Myeelwe

1 Alubo Jehova wakaambuula aaMozesi munkanda yaSinayi mutente lyakuswaanganina mubuzuba bwakusaanguna bwamweezi wachibili mumunyaka wachibili kuzwa nibakazwa munyika ya-Ijipita, kati: 2 “Bala mbungano yoonse yama-Israyeli umwi awumwi kweendelana ampuli yakwe, kweendelana amaanda aamawisi alubo kweendelana amazina aabaalumi boonse. 3 Iwe a-Aroni mweelede kulemba bantu kweendelana ankamu zyabo, boonse bali aaminyaka iili 20 kaziya kunembo, bakonzya kubeleka kabali masooja mu-Israyeli.

4 “Bweza mwaalumi uumwi kuzwa kumusyobo umwi awumwi, umwi awumwi wabo ulaba silutwe wang’anda yamawisi. 5 Aaya ngiimazina aabaalumi batanookugwasye: kumusyobo waRubbeni, Elizure mwana waShedawuri, 6 kumusyobo waSimiyoni, Shelumiyeli mwana waZurishadayi, 7 kumusyobo waJuda, Nasoni mwana wa-Aminadabbu, 8 kumusyobo wa-Isakkara, Netaneli mwana waZuwari, 9 kumusyobo waZebbuloni, Eliyabbu mwana waHeloni, 10 kubana baJosefa: kuzwa kuli Efremu, Elishama mwana wa-Amihudi, kuzwa kuli Manase, Gamaliyeli mwana waPedazuri, 11 kumusyobo waBbenjamini, Abbidani mwana waGidiyoni, 12 kumusyobo waDani, Ahiyezeri mwana wa-Amishadayi, 13 kumusyobo wa-Asha, Pagiyeli mwana wa-Okkirani, 14 kumusyobo waGadi, Eliyasafu mwana waDeyuweli, 15 kumusyobo waNafutali, Ahira mwana wa-Enani. 16 Aaba mbabo bakasalwa kuzwa mumbungano. Mbaasilutwe bamisyobo yamawisi, mitwe yazyuulu zyama-Israyeli.”

17 Nkinkaako, Mozesi a-Aroni bakabweza baalumi aaba bakali aamazina aakali asalwa. 18 Bakabunganizya mbungano yoonse mubuzuba bwakusaanguna bwamweezi wachibili, kuchitila kuti umwi awumwi uuli aaminyaka iili 20 kaziya kunembo, alembesye kweendelana azina lyakwe, mpuli yakwe alubo kweendelana amaanda aamawisi, 19 mbuli Jehova mbaakalayilila Mozesi. Nkinkaako, wakabalemba munkanda yaSinayi.

20 Bana baRubbeni, bazukulu bamwana wa-Israyeli wakusaanguna, bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo, bakonzya kubeleka kabali masooja bakabalwa umwi awumwi 21 alubo bantu bakalembwa kuzwa kumusyobo waRubbeni bakali 46 500.

22 Bazukulu baSimiyoni bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo bakonzya kubeleka kabali masooja bakabalwa umwi awumwi 23 alubo bantu bakalembwa kuzwa kumusyobo waSimiyoni bakali 59 300.

24 Bazukulu baGadi bakalembwa kweendelana azina, kweendelana ampuli alubo kweendelana amusyobo wabo. Baalumi boonse bali aaminyaka iili 20 kaziya kunembo, bakonzya kubeleka kabali masooja bakabalwa 25 alubo bantu bakalembwa kuzwa kumusyobo waGadi bakali 45 650.

26 Bazukulu baJuda bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo, bakonzya kubeleka kabali masooja bakabalwa 27 alubo bantu bakalembwa kuzwa kumusyobo waJuda bakali 74 600.

28 Bazukulu ba-Isakkara bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo bakonzya kubeleka kabali masooja bakabalwa 29 alubo bantu bakalembwa kuzwa kumusyobo wa-Isakkara bakali 54 400.

30 Bazukulu baZebbuloni bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo bakonzya kubeleka kabali masooja bakabalwa 31 alubo bantu bakalembwa kuzwa kumusyobo waZebbuloni bakali 57 400.

32 Bazukulu baJosefa kuzwa kuli Efremu bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo bakonzya kubeleka kabali masooja bakabalwa 33 alubo bantu bakalembwa kuzwa kumusyobo wa-Efremu bakali 40 500.

34 Bazukulu baManase bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo bakonzya kubeleka kabali masooja bakabalwa 35 alubo bantu bakalembwa kuzwa kumusyobo waManase bakali 32 200.

36 Bazukulu baBbenjamini bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo bakonzya kubeleka kabali masooja bakabalwa 37 alubo bantu bakalembwa kuzwa kumusyobo waBbenjamini bakali 35 400.

38 Bazukulu baDani bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo bakonzya kubeleka kabali masooja bakabalwa 39 alubo bantu bakalembwa kuzwa kumusyobo waDani bakali 62 700.

40 Bazukulu ba-Asha bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo bakonzya kubeleka kabali masooja bakabalwa 41 alubo bantu bakalembwa kuzwa kumusyobo wa-Asha bakali 41 500.

42 Bazukulu baNafutali bakalembwa kweendelana azina, kweendelana ampuli alubo kweendelana amaanda aamawisi. Baalumi boonse bali aaminyaka iili 20 kaziya kunembo bakonzya kubeleka kabali masooja bakabalwa 43 alubo bantu bakalembwa kuzwa kumusyobo waNafutali bakali 53 400.

44 Bantu aaba bakalembwa aaMozesi kalaamwi a-Aroni abasilutwe bama-Israyeli bali 12, silutwe umwi awumwi kayiminina ng’anda yawisi. 45 Ma-Israyeli boonse bali aaminyaka iili 20 kaziya kunembo bakonzya kubeleka kabali masooja mu-Israyeli bakalembwa kweendelana amaanda aamawisi 46 alubo bantu boonse bakalembwa bakali 603 550.

47 Pesi maLevi teebakalembwaamwi pe abantu aaba kweendelana amusyobo wamawisi. 48 Nkinkaako, Jehova wakabuzya Mozesi kuti: 49 “Musyobo wamaLevi kupela nguwo nguteelede kubala pe alubo mweelwe wabo toyelede kuuswaanizyaamwi awabamwi ma-Israyeli. 50 Weelede kusala maLevi kuti kabanoolangania tente lyakukombela lyaBukamboni azibelesyo zyalyo zyoonse azintu zyalyo zyoonse. Banoobweza tente lyakukombela azibelesyo zyalyo zyoonse akubeleka mulindilyo alubo beelede kuyaka matente aabo kabalizyungulukide. 51 Chiindi tente lyakukombela nililonzegwa, maLevi beelede kulidilisya alubo chiindi tente lyakukombela niliyanda kuyakwa, maLevi beelede kuliyaka alubo muntu woonse uutazumizigwi,* uuswena aafwiifwi weelede kujayigwa.

52 “Mu-Israyeli umwi awumwi weelede kuyaka tente lyakwe mukkeempu mwabikkidwe, mwaalumi umwi awumwi weelede kukkala kweendelana ankamu yakwe yamisyobo iitatu. 53 Alubo maLevi beelede kuyaka matente aabo kabazyungulukide tente lyakukombela lyaBukamboni kuchitila kuti bukali butasikili mbungano yama-Israyeli alubo maLevi beelede kulangania tente* lyakukombela lyaBukamboni.”

54 Ma-Israyeli bakachita zyoonse Jehova nzyaakalayilila Mozesi. Bakachita mbuboobo.