Myeelwe
8 Jehova wakaambuula aaMozesi kati: 2 “Ambuula aa-Aroni umubuzye kuti, ‘Chiindi nuyasya malambe, malambe aali musanu aabili ayelede kumunika ndawu iili kunembo aachibikkilo chamalambe.’” 3 Nkinkaako, Aroni wakachita oobu: Wakayasya malambe kuti amunike ndawu iili kunembo aachibikkilo chamalambe mbuli Jehova mbaakalayilila Mozesi. 4 Mbobu mbuchakapangidwe chibikkilo chamalambe: Chakali changolida iifulidwe. Kuzwa kuchisiko chacho kusika kumaluba aacho, chakafulidwe biya. Chibikkilo chamalambe chakapangidwe kweendelana aJehova mbaakali wamutondeezya Mozesi.
5 Jehova wakaambuula lubo aMozesi kati: 6 “Bweza maLevi kuzwa kuma-Israyeli ubasalazye. 7 Mbobu mbweelede kubasalazya: Basansiile maanzi aakubasalazya chibi alubo beelede kunyoola mibili yabo yoonse ambeli, bawache zigogo zyabo mpawo balisalazye. 8 Mpawo balabweza pule wang’ombe uuchili muniini achipo chakwe chazilyo chafulawa nante iiswaanizidwe aamafuta. Mpawo ulabweza umwi pule wang’ombe uuchili muniini wachipayizyo chachibi. 9 Kuzwa waawo, weelede kweeta maLevi kunembo lyatente lyakuswaanganina mpawo ubunganizye mbungano yoonse yama-Israyeli. 10 Nuyeta maLevi kunembo lyaJehova, ma-Israyeli beelede kubikka maboko aabo aamitwe yamaLevi. 11 Aroni ulapa* maLevi kunembo lyaJehova kabali chipo chakuyumba chizwa kuma-Israyeli alubo balabeleka milimu yaJehova.
12 “Kuzwa waawo, maLevi balabikka maboko aabo aamitwe yabapule bang’ombe. Mpawo balapa umwi kuti abe wachipayizyo chachibi mpawo umwi ulaba wachipo chitentwa kuli Jehova kuti milandu yamaLevi imane. 13 Alubo weelede kupa kuti maLevi bayimikile kunembo lya-Aroni abana bakwe mpawo ubape* kabali chipo chiyumbwa kuli Jehova. 14 Weelede kupambula maLevi kuzwa kuma-Israyeli alubo maLevi balaba bangu. 15 Kuzwa waawo, maLevi balasika kuzoobeleka aatente lyakuswaanganina. Oobu mbubo mbutabasalazye akubapa* kabali chipo chakuyumba. 16 Nkaambo ndabapegwa mbuli chipo kuzwa kuma-Israyeli. Ndilababweza kuti babe bangu mundawu yabana boonse bakusaanguna kuzyalwa bama-Israyeli. 17 Nkaambo bana boonse bakusaanguna kuzyalwa bama-Israyeli mbibangu, babantu ababanyama. Ndakabasalazya kuti babe bangu mubuzuba nindakajaya bana boonse bakusaanguna kuzyalwa munyika ya-Ijipita. 18 Ndilabweza maLevi mundawu yabana boonse bakusaanguna kuzyalwa bama-Israyeli. 19 Ndilapa maLevi kuli Aroni abana bakwe kabali chipo chizwa kuma-Israyeli kuti babeleke milimu yeelede kubelekwa aama-Israyeli aatente lyakuswaanganina akuti bagwasye bapayizi kuti milandu yama-Israyeli imane, kuchitila kuti kutachitiki penzi aakati kama-Israyeli akaambo kakuti ma-Israyeli baswena aafwiifwi andawu iisalala.”
20 Mozesi a-Aroni ambungano yoonse yama-Israyeli bakachita zintu eezi kumaLevi. Ma-Israyeli bakachita zintu zyoonse eezi kumaLevi, kweendelana aJehova mbaakalayilila Mozesi atala amaLevi. 21 Nkinkaako, maLevi bakalisalazya akuwacha zigogo zyabo. Nibakamaninsya, Aroni wakabapa* kabali chipo chiyumbwa kunembo lyaJehova. Mpawo Aroni wakamaninsya milandu yabo kuti abasalazye. 22 Kuzwa waawo, maLevi bakanjila kuti babeleke milimu yabo aatente lyakuswaanganina kunembo lya-Aroni abana bakwe. Bakachita mbuboobo kumaLevi, mbuli Jehova mbaakalayilila Mozesi atala amaLevi.
23 Jehova wakaambuula aaMozesi kati: 24 “Nzezi zyeelede kubeleka kumaLevi: Kufumbwa mwaalumi wasisya minyaka iili 25 kaziya kunembo, weelede kuliswaanizya aakabunga kabaabo babeleka milimu yaatente lyakuswaanganina. 25 Pesi kuti wasisya minyaka iili 50, weelede kuzwa mukabunga aako akuleka kubeleka. 26 Ulakonzya kugwasya maLevinyina babeleka milimu yaatente lyakukombela, pesi tayelede kubeleka milimu yampawo pe. Eezi nzizyo nzimweelede kuchita atala amaLevi amilimu yabo.”