Myeelwe
4 Jehova wakaambuula aaMozesi a-Aroni kati: 2 “Kweelede kubalwa bana bamaKkohati bali aakati kamaLevi kweendelana ampuli zyabo alubo kweendelana amaanda aamawisi, 3 boonse bali aaminyaka iili 30 kusika ku 50 bali mukabunga kabeleka mulimu waatente lyakuswaanganina.
4 “Ngoyu mulimu wabana baKkohati mutente lyakuswaanganina. Mulimu uusalalisya: 5 Nimulonga, Aroni abana bakwe beelede kusika bagwisye kketeni mpawo bavumbe bbokesi lyaBukamboni andilyo. 6 Beelede kubikka chivumbyo chachikumba chiteteete aajulu mpawo balivumbe aamulembo wabbuluu. Kuzwa waawo, babikke zisamu zyalyo zyakulinyampuzya mundawu yazyo.
7 “Mukuyungizya, beelede kuyala mulembo wabbuluu aajulu aatebbulu lyazinkwa zyachitondeezyo mpawo aajulu babikke madishi, nkomeki, ndido anongo zyachipo chinywigwa alubo chipo chachinkwa chikkala kachipegwa cheelede kukkala aalindilyo chiindi choonse. 8 Mpawo balayala mulembo uusalala aajulu aazyo, balivumbe achivumbyo chachikumba chiteteete. Kuzwa waawo, babikke zisamu zyakulinyampuzya mundawu yazyo. 9 Mpawo beelede kubweza mulembo wabbuluu bavumbe chibikkilo chamalambe aakumunisya, kuswaanizya amalambe aacho, twakuzimya mulilo twacho,* zyakubikkila makala zyacho azyakubikkila mafuta aabelesegwa kuti malambe akkale kaayaka. 10 Balachiputila muchivumbyo chachikumba chiteteete azibelesyo zyacho zyoonse mpawo bachibikke aachisamu chakunyampuzya. 11 Mpawo balayala mulembo wabbuluu aachipayililo changolida, bachivumbe aachivumbyo chachikumba chiteteete mpawo babikke zisamu zyakuchinyampuzya aandawu yazyo. 12 Balabweza zibelesyo zyoonse nzibabelesya kumulimu wabo ngubakkala kababeleka mundawu iisalala mpawo balazibikka aamulembo wabbuluu, bazivumbe aachivumbyo chachikumba chiteteete mpawo bazibikke aachisamu chakunyampuzya.
13 “Beelede kugwisya dyota* muchipayililo, bayale mulembo wapepulu aajulu aacho. 14 Aajulu aacho, balabikka zibelesyo zyoonse nzibabelesya nibabeleka milimu yaachipayililo: zyakubikkila makala, mafologo, mafosholo andido, zibelesyo zyoonse zyachipayililo mpawo balachivumba aachivumbyo chachikumba chiteteete, babikke zisamu zyacho zyakuchinyampuzya aandawu yazyo.
15 “Aroni abana bakwe beelede kumaninsya kuvumba ndawu iisalala azibelesyo zyoonse zyamundawu iisalala nimulonga. Mpawo bana baKkohati beelede kunjila bazibweze pesi tabeelede kuguma zintu zyamundawu iisalala pe, nkaambo balafwa. Ooyu nguumulimu wabana baKkohati mutente lyakuswaanganina.
16 “Eliyezari mwana wa-Aroni mupayizi, nguwe uuli aamulimu wakulangania mafuta aamalambe, tununkilizyo, chipo chazilyo chikkala kachipegwa amafuta aakunanika. Nguwe uulangania tente lyakukombela lyoonse azintu zyoonse zili mukati, kuswaanizya andawu iisalala azibelesyo zyayo.”
17 Jehova wakayinkilila kunembo kwaambuula aaMozesi a-Aroni kati: 18 “Mutazumizyi kuti musyobo wampuli zyamaKkohati uzoomane aakati kamaLevi. 19 Pesi mweelede kubachitila eezi kuchitila kuti bayinkilile kunembo kupona alubo batafwi, chiindi nibaswena aafwiifwi azintu zisalala. Aroni abana bakwe beelede kunjila mukati bape umwi awumwi mulimu wakwe achintu nchayelede kubweza. 20 Tabeelede kunjila pe kuti babone zintu zisalala, nikuba kwachiindi chifwiifwi biyo, kuchitila kuti batafwi.”
21 Mpawo Jehova wakaambuula aaMozesi kati: 22 “Bana baGeshoni beelede kubalwa, kweendelana amaanda aamawisi ampuli zyabo. 23 Weelede kubalemba boonse bali aaminyaka iili 30 kusika ku 50, bali mukabunga kabeleka milimu yaatente lyakuswaanganina. 24 Ooyu nguumulimu ngubeelede kuchita bamumpuli zyamaGeshoni azintu nzibeelede kubweza: 25 Beelede kubweza milembo yatente lyakukombela, tente lyakuswaanganina, chivumbyo chalyo achivumbyo chachikumba chiteteete chili aajulu aalyo, kketeni lyakumanjililo aatente lyakuswaanganina, 26 makketeni aalubuwa, kketeni lyakumanjililo aalubuwa luzyungulukide tente lyakukombela achipayililo, ntambo zyatente azibelesyo zyoonse azintu zyoonse zibelesegwa mumulimu ooyu. Ooyu nguumulimu wabo. 27 Mulimu woonse azintu zyoonse nzibeelede kubweza maGeshoni, zyeelede kulangwa-langwa aa-Aroni abana bakwe. Mweelede kubapa zintu zyoonse nzibeelede kubweza kuti ube mulimu wabo. 28 Eeyi njiimilimu yeelede kuchitwa aampuli zyamaGeshoni aatente lyakuswaanganina alubo milimu yabo yeelede kweendelezegwa aa-Itamara mwana wa-Aroni mupayizi.
29 “Bana baMerari, ulabalemba kweendelana ampuli zyabo alubo kweendelana amaanda aamawisi. 30 Ulalemba bali aaminyaka iili 30 kusika ku 50, boonse bali mukabunga kabeleka milimu yaatente lyakuswaanganina. 31 Nzezi zintu nzibeelede kunoonyampula kumilimu iichitwa aatente lyakuswaanganina: mafulemu aatente lyakukombela, mbalo zyalyo, mapila aalyo, zikkazikizyo zyalyo, 32 mapila aazyungulukide lubuwa, zikkazikizyo zyawo, nkanka zyawo zyatente antambo zyawo zyatente, kuswaanizya aazibelesyo zyoonse azintu zyoonse zili aachakuchita azintu eezi. Uzoobapa zibelesyo nzibeelede kubweza kweendelana amazina aabo. 33 Oobu mbuzyakeelede kubeleka mpuli zyabana baMerari, babeleka aatente lyakuswaanganina, kabazulwidwa aa-Itamara mwana wa-Aroni mupayizi.”
34 Kuzwa waawo, Mozesi a-Aroni abasilutwe bambungano bakalemba bana bamaKkohati, kweendelana ampuli zyabo alubo kweendelana amaanda aamawisi, 35 boonse bakali aaminyaka iili 30 kusika ku 50 bakali mukabunga kakali kubeleka milimu yaatente lyakuswaanganina. 36 Bantu boonse bakalembwa kweendelana aampuli zyabo bakali 2 750. 37 Aaba mbibakalembwa kuzwa kumpuli zyamaKkohati, boonse bakali kubeleka milimu yaatente lyakuswaanganina. Mozesi a-Aroni bakabalemba kweendelana aJehova mbaakalayilila Mozesi.
38 Bana baGeshoni bakalembwa kweendelana ampuli zyabo alubo kweendelana amaanda aamawisi, 39 boonse bakali aaminyaka iili 30 kusika ku 50, bakali mukabunga kakali kubeleka milimu yaatente lyakuswaanganina. 40 Bantu boonse bakalembwa kweendelana ampuli zyabo alubo kweendelana amaanda aamawisi bakali 2 630. 41 Oobu mbubakalembwa bamumpuli zyabana baGeshoni, boonse bakali kubeleka milimu yaatente lyakuswaanganina. Mozesi a-Aroni bakabalemba kweendelana aJehova mbaakalayilila.
42 Bana baMerari bakalembwa kweendelana ampuli zyabo alubo kweendelana amaanda aamawisi, 43 boonse bakali aaminyaka iili 30 kusika ku 50, bakali mukabunga kakali kubeleka milimu yaatente lyakuswaanganina. 44 Bantu boonse bakalembwa kweendelana ampuli zyabo bakali 3 200. 45 Oobu mbuzyakalembwa mpuli zyabana baMerari, aabo Mozesi a-Aroni mbibakalemba kweendelana aJehova mbaakalayilila Mozesi.
46 Mozesi a-Aroni abasilutwe bama-Israyeli bakalemba maLevi aaba boonse kweendelana ampuli zyabo alubo kweendelana amaanda aamawisi, 47 bakali aaminyaka iili 30 kusika ku 50 alubo boonse bakapegwa mulimu wakubeleka awakunyampula zintu zyatente lyakuswaanganina. 48 Aabo bakalembwa bakali 8 580. 49 Bakalembwa kweendelana aJehova mbaakalayilila kwiinda muli Mozesi, umwi awumwi kweendelana amulimu wakwe amukuli wakwe. Bakalembwa mbuli Jehova mbaakalayilila Mozesi.