Myeelwe
21 Mwaami wamaKkenani waku-Aradi, wakali kukkala kuNegebbu naakamvwa kuti Israyeli ulikuza kabelesya nzila yaku-Atarimu, wakalwana Israyeli alubo wakabweza bamwi babo kuti babe bazike. 2 Mpawo Israyeli wakachita chikonke kuli Jehova kati: “Kuti waaba bantu aaba mumaboko aangu, kwaamba choonzyo, ndilanyonyoona myuunzi yabo.” 3 Nkinkaako, Jehova wakaswiilila jwi lya-Israyeli mpawo wakapa kuti baazunde maKkenani alubo bakaanyonyoona kuswaanizya amyuunzi yabo. Nkinkaako, bakawuzika ndawu eeyo kuti Homa.*
4 Nibakayinkilila kunembo alweendo lwabo kuzwa kuChilundu chaHori kababelesya nzila yakuLwizi Lusalala, kuchitila kuti bazyunguluke nyika ya-Edomu, bantu bakakatala akaambo kalweendo. 5 Bantu bakayinkilila kunembo kwaambuula bubi atala aLeza aMozesi kabati: “Nkamboonzi nimwakatugwisya ku-Ijipita kuti tuzoofwide munkanda? Tamukwe chakulya, tamukwe maanzi alubo chinkwa eechi chisesemya chatukola!”* 6 Nkinkaako, Jehova wakatuma nzoka zikali aakati kabantu alubo zyakali kuluma bantu, zyakuti ma-Israyeli biingi bakafwa.
7 Nkinkaako, bantu bakasika kuli Mozesi mpawo bakati: “Twabisya kwiinda mukwaambuula bubi atala aJehova alubo atala anduwe. Tukombelezezye kuli Jehova kuchitila kuti agwisye nzoka eezi aakati kesu.” Mpawo Mozesi wakabakombelezezya. 8 Jehova wakati kuli Mozesi: “Panga chikozyano chanzoka iikozyenie aanzoka nkali, wiibikke aachisamu. Kuti muntu walumwa, weelede kulanga nzoka njwaapanga kuti atafwi.” 9 Aachiindi nchicheecho, Mozesi wakapanga nzoka yakkopa* akwiibikka aachisamu. Kufumbwa muntu wakali kulumwa aanzoka mpawo walanga nzoka eeyo yakkopa, wakali kupona.
10 Kuzwa waawo, ma-Israyeli bakazwa mpawo bakaakukkala ku-Obboti. 11 Mpawo nibakazwa ku-Obboti bakaakukkala ku-Iye-abbarimu, kunkanda iilangene aaMowabbu kubbazu lyakubuzwezuba. 12 Nibakazwa kundawu eeyo, bakaakukkala kuKalonga kaZeredi. 13 Mpawo nibakazwa kundawu eeyi, bakaakukkala muchilawu cha-Anoni chili munkanda iili aamugaano uuzwida kuma-Amori, nkaambo Anoni mugaano waMowabbu, aakati kaMowabbu ama-Amori. 14 Eezi nzizyo zipa kuti bbuku lyaNkondo zyaJehova lyaambuule atala andawu iitegwa “Vahebbu iili muSufa atulonga twa-Anoni 15 amunkunu wamakuti* uusika kuchilawu cha-Ari uuswaanana aamugaano waMowabbu.”
16 Kuzwa waawo, bakaya kuBberi. Eechi nchiichikala Jehova nchaakali kwaamba naakabuzya Mozesi kuti: “Bunganizya bantu kuti ndibape maanzi.”
17 Aachiindi eecho, ma-Israyeli bakayimba lwiimbo oolu:
“Tuntumuka* O chikala!—Amuchiimbile!
18 Chikala nchibakasya baami, chikala nchibakasya balupati-pati,
Kababelesya mufunko wamweendelezi amifunko yabo.”
Mpawo bakazwa munkanda baya kuMatana. 19 Kuzwa kuMatana bakaya kuNahaliyeli alubo kuzwa kuNahaliyeli bakaya kuBbamoti. 20 Bakazwa kuBbamoti baya mukkuti lili muchilawu chaMowabbu, aajulu aaPisiga iilangene aaJeshimoni.*
21 Aachiindi eechi, Israyeli wakatuma batumwa kuli Sihoni mwaami wama-Amori kati: 22 “Tuzumizye twiinde munyika yako. Tatukooleya mumyuunda njimulima naakuti mumyuunda yamisaansa. Taakwe maanzi ngitutanywe kuzwa kuzikala zyako. Tulabelesya Mugwagwa waMwaami kusikila tuzwe muchilawu chako.” 23 Pesi Sihoni taakamuzumizya pe Israyeli kuti ayinde muchilawu chakwe. Nkinkaako, Sihoni wakabunganizya bantu bakwe boonse mpawo bakazwa kuti bakalwane Israyeli munkanda. Bakasika kuJahazi alubo bakasaanguna kulwana Israyeli. 24 Pesi Israyeli wakamuzunda aapanga alubo wakabweza nyika yakwe kuzwa ku-Anoni kusika kuJabbokku aafwiifwi ama-Amoni, nkaambo Jazeri iili kumugaano wachilawu chama-Amoni.
25 Nkinkaako, Israyeli wakabweza myuunzi yoonse eeyi alubo wakasaanguna kukkala mumyuunzi yoonse yama-Amori, muHeshibboni amumyuunzi yayo yoonse miniini.* 26 Nkaambo Heshibboni wakali muunzi waSihoni, mwaami wama-Amori ooyo wakalwanide aamwaami wamaMowabbu akubweza nyika yakwe yoonse kusika ku-Anoni. 27 Nzizyo zyakapa kuti kube kaambyo kakufubaazya kati:
“Kuza kuHeshibboni.
Muunzi waSihoni awuyakwe usime.
28 Nkaambo kwakazwa mulilo muHeshibboni, mulilo uuyaka wakazwa mumuunzi waSihoni.
Wakanyonyoona Ari yaMowabbu, baami bandawu zilaajulu zya-Anoni.
29 Ulaapenzi nuMowabbu! Muzoonyonyoonwa nibantu bakuKkemoshi!
Upa kuti bana bakwe balombe babe mbuli basikweendengana akuti bana bako basimbi babe bazike baSihoni mwaami wama-Amori.
30 Atubayase.
Heshibboni uzoonyonyoonwa kusika kuDibboni.
Atwiinyonyoone kusika kuNofa.
Mulilo uzoovwilima kusika kuMedibba.”
31 Nkinkaako, Israyeli wakasaanguna kukkala munyika yama-Amori. 32 Mozesi wakatuma bamwi baalumi kuti bakalange-lange nyika yaJazeri. Mpawo bakazunda imwi myuunzi yayo miniini* akutanda ma-Amori bakali kukkala mumo. 33 Kuzwa waawo, bakanyona, batanta kababelesya Nzila yaBbashani. Mpawo Ogi mwaami waBbashani, wakasika abantu bakwe boonse kuti babalwane ku-Edireyi. 34 Jehova wakati kuli Mozesi: “Utamuyoowi pe nkaambo ndiyoomubikka mukuboko kwako aamwi abantu bakwe anyika yakwe alubo uyoomuchita mbuli mbuwakachita Sihoni mwaami wama-Amori, ooyo wakali kukkala kuHeshibboni.” 35 Nkinkaako, bakamujaya abana bakwe balombe abantu bakwe boonse kusikila bantu bakwe boonse bamana alubo bakabweza nyika yakwe.