Myeelwe
3 Aaya ngiimazyalani aa-Aroni aMozesi mubuzuba Jehova naakaambuula aaMozesi muChilundu chaSinayi. 2 Aaya ngiimazina aabana ba-Aroni. Wakusaanguna nguNadabbu, katobelwa aa-Abbihu, Eliyezari a-Itamara. 3 Aaya ngiimazina aabana ba-Aroni bapayizi bakananikidwe, bakabikkidwe kuti babeleke kabali bapayizi. 4 Nikuba oobo, Nadabbu a-Abbihu bakafwa kunembo lyaJehova chiindi nibakeeta mulilo uutazumizigwi kunembo lyaJehova munkanda yaSinayi alubo teebakalinaba aabana pe. Pesi Eliyezari a-Itamara bakayinkilila kunembo kubeleka kabali bapayizi aamwi a-Aroni wisi.
5 Jehova wakati kuli Mozesi: 6 “Yeta bamusyobo waLevi kunembo, ubayimikizye kunembo lya-Aroni mupayizi alubo banoomugwasya. 7 Beelede kuzuzikizya mulimu ngubanoomuchitila angubeelede kuchitila mbungano yoonse kunembo lyatente lyakuswaanganina kwiinda mukuchita milimu yabo yaatente lyakukombela. 8 Beelede kulangania zibelesyo zyoonse zyaatente lyakuswaanganina akuchitila ma-Israyeli milimu yoonse kwiinda mukuchita milimu yaatente lyakukombela. 9 MaLevi, weelede kwaapa Aroni abana bakwe. Mbantu mbapegwa kuzwa kuma-Israyeli. 10 Weelede kusala Aroni abana bakwe alubo beelede kuchita milimu yabo yabupayizi, kufumbwa muntu uutazumizigwi* uuswena aafwiifwi weelede kujayigwa.”
11 Jehova wakayinkilila kunembo kwaambuula aaMozesi kati: 12 “Ime lwangu ndabweza maLevi aakati kama-Israyeli mundawu yabana boonse bakusaanguna kuzyalwa bama-Israyeli alubo maLevi balaba bangu. 13 Nkaambo bana boonse bakusaanguna kuzyalwa mbibangu. Mubuzuba nindakajaya bana boonse bakusaanguna kuzyalwa munyika ya-Ijipita, ndakalisalazizya* bana boonse bakusaanguna kuzyalwa mu-Israyeli, babantu ababanyama. Beelede kuba bangu. Ndime Jehova.”
14 Jehova wakayinkilila kunembo kwaambuula aaMozesi munkanda yaSinayi kati: 15 “Lemba bana baLevi kweendelana amaanda aamawisi alubo kweendelana ampuli zyabo. Weelede kulemba baalumi boonse bali aamweezi uumwi kaziya kunembo.” 16 Nkinkaako, Mozesi wakabalemba mbuli mbaakabuzigwa aaJehova kweendelana ambaakalayililwa. 17 Aaya ngiimazina aabana baLevi: Geshoni, Kkohati aMerari.
18 Aaya ngiimazina aabana baGeshoni kweendelana ampuli zyabo: Libbini aShimeyi.
19 Bana baKkohati kweendelana ampuli zyabo bakali Amuramu, Izare, Hebburoni a-Uziyele.
20 Bana baMerari kweendelana ampuli zyabo bakali Mali aMushi.
Eezi nzizyo zyakali mpuli zyamaLevi kweendelana amaanda aamawisi.
21 Kuli Geshoni, nkuko kwakazwa mpuli zyamaLibbini ampuli zyamaShimeyi. Eezi nzizyo zyakali mpuli zyamaGeshoni. 22 Baalumi boonse bakali aamweezi uumwi kaziya kunembo bakalembwa bakali 7 500. 23 Mpuli zyamaGeshoni zyakayakilide matente aazyo kusule aatente lyakukombela kubbazu lyakububbila. 24 Silutwe wang’anda yamawisi aamaGeshoni wakali Eliyasafu mwana waLayeli. 25 Mulimu wabana baGeshoni mutente lyakuswaanganina wakali wakulangania tente lyakukombela atente, chivumbyo chalyo, kketeni lyakumanjililo aatente lyakuswaanganina, 26 makketeni aalengelela aalubuwa, kketeni lyakumanjililo aalubuwa luzyunguluka tente lyakukombela achipayililo, ntambo zyatente amilimu yoonse ilaachakuchita azintu eezi.
27 Kuli Kkohati kwakazwa mpuli zyama-Amuramu, mpuli zyama-Izare, mpuli zyamaHebburoni ampuli zyama-Uziyele. Eezi niimpuli zyamaKkohati. 28 Baalumi boonse bakali aamweezi uumwi kaziya kunembo bakali 8 600. Bakali aamulimu wakulangania ndawu iisalala. 29 Mpuli zyabana baKkohati zyakakkede kubbazu lyakumusanza kwatente lyakukombela. 30 Silutwe wang’anda yamawisi wampuli zyamaKkohati wakali Elizafani mwana wa-Uziyele. 31 Mulimu wabo wakali wakulangania Bbokesi, tebbulu, chibikkilo chamalambe, zipayililo, zibelesyo zibelesegwa mundawu iisalala, kketeni amilimu yoonse ilaachakuchita azintu eezi.
32 Silutwe mupati wamaLevi wakali Eliyezari mwana wa-Aroni mupayizi, ooyo wakali kuzulwida aabo bakali kubeleka milimu yamundawu iisalala.
33 Kuli Merari nkuko kwakazwa mpuli zyamaMali ampuli zyamaMushi. Eezi nzizyo zyakali mpuli zyamaMerari. 34 Baalumi boonse bakali aamweezi uumwi kaziya kunembo bakalembwa bakali 6 200. 35 Silutwe wang’anda yamawisi wampuli zyamaMerari wakali Zuriyeli mwana wa-Abbihayili. Bakali kukkala kubbazu lyakunyika kwatente lyakukombela. 36 Mulimu wabana baMerari wakali wakulangania mafulemu aatente lyakukombela, mbalo zyalyo, mapila aalyo, zikkazikizyo zyalyo zyoonse amilimu yoonse ilaachakuchita azintu eezi, 37 kuswaanizya amapila woonse aazyungulukide lubuwa loonse, zikkazikizyo zyawo, nkanka zyawo zyatente antambo zyawo zyatente.
38 Aabo bakakkede kunembo lyatente lyakukombela kubuzwezuba, nkukwaamba kunembo lyatente lyakuswaanganina kubuzwezuba, bakali Mozesi a-Aroni abana bakwe. Mulimu wabo wakali wakulangania ndawu iisalala, kabayiminina ma-Israyeli. Kufumbwa muntu uutazumizigwi* uuswena aafwiifwi weelede kujayigwa.
39 MaLevi boonse bachaalumi bali aamweezi uumwi kaziya kunembo, Mozesi a-Aroni mbibakalemba kweendelana ampuli zyabo mbuli Jehova mbaakababuzya bakali 22 000.
40 Mpawo Jehova wakabuzya Mozesi kuti: “Lemba bana balombe boonse bakusaanguna kuzyalwa bama-Israyeli bali aamweezi uumwi kaziya kunembo, ubabale alubo ulembe aansi mazina aabo. 41 Weelede kundipa maLevi mundawu yabana boonse bakusaanguna kuzyalwa bama-Israyeli—Ndime Jehova—azivuubwa zyamaLevi mundawu yabana bakusaanguna kuzyalwa bazivuubwa zyama-Israyeli.” 42 Mozesi wakalemba bana boonse bakusaanguna kuzyalwa bama-Israyeli mbuli Jehova mbaakamulayilila. 43 Bana boonse bachaalumi bakusaanguna kuzyalwa bakalembwa kweendelana amazina, bakali aamweezi uumwi kaziya kunembo bakali 22 273.
44 Jehova wakayinkilila kunembo kwaambuula aaMozesi kati: 45 “Bweza maLevi mundawu yabana bakusaanguna kuzyalwa bama-Israyeli azivuubwa zyamaLevi mundawu yazivuubwa zyama-Israyeli alubo maLevi balaba bangu. Ndime Jehova. 46 Kumakani aali atala amuulo wakunununa bana bama-Israyeli bakusaanguna kuzyalwa bali 273 bayinda mweelwe wamaLevi, 47 weelede kubweza mashekeli* aali musanu kuti uubbadalile muntu umwi awumwi kweendelana ashekeli lyamundawu iisalala. Shekeli limwi lyeelene amagera aali 20. 48 Mali eeyo weelede kwiipa Aroni abana bakwe kayili chinunuzyo chabana bama-Israyeli bakusaanguna kuzyalwa bayinda mweelwe wamaLevi.” 49 Mozesi wakabweza mali yakunununa kuzwa kuli baabo bakayinda mweelwe wamaLevi mbibakanununa. 50 Wakabweza mali kuzwa kubana bakusaanguna kuzyalwa bama-Israyeli, mashekeli aali 1 365 kweendelana ashekeli lyamundawu iisalala. 51 Mpawo Mozesi wakapa Aroni abana bakwe mali eeyo yakunununa kweendelana ambaakaamba Jehova, mbuli Jehova mbaakalayilila Mozesi.