Myeelwe
5 Jehova wakayinkilila kunembo kwaambuula aaMozesi kati: 2 “Layilila ma-Israyeli kuti bamugwisye aanze aakkeempu muntu woonse uuli aabulwazi bwachipele amuntu uuli aabulwazi bwakuzwa zintu kuchizo chakwe chakuzyazya amuntu woonse uusofweede akaambo kakujata chidumbu chamuntu. 3 Mweelede kubagwisya aanze, kazitakwe ndaba kuti mwaalumi naakuti mwanakazi. Mweelede kubagwisya aanze aakkeempu kuchitila kuti batasofwaazyi bantu bali mukkeempu mbindikkala aakati kabo.” 4 Nkinkaako, ma-Israyeli bakachita mbuboobo, bakabagwisya aanze aakkeempu. Ma-Israyeli bakachita mbuli Jehova mbaakabuzizye Mozesi.
5 Jehova wakayinkilila kunembo kwaambuula aaMozesi kati: 6 “Buzya ma-Israyeli kuti, ‘Kuti mwaalumi naakuti mwanakazi wachita kufumbwa chibi akutasyomeka kuli Jehova, muntu ooyo uli aamulandu. 7 Weelede* kulyaambilila chibi nchaakachita, abweedezye mbadalo iikkwene kuti abbadalile mulandu wakwe ngwaachita* mpawo weelede kuyungizya chipanzi chimwi chazipanzi zili musanu zyambadalo eeyo, ayipe muntu ngwaakabisizya. 8 Pesi kuti muntu wabisigilwa katakwe bbululu waafwiifwi uutatambule mbadalo, yeelede kupegwa Jehova alubo ilaba yamupayizi, kunze kwamugutu wakumaninsya mulandu wakwe.
9 “‘Chipo choonse chisalala ma-Israyeli nchibeeta kumupayizi, cheelede kuba chakwe. 10 Zintu zisalala umwi awumwi nzyapa zilaba zyakwe. Kufumbwa chintu umwi awumwi nchapa mupayizi, chilaba chamupayizi.’”
11 Jehova wakayinkilila kunembo kwaambuula aaMozesi kati: 12 “Ambuula aama-Israyeli, ubabuzye kuti, ‘Nzezi zyeelede kuchitwa kuti mwanakazi waleya akutasyomeka kumulumaakwe 13 mpawo umwi mwaalumi woonaawe, pesi mulumaakwe katazizi alubo kakutakwe muntu uuzizi zyakuti mwanakazi ooyo walisofwaazya, pesi kakutakwe kamboni alubo kakutakwe wamujata pe: 14 Kufumbwa kuti mulumaakwe waba aabuzuba alubo wayeeyela kuti mwanakazi wakwe taakasyomeka pe, kakuli wakalisofwaazya naakuti kufumbwa kuti mulumaakwe waba aabuzuba alubo wayeeyela kuti mwanakazi wakwe taakasyomeka pe, kakuli taakalisofwaazya pe, 15 mwaalumi ooyo weelede kweeta mwanakazi wakwe kumupayizi achipo chakwe chakkumi cha-efa* yafulawa yabbali. Tayelede kuchitila mafuta naakuti kuchibikka tununkilizyo nkaambo nchipo chazilyo chabuzuba, chipo chazilyo chimuyeezya kuti wakabisya.
16 “‘Mupayizi uzoomweeta kunembo amwiimikizye kunembo lyaJehova. 17 Mupayizi uzoobweza maanzi aasalala muchibikkilo chabulongo alubo mupayizi uzoobweza museele aansi mutente lyakukombela awubikke mumaanzi. 18 Alubo mupayizi ulapa kuti mwanakazi ooyo ayimikile kunembo lyaJehova akumulambununa masusu aakwe alubo ulabikka chipo chazilyo chakuyeezya mumaanzi aakwe. Eechi nchipo chazilyo chabuzuba alubo mupayizi unoojisi maanzi aalula aayeta lutuko.
19 “‘Mupayizi uyoopa kuti mwanakazi ooyo akonke kwiinda mukumubuzya kuti: “Kuti kakutakwe mwaalumi wakoona aanduwe kuchikwetwe aamulumaako alubo kutaleyede pe naakuti kulisofwaazya, maanzi aaya aalula aayeta lutuko atakupambanisyi pe. 20 Pesi kuti kakuli wakaleya kuchikwetwe aamulumaako kwiinda mukulisofwaazya akoona aawumwi mwaalumi uutali mulumaako—” 21 Mpawo mupayizi ulapa kuti mwanakazi ooyo akonke chikonke chiswaanizya lutuko alubo mupayizi ulabuzya mwanakazi ooyo kuti: “Jehova ape kuti zina lyakwe libelesegwe kuzituko azikonke zinoowambwa aakati kabantu bakulindinywe, Jehova napa kuti chibelo chako* chiwe* akuti bula bwako buzimbe. 22 Maanzi aaya aayeta lutuko alanjila mumala aako akupa kuti bula bwako buzimbe akuti chibelo chako* chiwe.”* Mwanakazi ooyo weelede kwaamba kuti: “Ameni! Ameni!”
23 “‘Kuzwa waawo, mupayizi weelede kulemba zituko eezi mubbuku akuzisanzya mumaanzi aalula. 24 Mpawo ulanywisya mwanakazi ooyo maanzi aalula aayeta lutuko. Maanzi aayo aalula ayeta lutuko alanjila mulinguwe amululile. 25 Mpawo mupayizi ulabweza chipo chazilyo chabuzuba kuzwa mukuboko kwamwanakazi ooyo akuyumba chipo eecho chazilyo ooku akooku kunembo lyaJehova. Kuzwa waawo, ulacheeta aafwiifwi achipayililo. 26 Mpawo mupayizi ulabweza chipanzi chachipo chazilyo chikkwana mukuboko, chiiminina chipo choonse akupa kuti chisuke busi aachipayililo. Mpawo ulanywisya mwanakazi ooyo maanzi aayo. 27 Naazwa kumunywisya maanzi aayo, kuti kali wakalisofwaazya kwiinda mukutasyomeka kumulumaakwe, maanzi aayo aayeta lutuko alanjila mulinguwe akuba chintu chilula. Bula bwakwe bulazimba achibelo chakwe* chilawa* alubo zina lyakwe linoowambwa nikunoowambwa lutuko aakati kabantu bakulimbabo. 28 Pesi kuti mwanakazi ooyo taakwe naakalisofwaazya pe alubo kasalala, chisubulo eechi tachikoochitika pe kulinguwe, unookonzya kuminta akuzyala bana.
29 “‘Ooyu nguumulawu uuli atala abuzuba kuti mwanakazi waleya akulisofwaazya kachikwetwe aamulumaakwe. 30 Naakuti kuti mwaalumi waba aabuzuba akuyeeya kuti mwanakazi wakwe taakasyomeka pe, weelede kupa kuti mwanakazi wakwe ayimikile kunembo lyaJehova alubo mupayizi uzoochita zintu zyoonse zili mumulawu ooyu kulinguwe. 31 Mwaalumi tanoolikwe mulandu pe, pesi mwanakazi uzoolisandwida mulandu wakwe.’”