesya bukali bwangu kuti butasikili ma-Israyeli nkaambo takwe naalekela basikubukila aakati kabo. Nkinkaako, teendabanyonyoona pe ma-Israyeli nikuba kuti ndiyanda kuti kabakomba ndime andilikke. 12 Nkinkaako, mubuzye kuti, ‘Ndilikukupa chizuminano changu chaluumuno. 13 Alubo chizoobeleka kachili chizuminano chitamani chabupayizi kulinduwe akubana bako bachiza, nkaambo teewazumizya basikubukila Leza alubo wapa kuti mulandu wama-Israyeli umane.’”
14 Kwakajanika kuti zina lyamwaalumi mu-Israyeli wakajayigwa aamwi amwanakazi wakuMidiyani wakali Zimuri mwana waSalu, silutwe wang’anda yamawisi aamusyobo waSimiyoni. 15 Zina lyamwanakazi muMidiyani wakajayigwa wakali Kkozibbi, mwana musimbi waZuri, ooyo wakali kuzulwida umwi musyobo wang’anda yamawisi kuMidiyani.
16 Mukuya kwachiindi, Jehova wakati kuli Mozesi: 17 “Bapenzye maMidiyani, ubajaye. 18 Nkaambo balikumupenzya kwiinda mukumweena chabuchenjezu atala ankani yaPeyori aKkozibbi mwana musimbi wasilutwe wamaMidiyani, muchizi wabo, ooyo wakajayigwa mubuzuba bwapenzi lyakabawo akaambo kaPeyori.