Myeelwe

29 “‘Mubuzuba bwakusaanguna bwamweezi wamusanu ayibili, mweelede kuchita muswaangano uusalala. Tamweelede kubeleka mulimu uumizya pe. Oobu mbuzuba mbumweelede kulizya mweembo. 2 Muzoopa chipo chitentwa chili aabweema bununkilila* kuli Jehova chapule wang’ombe uumwi uuchili muniini, mugutu uumwi atugutu tuli musanu atubili tuli aamunyaka uumwi, banyama boonse aaba kabali kabotu 3 achipo chabo chazilyo chafulawa nante iiswaanizidwe aamafuta, zipanzi zitatu zyazipanzi zili kkumi zya-efa kuli pule wang’ombe azipanzi zibili zyazipanzi zili kkumi kumugutu 4 achakkumi kukagutu kamwi akamwi katugutu tuli musanu atubili 5 akapule kampongo kachipayizyo chachibi chakumaninsya milandu yanu. 6 Eezi zizoopegwa kuyungizya kuchipo chitentwa mweezi amweezi, aamwi achipo chacho chazilyo achipo chitentwa chiindi choonse, aamwi achipo chacho chazilyo kuswaanizya azipo zyazyo zinywigwa kweendelana ambuzipegwa chiindi choonse kazili aabweema bununkilila,* chipo chitentwa aamulilo kuli Jehova.

7 “‘Mubuzuba bwakkumi bwamweezi wamusanu ayibili, mweelede kuchita muswaangano uusalala alubo mweelede kuusa mumyoyo* yanu. Taakwe mulimu ngumweelede kubeleka pe. 8 Muzooyeta chipo chitentwa kuli Jehova chili aabweema bununkilila* chapule wang’ombe uumwi uuchili muniini, mugutu uumwi atugutu tuli musanu atubili tuli aamunyaka uumwi, banyama boonse aaba kabali kabotu 9 achipo chabo chazilyo chafulawa nante iiswaanizidwe aamafuta, zipanzi zitatu zyazipanzi zili kkumi kuli pule wang’ombe, zipanzi zibili zyazipanzi zili kkumi kumugutu 10 achakkumi kukagutu kamwi akamwi katugutu tuli musanu atubili, 11 aamwi akana kampongo kachipayizyo chachibi, kuyungizya kuchipayizyo chachibi chakumaninsya milandu achipo chitentwa chipegwa chiindi choonse achipo chacho chazilyo azipo zyacho zinywigwa.

12 “‘Alubo mubuzuba bwachi 15 bwamweezi wamusanu ayibili, mweelede kuchita pobwe lisalala. Tamweelede kubeleka mulimu uumizya pe alubo mweelede kusekelela pobwe lyaJehova kwamazuba aali musanu aabili. 13 Alubo muzooyeta chipo chitentwa aamulilo chili aabweema bununkilila* kuli Jehova, chabapule bang’ombe bachili baniini bali 13, bagutu babili atugutu tuli aamunyaka uumwi tuli 14, banyama boonse aaba kabali kabotu. 14 Chipo chabo chazilyo chafulawa nante iiswaanizidwe aamafuta, cheelede kuba zipanzi zitatu zyazipanzi zili kkumi kuli pule wang’ombe umwi awumwi wabapule bali 13, zipanzi zibili zyazipanzi zili kkumi kumugutu umwi awumwi wabagutu babili 15 achakkumi kukagutu kamwi akamwi katugutu tuli 14, 16 kuswaanizya akana kampongo kachipayizyo chachibi, kuyungizya kuchipo chitentwa chipegwa chiindi choonse achipo chacho chazilyo achipo chacho chinywigwa.

17 “‘Mubuzuba bwachibili, mweelede kupa bapule bang’ombe bachili baniini bali 12, bagutu babili atugutu tuli aamunyaka uumwi tuli 14, banyama boonse aaba kabali kabotu 18 achipo chabo chazilyo azipo zyabo zinywigwa zyabapule bang’ombe abagutu atugutu kweendelana amweelwe wabo, kweendelana ambuzipegwa chiindi choonse, 19 kuswaanizya akana kampongo kachipayizyo chachibi, kuyungizya kuchipo chitentwa chipegwa chiindi choonse achipo chacho chazilyo azipo zyazyo zinywigwa.

20 “‘Alubo mubuzuba bwachitatu, mweelede kupa bapule bang’ombe bali 11, bagutu babili atugutu tuli aamunyaka uumwi tuli 14, banyama boonse aaba kabali kabotu 21 achipo chabo chazilyo azipo zyabo zinywigwa zyabapule bang’ombe abagutu atugutu kweendelana amweelwe wabo, kweendelana ambuzipegwa chiindi choonse, 22 kuswaanizya akana kampongo kachipayizyo chachibi, kuyungizya kuchipo chitentwa chipegwa chiindi choonse achipo chacho chazilyo achipo chazyo chinywigwa.

23 “‘Alubo mubuzuba bwachine, mweelede kupa bapule bang’ombe bali 10, bagutu babili atugutu tuli aamunyaka uumwi tuli 14, banyama boonse aaba kabali kabotu 24 achipo chabo chazilyo azipo zyabo zinywigwa zyabapule bang’ombe abagutu atugutu kweendelana amweelwe wabo, kweendelana ambuzipegwa chiindi choonse, 25 kuswaanizya akana kampongo kachipayizyo chachibi, kuyungizya kuchipo chitentwa chipegwa chiindi choonse achipo chacho chazilyo achipo chazyo chinywigwa.

26 “‘Alubo mubuzuba bwamusanu, mweelede kupa bapule bang’ombe bali 9, bagutu babili atugutu tuli aamunyaka uumwi tuli 14, banyama boonse aaba kabali kabotu 27 achipo chabo chazilyo azipo zyabo zinywigwa zyabapule bang’ombe abagutu atugutu kweendelana amweelwe wabo, kweendelana ambuzipegwa chiindi choonse, 28 kuswaanizya akana kampongo kachipayizyo chachibi, kuyungizya kuchipo chitentwa chipegwa chiindi choonse achipo chacho chazilyo achipo chazyo chinywigwa.

29 “‘Alubo mubuzuba bwamusanu abumwi, mweelede kupa bapule bang’ombe bali 8, bagutu babili atugutu tuli aamunyaka uumwi tuli 14, banyama boonse aaba kabali kabotu 30 achipo chabo chazilyo azipo zyabo zinywigwa zyabapule bang’ombe abagutu atugutu kweendelana amweelwe wabo, kweendelana ambuzipegwa chiindi choonse, 31 kuswaanizya akana kampongo kachipayizyo chachibi, kuyungizya kuchipo chitentwa chipegwa chiindi choonse achipo chacho chazilyo azipo zyazyo zinywigwa.

32 “‘Mubuzuba bwamusanu aabili, mweelede kupa bapule bang’ombe bali 7, bagutu babili atugutu tuli aamunyaka uumwi tuli 14, banyama boonse aaba kabali kabotu 33 achipo chabo chazilyo azipo zyabo zinywigwa zyabapule bang’ombe abagutu atugutu kweendelana amweelwe wabo, kweendelana ambuzipegwa chiindi choonse, 34 kuswaanizya akana kampongo kachipayizyo chachibi, kuyungizya kuchipo chitentwa chipegwa chiindi choonse achipo chacho chazilyo achipo chazyo chinywigwa.

35 “‘Mubuzuba bwamusanu aatatu, mweelede kuchita muswaangano uuyandikana. Tamweelede kubeleka mulimu uumizya pe. 36 Muzoopa chipo chitentwa, chipo chitentwa aamulilo chili aabweema bununkilila* kuli Jehova chapule wang’ombe, mugutu uumwi atugutu tuli musanu aatubili tuli aamunyaka uumwi, banyama boonse aaba kabali kabotu 37 achipo chazilyo azipo zinywigwa zipegwa aamwi apule wang’ombe amugutu atugutu kweendelana amweelwe wabo, kweendelana ambuzipegwa chiindi choonse, 38 kuswaanizya akana kampongo kachipayizyo chachibi, kuyungizya kuchipo chitentwa chipegwa chiindi choonse achipo chacho chazilyo achipo chazyo chinywigwa.

39 “‘Eezi muzoozipa kuli Jehova kumapobwe aanu aamunyaka, kuyungizya kuzipo zyanu zyachikonke azyakuliyandila kazili zipo zyanu zitentwa azipo zyanu zyazilyo azipo zyanu zinywigwa azipayizyo zyanu zyalumvwanano.’” 40 Mozesi wakabuzya ma-Israyeli zintu zyoonse Jehova nzyaakamulayilila.