Myeelwe
6 Jehova wakayinkilila kunembo kwaambuula aaMozesi kati: 2 “Ambuula aama-Israyeli ubabuzye kuti, ‘Kuti mwaalumi naakuti mwanakazi wachita chikonke chiyandikana chakuti akkale kali muNaziri* kuli Jehova, 3 tayelede kunywa wayini azimwi zintu zikola. Tayelede kunywa viniga yawayini naakuti viniga yazimwi zintu zikola. Tayelede kunywa kufumbwa chintu chipangidwe aamasaansa naakuti kulya masaansa, kazitakwe ndaba kuti matete na naakuti mayumu. 4 Kwamazuba aakwe woonse nali muNaziri, tayelede kulya kufumbwa chintu chizwa kumusaansa, abe masaansa aatanabizwa niziba zikanda zyawo.
5 “‘Kwamazuba woonse aachikonke chabuNaziri bwakwe, tayelede kugela masusu aakwe pe. Weelede kukkala kasalala kwiinda mukulekela masusu aakwe kuti alampe kusikila mazuba ngaakalipeda kuli Jehova amane. 6 Tayelede kuswena aafwiifwi achidumbu chamuntu mumazuba aakwe aakulipeda kuli Jehova. 7 Nikuba kuti wisi naakuti banyina naakuti mukulanaakwe naakuti mwanikaakwe naakuti muchizi wakwe wafwa, tayelede kulisofwaazya pe, nkaambo chitondeezyo chakuti muNaziri kuli Leza chili aamutwe wakwe.
8 “‘Unoosalala kuli Jehova mumazuba woonse aakuba muNaziri. 9 Pesi kuti umwi muntu wafwa munsi lyakwe katakwe walikuyeeyela akusofwaazya masusu aakwe aayiminina kulipeda kwakwe kuli Leza,* weelede kugela masusu aakwe mubuzuba bwakusalazigwa kwakwe. Weelede kwaagela mubuzuba bwamusanu aabili. 10 Mpawo mubuzuba bwamusanu aatatu, weelede kweeta nziba zibili naakuti bana bankwilimba babili kumupayizi kumanjililo aatente lyakuswaanganina. 11 Mupayizi ulapa imwi kayili chipayizyo chachibi alubo imwi kayili chipo chitentwa kuti chibi chamuntu ooyo chili atala achidumbu chilekelelwe. Kuzwa waawo, weelede kusalazya mutwe wakwe mubuzuba oobo. 12 Mpawo ulalipeda lubo kuli Jehova akaambo kamazuba aabuNaziri bwakwe alubo uleeta kagutu kali aamunyaka uumwi kuti kabe chipo chamulandu. Nikuba oobo, mazuba aakusaanguna taazoobalwi pe nkaambo wakasofwaazya buNaziri bwakwe.
13 “‘Lino ngoyu mulawu uuli atala amuNaziri: Kuti wamaninsya mazuba aakwe aabuNaziri, weelede kweetwa kumanjililo aatente lyakuswaanganina. 14 Weelede kweeta chipo chakwe kuli Jehova: kagutu kamwi kalikabotu kali aamunyaka uumwi kachipo chitentwa, kabelele kamwi kapwizi kalikabotu kali aamunyaka uumwi kachipayizyo chachibi, mugutu uumwi uulikabotu wachipayizyo chalumvwanano, 15 bbasikiti lyazinkwa zyalawundi zitakwe bumena zili aampako aakati zyafulawa nante iiswaanizidwe aamafuta, zinkwa zipapalete zitakwe bumena zinanidwe mafuta achipo chazyo chazilyo achipo chazyo chinywigwa. 16 Mupayizi uzoozyeeta kunembo lyaJehova alubo uzoopa chipayizyo chakwe chachibi achipo chakwe chitentwa. 17 Uzoopa mugutu wachipayizyo chalumvwanano kuli Jehova aamwi abbasikiti lyazinkwa zitakwe bumena. Alubo mupayizi uzooyeta chipo chacho chazilyo achipo chacho chinywigwa.
18 “‘Kuzwa waawo, muNaziri weelede kugela masusu aamumutwe wakwe* kumanjililo aatente lyakuswaanganina alubo uzoobweza masusu aakwe aakalampa chiindi naakali muNaziri, akaabikke mumulilo uuli kunsi aachipayizyo chalumvwanano. 19 Alubo mupayizi weelede kubweza mweendo wamugutu wakunembo uujikidwe, chinkwa chimwi chalawundi chitakwe bumena chili aampako aakati kuzwa mubbasikiti achinkwa chimwi chipapalete chitakwe bumena mpawo azibikke mumaboko aamuNaziri kali wagela kale masusu aakali kwiiminina buNaziri bwakwe. 20 Mpawo mupayizi uzoochiyumba ooku akooku kachili chipo chakuyumba kunembo lyaJehova. Nchintu chisalala kumupayizi, kuswaanizya akaango kachipo chiyumbwa amweendo wapegwa. Kuzwa waawo, muNaziri ooyo ulakonzya kunywa wayini.
21 “‘Ngoyu mulawu uuli atala amuNaziri wachita chikonke: Kuti wakonka alubo kakonzya kupa Jehova chipo chiinda eecho chiyandikana chabuNaziri bwakwe, weelede kuzuzikizya chikonke chakwe katondeezya kuti ulawulemeka mulawu wabuNaziri bwakwe.’”
22 Mpawo Jehova wakati kuli Mozesi: 23 “Buzya Aroni abana bakwe kuti, ‘Njeyi nzila njimweelede kubalongezyaayo* ma-Israyeli. Mubabuzye kuti:
24 “Jehova amulongezye alubo amukwabilile.
25 Jehova ape kuti busyu bwakwe bumunike kulindinywe alubo amufwide luzyalo.
26 Jehova alanzye busyu bwakwe kulindinywe alubo amupe luumuno.”’
27 Mpawo beelede kubikka zina lyangu kuma-Israyeli kuchitila kuti ndibalongezye.”