Myeelwe
16 Mpawo Kkora mwana wa-Izare, mwana waKkohati, mwana waLevi wakanyampuka aamwi aDatani a-Abbiramu bana ba-Eliyabbu a-Oni mwana waPeleti, umwi wabana baRubbeni. 2 Bakabukila Mozesi kabalaamwi abaalumi ma-Israyeli bali 250 basilutwe bambungano, baalumi basalidwe mumbungano, baalumi balaampuwo. 3 Nkinkaako, bakabunganaamwi kuti bakazyanie aaMozesi a-Aroni kabati kulimbabo: “Twakatala andinywe! Mbungano yoonse ilasalala, bantu boonse biya alubo Jehova ulaakati kabo. Pesi nkamboonzi inywe nimuli kulibikka aajulu aambungano yaJehova?”
4 Mbaakazimvwa biyo eezi, Mozesi wakavuntama aansi. 5 Mpawo wakati kuli Kkora abaabo bakali kubbazu lyakwe: “Juunza kuseeni Jehova uzootondeezya kuti ngwani uuli kubbazu lyakwe akuti ngwani uusalala akuti ngwani weelede kuswena aafwiifwi anguwe alubo kufumbwa ngwatazoosale, nguwe weelede kuswena aafwiifwi anguwe. 6 Amuchite eezi: Iwe Kkora abaabo bali kubbazu lyako, amubweze zyakubikkila makala 7 mpawo muzoobikke mulilo atununkilizyo mukati kunembo lyaJehova juunza alubo muntu ngwaatazoosale Jehova, nguwe uusalala. Inywe nibana baLevi mwayindilila!”
8 Mpawo Mozesi wakati kuli Kkora: “Amuswiilile inywe nibana baLevi. 9 Mubonaanga nchintu chiniini na kuti Leza wama-Israyeli wakamupambula kuzwa kumbungano yoonse yama-Israyeli akumuzumizya kuti kamuswena aafwiifwi kuti mubeleke milimu yaatente lyaJehova lyakukombela alubo kamwiimikila kunembo lyambungano akwiibelekela 10 akuti wakamuswenzya aafwiifwi anguwe aamwi ababbululu banu boonse bana baLevi? Muyanda kubweza na abupayizi? 11 Akaambo kakaambo aaka, iwe abantu boonse babungana kubbazu lyako mwakazyania aaJehova. Ani Aroni ngwani biya kuti mumung’ung’unine”?
12 Mozesi wakayita Datani a-Abbiramu bana ba-Eliyabbu, pesi bakati: “Tatukoosika pe! 13 Nchintu chiniini na kuti wakatugwisya munyika iikunka malili abuchi akupa kuti tuzoofwe munkanda oomuno? Lino waabuyanda kulichita mweendelezi wesu na? 14 Ambulisunu tunatunjizya pe munyika iikunka malili abuchi naakuti kupa kuti tukone myuunda yakulima amyuunda yamisaansa. Uyanda kubadonkola meso na baalumi aabo? Tatukoosika pe ooko!”
15 Nkinkaako, Mozesi wakanyema loko alubo wakabuzya Jehova kuti: “Utachilangi pe chipo chabo chazilyo. Taakwe donki lyabo pe ndindakabweza alubo taakwe naba uumwi aakati kabo ngundakachisa.”
16 Mpawo Mozesi wakati kuli Kkora: “Amukalibonie abaabo bali kubbazu lyako kunembo lyaJehova juunza, iwe ambabo a-Aroni. 17 Umwi awumwi weelede kweeta chakubikkila makala abikke tununkilizyo mukati alubo ayete chakubikkila makala kunembo lyaJehova, zyakubikkila makala zili 250 aamwi anduwe a-Aroni, umwi awumwi kali aachakubikkila makala chakwe.” 18 Nkinkaako, umwi awumwi wakeeta chakubikkila makala chakwe alubo bakabikka mulilo atununkilizyo mukati alubo bakayimikila kumanjililo aatente lyakuswaanganina aamwi aMozesi a-Aroni. 19 Chiindi Kkora naakabunganizya aabo bakali kubbazu lyakwe kuti bakazyanie aambabo kumanjililo aatente lyakuswaanganina, bulemu bwaJehova bwakalibonia kumbungano yoonse.
20 Aachiindi eecho, Jehova wakabuzya Mozesi a-Aroni kuti: 21 “Amulipambule kukabunga aaka kuchitila kuti ndibanyonyoone mukulaba kwaliso.” 22 Nibakamvwa oobo, bakavuntama aansi mpawo bakati: “O Leza, Leza uupa buumi* kubantu boonse, kubisya kwamuntu uumwi nga kulapa kuti unyemene mbungano yoonse na?”
23 Mpawo Jehova wakati kuli Mozesi: 24 “Ambuula aambungano yabantu ubabuzye kuti, ‘Amuzwe aafwiifwi amatente aaKkora, Datani a-Abbiramu!’”
25 Mpawo Mozesi wakanyampuka wayinka kuli Datani a-Abbiramu alubo baalu bama-Israyeli bakayinka aanguwe. 26 Wakabuzya mbungano kuti: “Ndikumbila muzwe aamatente aabantu aaba babi alubo mutagumi chintu chabo nichiba chimwi, kuchitila kuti mutakukulwi akaambo kachibi chabo.” 27 Chakufwambaana, bakazwa aamatente aaKkora, Datani a-Abbiramu, kumabazu woonse biya alubo Datani a-Abbiramu bakazwa mumatente bayimikila aamilyango yamatente aabo kabalaamwi abanakazi babo abana babo balombe abasimbi abana babo baniini.
28 Mpawo Mozesi wakati: “Eechi nchicho chitamuzibye kuti Jehova nguwe wakandituma kuti ndichite zintu zyoonse eezi, tazizwi mumoyo wangu* pe: 29 Kuti bantu aaba bafwe mbuli mbubafwa bantu boonse akuti chisubulo chabo chikozyanie aachabantu boonse, nkukwaamba kuti Jehova tanditumide pe. 30 Pesi kuti Jehova achite chintu chigambya kulimbabo, nyika ijulike* akubamena bantu aaba azintu zyabo zyoonse alubo kuti banjile muKabanda* kabapona, kwaamba choonzyo, mulaziba kuti bantu aaba teebamulemeka pe Jehova.”
31 Mbaakamaninsya biyo kwaambuula majwi aaya, nyika yakaanzaana mpubakabede. 32 Alubo nyika yakajulika* akubamena aamwi ampuli zyabo abantu boonse bakali kubbazu lyaKkora azintu zyabo zyoonse. 33 Nkinkaako, bo abantu boonse bakali kubbazu lyabo bakabbila muKabanda* kabapona alubo nyika yakabavumba, nkinkaako, bakanyonyooka aakati kambungano. 34 Ma-Israyeli boonse bakali aafwiifwi ambabo bakachija kabali kukwiila nkaambo bakati: “Twayoowa kuti nyika ilatumena.” 35 Mpawo kwakazwa mulilo kuli Jehova mpawo wakanyonyoona baalumi bali 250 bakali kuumpa tununkilizyo.
36 Mpawo Jehova wakati kuli Mozesi: 37 “Buzya Eliyezari mwana wa-Aroni mupayizi kuti agwisye zyakubikkila makala mumulilo nkaambo zilasalala. Alubo umubuzye kuti akawusowele kule-kule mulilo. 38 Zyakubikkila makala zyabaalumi bakafwa akaambo kakubisya* zyeelede kupwayigwa-pwayigwa zibe tuzeng’e tutabikkwe aajulu aachipayililo nkaambo bakazyeeta kunembo lyaJehova alubo zyakasalala. Zyeelede kuba chitondeezyo kuma-Israyeli.” 39 Nkinkaako, Eliyezari mupayizi wakabweza zyakubikkila makala zyakkopa zyabaabo bakapya wazipwaya kuti zibikkwe aajulu aachipayililo, 40 mbuli Jehova mbaakamubuzya kwiinda muli Mozesi. Zyakali kuyeezya ma-Israyeli kuti taakwe muntu uutazumizigwi* uutali mwana wa-Aroni weelede kuswena aafwiifwi kuti awumpe tununkilizyo kunembo lyaJehova akuti taakwe muntu weelede kuba mbuli Kkora abakali kubbazu lyakwe.
41 Mubuzuba bwakatobela, mbungano yama-Israyeli yoonse yakasaanguna kung’ung’unina Mozesi a-Aroni kabati: “Inywe kamuli babili mwakajaya bantu baJehova.” 42 Chiindi mbungano niyakabungana kuti ikazyanie aaMozesi a-Aroni, bakachenguluka balanga kutente lyakuswaanganina mpawo bakabona joba kalivumbide tente alubo bulemu bwaJehova bwakasaanguna kuboneka.
43 Mozesi a-Aroni bakayinka kunembo lyatente lyakuswaanganina 44 mpawo Jehova wakati kuli Mozesi: 45 “Inywe nibaalumi, amuzwe aakati kambungano eeyi kuchitila kuti ndibanyonyoone mukulaba kwaliso.” Nibakamvwa oobo bakavuntama aansi. 46 Mpawo Mozesi wakati kuli Aroni: “Bweza chakubikkila makala ubikke mulilo kuzwa kuchipayililo alubo ubikke tununkilizyo mpawo ufwambaane uye kumbungano yama-Israyeli alubo ukamaninsye milandu yabo, nkaambo Jehova watondeezya bukali bwakwe. Penzi lyasaanguna!” 47 Chakufwambaana, Aroni wakachibweza mbuli mbaakabuzigwa aaMozesi mpawo wakachijaana waya kumbungano yabantu alubo bona! penzi lyakali lyasaanguna aakati kabantu. Nkinkaako, wakabikka tununkilizyo muli chakubikkila makala mpawo wakasaanguna kumaninsya milandu yabantu. 48 Wakayinkilila kunembo kayimvwi aakati kabantu bafwide abawumi alubo penzi lyakamana mpawaawo. 49 Bantu bakafwa kupenzi eelyo bakali 14 700 katutabalikizyi abakafwa kunkani yaKkora. 50 Chiindi Aroni naakabweeda kuli Mozesi kumanjililo aatente lyakuswaanganina, penzi lyakali lyayimikila.